ଲକ୍ଷ୍ନୌ,୨୫।୯: ଗ୍ୟାଙ୍ଗଷ୍ଟର ମାମଲାରେ ମୁଖତାର ଅନସାରୀଙ୍କୁ ଟ୍ରାଏଲ କୋର୍ଟରୁ ମିଳିଥିବା ୧୦ବର୍ଷର ଦଣ୍ଡ ଉପରେ ଆହ୍ଲାବାଦ ହାଇକୋର୍ଟ ରାୟ ଦେଇଛନ୍ତି। ଗ୍ୟାଙ୍ଗଷ୍ଟର ମାମଲାରେ ମୁଖତାର ଅନସାରୀଙ୍କୁ ଆଶ୍ୱସ୍ତି ମିଳିଛି। ଆହ୍ଲାବାଦ ହାଇକୋର୍ଟ ମୁଖତାର ଅନସାରୀଙ୍କ ଜାମିନକୁ ମଞ୍ଜୁର କରିଛନ୍ତି। ଏହା ସହିତ ହାଇକୋର୍ଟ ଦଣ୍ଡ ସହିତ ଲଗାଯାଇଥିବା ୫ ଲକ୍ଷ ଟଙ୍କା ଜରିମାନା ମଧ୍ୟ ସ୍ଥଗିତ ରଖିଛନ୍ତି। ତେବେ ମୁଖତାର ଅନସାରୀଙ୍କ ଦଣ୍ଡାଦେଶ ରୋକ ଲଗାଇବା ଉପରେ ହାଇକୋର୍ଟ ମନା କରିଦେଇଛନ୍ତି। ଏହି ଦଣ୍ଡ ବିରୋଧରେ ଦାଖଲ ହୋଇଥିବା ଆବେଦନ ଉପରେ ଶୁଣାଣି ହାଇକୋର୍ଟରେ ଜାରି ରହିବ।
ଜଷ୍ଟିସ ରାଜଭୀର ସିଂଙ୍କ ଏଏକ ବେଞ୍ଚ ସୋମବାର ଏହି ରାୟ ଦେଇଛନ୍ତି। ଯୁକ୍ତି ସମାପ୍ତ ହେବା ପରେ ହାଇକୋର୍ଟ ୨୦ ସେପ୍ଟେମ୍ବରରେ ଏହି ନିଷ୍ପତ୍ତି ସୁରକ୍ଷିତ ରଖିଥିଲେ। ୧୦ ବର୍ଷର ଦଣ୍ଡକୁ ଚ୍ୟାଲେଞ୍ଜ କରି ମୁଖତାର ଅନସାରୀ ହାଇକୋର୍ଟରେ ଏକ ଆବେଦନ କରିଥିଲେ। ଗ୍ୟାଙ୍ଗଷ୍ଟର ମାମଲାରେ ଏମ୍ପି ଏମ୍ଏଲଏ ସ୍ବତନ୍ତ୍ର କୋର୍ଟ ଦଣ୍ଡାଦେଶ ଶୁଣାଇଥିଲେ। ଏପ୍ରିଲ ୨୯ରେ ଅନସାରୀଙ୍କୁ ଦୋଷୀ ସାବ୍ୟସ୍ତ କରାଯାଇ ୧୦ବର୍ଷ କାରାଦଣ୍ଡରେ ଦଣ୍ଡିତ କରାଯାଇଥିଲା।
