ବଇଣ୍ଡା,୯।୬(ଡି.ଏନ.ଏ.): ଅନୁଗୋଳ ଜିଲା ଆଠମଲ୍ଲିକ ବ୍ଲକ ଆମ୍ବସରମୁଣ୍ଡା ପଞ୍ଚାୟତରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି। ୧୫ ଦିନ ହେବ ପଞ୍ଚାୟତର ଫୁଲରିବଣିଆ, ନବଦୀପପୁର ଗ୍ରାମରେ ୧୦ ଲକ୍ଷ ଟଙ୍କା ଅଟକଳରେ ୨ଟି ପୋଖରୀ ଶ୍ରମିକଙ୍କ ବଦଳରେ ଜେସିବି ମେଶିନ ମାଧ୍ୟମରେ ଖୋଳାଯାଇଛି। ଏ ନେଇ ଆମ୍ବସରମୁଣ୍ଡା ଗ୍ରାମବାସୀ ବୁଧବାର ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଛନ୍ତି।
ଅଭିଯୋଗପତ୍ରରେ ଦର୍ଶାଯାଇଛି, ପଞ୍ଚାୟତରେ ୧୧୫୮ଟି ଜବ୍ କାର୍ଡ ଥିବାବେଳେ ଶ୍ରମିକମାନଙ୍କୁ ଅଣଦେଖା କରାଯାଉଛି। କେତେଜଣ ବ୍ୟକ୍ତି ଅନେକ ଶ୍ରମିକଙ୍କ ଜବ୍କାର୍ଡ ନିଜ ପାଖରେ ରଖି ପ୍ରକଳ୍ପଗୁଡିକ ଜେସିବି ମେଶିନ ସହାୟତାରେ ଖୋଳାଇ ମଜୁରି ଅର୍ଥ ହଡ଼ପ କରୁଛନ୍ତି। କିଛିଦିନ ହେବ ନବଦୀପପୁର ଓ ଫୁଲରିବଣିଆ ଗ୍ରାମରେ ୨ଟି ପୋଖରୀ ମେଶିନରେ ଖୋଲାଯାଇଛି। ବ୍ଲକ ପ୍ରଶାସନର କେତେଜଣ କର୍ମଚାରୀ ଏହି ଦୁର୍ନୀତିରେ ସମ୍ପୃକ୍ତ ଥିବା ଅଭିଯୋଗ ହୋଇଛି। ଏଥିସହ ମିଥ୍ୟା ବିଲ୍ କରି ଅର୍ଥ ହଡପ କରାଯାଉଥିବା ନେଇ କିଛିଦିନ ତଳେ ଆମ୍ବସରମୁଣ୍ଡା ଗ୍ରାମବାସୀ ବ୍ଲକ ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ କେତେଜଣ ରାଜନେତାଙ୍କ ଚାପ ଯୋଗୁ ବ୍ଲକ ପ୍ରଶାସନ ତଦନ୍ତ କରୁ ନ ଥିବା ଅଭିଯୋଗ ହୋଇଛି। ତୁରନ୍ତ ଏହି ଅନିୟମିତତା ସମ୍ପର୍କରେ ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଗ୍ରାମବାସୀ ଦାବି କରିଛନ୍ତି। ଏ ନେଇ ଆଠମଲ୍ଲିକ ବିଡିଓ ସୌଭାଗ୍ୟ ବେହେରା କହିଛନ୍ତି, ଘଟଣା ସମ୍ପର୍କରେ ତଦନ୍ତ କରାଯାଇ ପଦକ୍ଷେପ ନିଆଯିବ।
