ଭୁବନେଶ୍ୱର,୧୯ା୧୧(ବ୍ୟୁରୋ):ରକ୍ତ ଦେଇ ନାବାଳକର ଜୀବନ ବଞ୍ଚାଇଛନ୍ତି ଜଣେ ଆମ୍ବୁଲାନ୍ସ କର୍ମଚାରୀ। ଜଣେ ଅପରିଚିତ ରୋଗୀକୁ ରକ୍ତ ଦାନକରିଥିବା ମାନବିକତାର ପରିଚୟ ଦେଇଥିବା ୧୦୮ ଆମ୍ବୁଲାନ୍ସ ଡ୍ରାଇଭର ସୁଜିତ୍ ସାହୁଙ୍କ ପାଖକୁ ଏବେ ପ୍ରଶଂସାର ସୁଅ ଛୁଟୁଛି।
ସୂଚନା ଅନୁଯାୟୀ, ଭୁବନେଶ୍ୱର ଉପକଣ୍ଠ ଭରତପୁର ଗ୍ରାମ ପଞ୍ଚାୟତ ଅଧୀନ ରଙ୍ଗମାଟିଆ ଗ୍ରାମର ସୁଦର୍ଶନ ପ୍ରଧାନଙ୍କ ୧୩ ବର୍ଷର ପୁଅ ସଚିଦାନନ୍ଦ ଜ୍ୱରରେ ଆକ୍ରାନ୍ତ ହୋଇ ରେଢାଖୋଲ ସବ୍ଡ଼ିଭିଜିନାଲ ହସ୍ପିଟାଲରେ ଚିକିତ୍ସାଧୀନ ଥିଲେ। ରକ୍ତ ଅଭାବ ଯୋଗୁ ତାଙ୍କ ସ୍ବାସ୍ଥ୍ୟବସ୍ଥାରେ ଅବନତି ଘଟିଥିଲା। ପୁଅ ପାଇଁ ତୁରନ୍ତ ରକ୍ତ ଯୋଗାଡ଼ କରିବାକୁ ଡ଼ାକ୍ତର କହିଥିଲେ ମଧ୍ୟ ସୁଦର୍ଶନ ଅତ୍ୟନ୍ତ ଗରିବ ପରିବାରର ହୋଇଥିବାରୁ ତାହାକୁ ଯୋଗାଡ଼ କରିବା ତାଙ୍କପକ୍ଷେ ସମ୍ଭବ ନ ଥିଲା। ବହୁ ପ୍ରଚେଷ୍ଟା ସତ୍ତ୍ୱେ ତାଙ୍କୁ କେଉଁଠାରୁ ରକ୍ତ ମିଳି ନ ଥିଲା। ଏଭଳିସ୍ଥଳେ ସେଠାରେ ଥିବା ୧୦୮ ଆମ୍ବୁଲାନ୍ସ କର୍ମଚାରୀଙ୍କୁ ବି-ପଜିଟିଭ୍ ଗ୍ରୁପ୍ର ରକ୍ତ ଯୋଗାଡ଼ କରିବାକୁ ସୁଦର୍ଶନ ଅନୁରୋଧ କରିଥିଲେ। ଆମ୍ବୁଲାନ୍ସ ଡ୍ରାଇଭର ସୁଜିତ ଏହା ଶୁଣି ରକ୍ତ ଦୋବକୁ ଆଗେଇ ଆସିଥିଲେ। ତାଙ୍କର ମଧ୍ୟ ବ୍ଲଡ଼ ଗ୍ରୁପ୍ ବି-ପଜିଟିଭ୍ ଥିଲା। ରକ୍ତ ନେବା ପରେ ଗୁରୁତର ଅସୁସ୍ଥ ଥିବା ସଚିଦାନନ୍ଦଙ୍କ ସ୍ବାସ୍ଥାବସ୍ଥାରେ ଉନ୍ନତି ଘଟୁଥିବା ଜଣାପଡିଛି।
