ଡେରାଡୁନ୍,୪ା୭, ଅଯୋଧ୍ୟା ରାମମନ୍ଦିରରୁ ବହୁ କୋଟି ଟଙ୍କାର ଦାନ ଚୋରି ଘଟଣା ସାରା ଦେଶରେ ଆଲୋଡ଼ନ ସୃଷ୍ଟି କରିଥିବାବେଳେ ଏବେ ଉତ୍ତରାଖଣ୍ଡର ବଦ୍ରିନାଥ ଓ କେଦାରନାଥ ମନ୍ଦିରରେ ଦାନ ଟଙ୍କା ଚୋରି ହୋଇଥିବା ଅଭିଯୋଗ ହୋଇଛି।
ଶ୍ରୀବଦ୍ରିନାଥ ଧାମକୁ ମିଳିଥିବା ଦାନ ଅର୍ଥରେ ଅନିୟମିତତା ଅଭିଯୋଗ ସୋସିଆଲ ମିଡିଆରେ ଘୂରି ବୁଲିବା ସହ ଲୋକଙ୍କ ଧ୍ୟାନ ଆକର୍ଷଣ କରିବା ପରେ ଶ୍ରୀବଦ୍ରିନାଥ-କେଦାରନାଥ ମନ୍ଦିର କମିଟି (ବିକେଟିସି) ଏହାର ତଦନ୍ତ ଆରମ୍ଭ କରିଛି।
ଘଟଣା ଉପରେ ନିରପେକ୍ଷ ଓ ତଥ୍ୟଭିତ୍ତିକ ତଦନ୍ତ ଲାଗି ଏକ କମିଟି ଗଠନ କରିବାକୁ ନିର୍ଦ୍ଦେଶ ଦିଆଯାଇଥିବା ବିକେଟିସି ଅଧ୍ୟକ୍ଷ ହେମନ୍ତ ଦ୍ୱିବେଦୀ କହିଛନ୍ତି। ତଦନ୍ତରୁ କୌଣସି କର୍ମଚାରୀ ଦୋଷୀସାବ୍ୟସ୍ତ ହେଲେ, ଆଇନ ଅନୁଯାୟୀ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ମନ୍ଦିରକୁ ମିଳୁଥିବା ଦାନର ଦୁରୁପଯୋଗ ହେଉଥିବା ନେଇ କିଛିଦିନ ହେଲା ସୋସିଆଲ ମିଡିଆରେ ଭାଇରାଲ ହେଉଛି। ଏହାକୁ ଗମ୍ଭୀରତାର ସହ ବିଚାରକୁ ନେଇ କମିଟି ୨୪ ଘଣ୍ଟା ମଧ୍ୟରେ କାର୍ଯ୍ୟାନୁଷ୍ଠାନ ଆରମ୍ଭ କରିଛି। ଦାନ ଟଙ୍କା ଗଣନା କାର୍ଯ୍ୟରେ ନିୟୋଜିତ ଥିବା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀଙ୍କଠାରୁ ଆରମ୍ଭ କରି ସମସ୍ତ କର୍ମଚାରୀଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଥିବା ଦ୍ୱିବେଦୀ କହିଛନ୍ତି।
ହିନ୍ଦୁ ସଂଗଠନ ଭୈରବ ସେନାର ପ୍ରତିଷ୍ଠାତା ସଭାପତି ସନ୍ଦୀପ ଖତ୍ରୀ ବିକେଟିସିର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୋହନ ସିଂ ରଙ୍ଗଦଙ୍କୁ ପତ୍ର ଲେଖି ଦାନ ଟଙ୍କା ଚୋରି ଅଭିଯୋଗ ଆଣିବା ପରେ ଘଟଣା ସାମ୍ନାକୁ ଆସିଛି। ଗତ ଶୁକ୍ରବାର ସନ୍ଦୀପ ପଠାଇଥିବା ଚିଠିରେ ଜଣାଇଥିଲେ ଯେ, ବଦ୍ରିନାଥ ଧାମକୁ ମିଳୁଥିବା ଦାନ ଚୋରି ହେଉଥିବା ନେଇ ତାଙ୍କୁ ସୂଚନା ମିଳିଛି। ବିକେଟିସି ଅଧ୍ୟକ୍ଷଙ୍କ ବ୍ୟକ୍ତିଗତ ସଚିବ ଦାନ ଅର୍ଥ ଚୋରି କରୁଥିବା ଅଭିଯୋଗରେ ଦର୍ଶାଯାଇଛି। ଏନେଇ ଏତଲା ଦାଏର କରାଯିବା ସହ ସମ୍ପୂର୍ଣ୍ଣ ଘଟଣାର ନିରପେକ୍ଷ ତଦନ୍ତ କରାଯିବାକୁ ସନ୍ଦୀପ୍ ଦାବି କରିଥିଲେ।
