ସୋର, ୨୬ା୧୨(ଡି.ଏନ୍.ଏ): ସୋର ବ୍ଲକ ବାଗୁଡ଼ି ମହାବୀର କ୍ଲବ ଆନୁକୂଲ୍ୟରେ ୨୨ତମ ସର୍ବଭାରତୀୟ କ୍ରିକେଟ ଟୁର୍ନାମେଣ୍ଟ ଶୁକ୍ରବାର ଉଦ୍ଯାପିତ ହୋଇଛି। ଫାଇନାଲରେ ରାମେଶ୍ୱର ସ୍ପୋର୍ଟିଂକୁ ହରାଇ ୟୁ ଆଣ୍ଡ୍ ମି ଚାମ୍ପିୟନ୍ ହେବାର ଗୌରବ ଅର୍ଜନ କରିଛି। ଟସ୍ ଜିଣି ରାମେଶ୍ୱର ନିର୍ଦ୍ଧାରିତ ୨୭ ଓଭରରେ ୮ ଉଇକେଟ୍ ହରାଇ ୧୯୫ ରନ୍ ସଂଗ୍ରହ କରିଥିଲା। ଜବାବରେ ୟୁ ଆଣ୍ଡ୍ ମି ୨୨.୨ ଓଭରରେ ୬ ଉଇକେଟ୍ ହରାଇ ୧୯୭ ରନ୍ କରି ବିଜୟୀ ହୋଇଥିଲା। ବିଜୟୀ ଟିମ୍ର ସବ୍ୟସାଚୀ ଆଚାର୍ଯ୍ୟ ଅଲରାଉଣ୍ଡ ପ୍ରଦର୍ଶନ କରି ୪୦ ବଲ୍ରୁ ୬୪ ରନ୍ ସଂଗ୍ରହ କରିବା ସହିତ ୬ ଓଭର ବୋଲିଂ କରି ୩୭ ରନ୍ ଦେଇ ୨ଟି ଉଇକେଟ୍ ନେଇ ଦଳର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବାରୁ ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ପାଇଥିଲେ। ଏହି ଖେଳକୁ ବିସିସିଆଇ ଲେଭଲ-୧ ଅମ୍ପାୟର ପ୍ରାଣନାଥ ଜେନ ଓ ଦେବବ୍ରତ ଦାସ ପରିଚାଳନା କରିଥିଲେ। ଭାଷ୍ୟକାର ଥିଲେ ଯଦୁନାଥ ଜେନା, ରାଜେଶ ଠାକୁର ଓ ବାସୁଦେବ ଜେନା। ଅକ୍ଷୟ ଜେନା, ବିଶ୍ୱନାଥ ଜେନା ଓ ଦୀପ୍ତିକାନ୍ତ ଖଟୁଆ ସ୍କୋରର ଦାୟିତ୍ୱ ନିର୍ବାହ କରିଥିଲେ। ଅଖିଳରାମ ଜେନାଙ୍କ ପୌରୋହିତ୍ୟରେ ପୁରସ୍କାର ବିତରଣ ସଭା ଅନୁଷ୍ଠିତ ହୋଇଥିଲା। ଏଥିରେ ମୁଖ୍ୟ ଅତିଥି ଭାବେ ସୋର ବିଧାୟକ ପର୍ଶୁରାମ ଧଡ଼ା ଚାମ୍ପିୟନ ଦଳକୁ ଟ୍ରଫି ସହିତ ୨୫ ହଜାର ଟଙ୍କା ପ୍ରଦାନ କରିଥିଲେ। ସମ୍ମାନିତ ଅତିଥି ସରପଞ୍ଚ ଶାନ୍ତିଲତା ବେହେରା ରନର୍ସ ଅପ୍ ଟିମକୁ ଟ୍ରଫି ଓ ୧୫ ହଜାର ଟଙ୍କା ଦେଇଥିଲେ। ନବୋଦୟ ବିଦ୍ୟାଳୟ ଅଧ୍ୟକ୍ଷ ସତ୍ୟବ୍ରତ ସିହ୍ନା ମ୍ୟାନ୍ ଅଫ୍ ଦି ମ୍ୟାଚ୍ଙ୍କୁ ୧ହଜାର ଏବଂ ବି.କେ.ଆଟର୍ସ ସଭାପତି ଗୋଲକ ଚନ୍ଦ୍ର ପାତ୍ର ମ୍ୟାନ୍ ଅଫ୍ ଦି ସିରିଜ ରୋନାଲ୍ଡ ଦାସଙ୍କୁ ୩ ହଜାର ଟଙ୍କା ପ୍ରଦାନ କରିଥିଲେ। ଖେଳକୁ ଶକ୍ତିସ୍ବରୂପ ଦାସ, ବୀରେନ୍ଦ୍ର ଜେନା, ମହେନ୍ଦ୍ର ଦେ, ଗଜେନ୍ଦ୍ର ଜେନା, ଆକାଶ ଜେନା, ଅଜୟ ମଲ୍ଲିକ, ପୂର୍ଣ୍ଣଚନ୍ଦ୍ର ଜେନା, ତପନ କଅଁର, ମୁକ୍ତିକାନ୍ତ ଜେନା, ଚିନ୍ମୟ କୁମାର ପ୍ରଧାନ, ମୁରଲୀଧର ଜେନା, ଶ୍ରୀକାନ୍ତ ମଲ୍ଲିକ, ପ୍ରଶାନ୍ତ ଜେନା ପ୍ରମୁଖ ପରିଚାଳନା କରିଥିଲେ।
