ଲକ୍ଷ୍ନୌ,୧୬।୧୨: ସମାଜବାଦୀ ପାର୍ଟି (ଏସପି)ର ରାଷ୍ଟ୍ରୀୟ ଅଧ୍ୟକ୍ଷ ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ଶୁକ୍ରବାର ସଂସଦର ସୁରକ୍ଷା ଉଲ୍ଲଂଘନ ଘଟଣାରେ ଶାସକ ଭାରତୀୟ ଜନତା ପାର୍ଟି ଉପରେ ବର୍ଷିଛନ୍ତି। ସେ କହିଛନ୍ତି ଭାଜପା ସୁରକ୍ଷା ବାହାନାରେ ଲୋକଙ୍କୁ ଭୟଭୀତ କରାଉଛି। ଏହା ବ୍ୟତୀତ ୟୁପିର ପୂର୍ବତନ ମୁଖ୍ୟମନ୍ତ୍ରୀ ମଧ୍ୟପ୍ରଦେଶରେ ଶିବରାଜ ସିଂ ଚୌହାନଙ୍କୁ ମୁଖ୍ୟମନ୍ତ୍ରୀ ନ କରିବାକୁ ନେଇ ଭାରତୀୟ ଜନତା ପାର୍ଟି ଉପରେ ମନ୍ତବ୍ୟ ଦେଇଛନ୍ତି।
ଶୁକ୍ରବାର କନ୍ନୌଜରେ ଖବରଦାତାମାନଙ୍କ ସହ କଥାବାର୍ତ୍ତା କରୁଥିବାବେଳେ ଅଖିଳେଶ ଯାଦବ ସଂସଦ ଗୃହରେ ସୁରକ୍ଷା ଅଭାବକୁ ନେଇ ଭାଜପାକୁ ଟାର୍ଗେଟ୍ କରିଛନ୍ତି। ସେ କହିଛନ୍ତି ଯେ ସୁରକ୍ଷା ନାମରେ ଭାଜପା ଲୋକଙ୍କୁ ଭୟଭୀତ କରିବାକୁ ଚାହୁଁଛି। ଯାଦବ ଅଭିଯୋଗ କରିଛନ୍ତି, ପ୍ରଧାନମନ୍ତ୍ରୀଙ୍କ ସ୍ବପ୍ନ ପ୍ରୋଜେକ୍ଟରେ ଖରାପ ସୁରକ୍ଷା ବ୍ୟବସ୍ଥା ଏକ ଷଡଯନ୍ତ୍ର, ସରକାର ଏହି ବାହାନାରେ ଲୋକଙ୍କୁ ଭୟଭୀତ କରିବାକୁ ପ୍ରସ୍ତୁତ ହେଉଛନ୍ତି।
ବିରୋଧୀ ଦଳର ଇଣ୍ଡିଆ ମେଣ୍ଟ ଉପରେ ପୂର୍ବତନ ମୁଖ୍ୟମନ୍ତ୍ରୀ କହିଛନ୍ତି , ବିଧାନସଭା ନିର୍ବାଚନର ଫଳାଫଳ ସହ ମିଳିତ ମଞ୍ଚ ଅଧିକ ଶକ୍ତିଶାଳୀ ହୋଇଛି ଏବଂ ମୁଁ ଆସନ୍ତା ଲୋକ ସଭା ନିର୍ବାଚନରେ ଭାଜପା ବିରୋଧରେ ଏକଜୁଟ ହେବାକୁ ସମସ୍ତ ଦଳଙ୍କୁ କହିବି। ରାଜ୍ୟର ସମସ୍ତ ୮୦ଟି ଆସନରେ ଭାଜପାକୁ ପରାସ୍ତ କରିବାକୁ ଚେଷ୍ଟା କରାଯିବ।
