ଭବାନୀପାଟଣା,୧୮।୩(ସ୍ବ.ପ୍ର.): ଖୁବଶୀଘ୍ର କଳାହାଣ୍ଡି ଜିଲାର ବହୁ ପ୍ରତୀକ୍ଷିତ ଉତ୍କେଲା ଏୟାରଷ୍ଟ୍ରିପ୍ରୁ ବିମାନ ଚଳାଚଳ ଆରମ୍ଭ ହେବ। ସରକାରଙ୍କ ଉଡାଣ ଯୋଜନାରେ ଏହାର ଭିଭିଭୂମି ପ୍ରସ୍ତୁତି ଶେଷ ହୋଇଛି। ଶୁକ୍ରବାର ଏହାର ପରିଦର୍ଶନ କରି ସମୀକ୍ଷା କରିଛନ୍ତି ଡିଜିସିଏର ୫ ଜଣିଆ ସ୍ବତନ୍ତ୍ର ଟିମ୍। ଏହି ଟିମ୍ ସମୀକ୍ଷା ପରେ ବିମାନ ଉଡାଣ ପାଇଁ ଲାଇସେନ୍ସ ମିଳିବ ବୋଲି ଜଣାପଡିଛି।
ଉତ୍କେଲା ଏୟାରଷ୍ଟ୍ରିପ୍କୁ ଉଡାଣ ଯୋଜନାର ଚତୁର୍ଥ ପର୍ଯ୍ୟାୟରେ ସାମିଲ କରାଯାଇଥିଲା। ଆବଶ୍ୟକ ଭିତ୍ତିଭୂମିର ପାଇଁ ଅନୁମତି ମିଳିବାରୁ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। କେନ୍ଦ୍ର ଓ ରାଜ୍ୟ ସରକାରଙ୍କ ପ୍ରତିନିଧିଙ୍କ ସହ ବେସରକାରୀ ବିମାନ ଚଳାଚଳ ସମ୍ପୃକ୍ତ କର୍ତ୍ତୃପକ୍ଷ ପର୍ଯ୍ୟାୟକ୍ରମେ ନିର୍ମାଣ କାର୍ଯ୍ୟର ଅନୁଧ୍ୟାନ କରିଥିଲେ। ଉଡାଣ ଯୋଜନାରେ ୧୬ କୋଟି ବ୍ୟୟରେ ଭିତ୍ତିଭୂମି ପ୍ରସ୍ତୁତ ସରିଥିବା ବେଳେ ୨-ବି ଲାଇସେନ୍ସ ପାଇଁ ପଦକ୍ଷେପ ନିଆଯାଇଛି। ଏହାସହ ବଡ଼ ଏୟାରପୋର୍ଟ ପାଇଁ ୫୫ କୋଟି ବ୍ୟୟର ଟେଣ୍ଡର ପରେ ସମ୍ପ୍ରସାରଣ କାର୍ଯ୍ୟ ଆରମ୍ଭ ହୋଇଛି। ଏହାର ଭିତ୍ତିଭୂମିରେ ରନୱେ ସମ୍ପ୍ରସାରଣ, ଟର୍ମିନାଲ ବିଲଡିଂ, ଷ୍ଟାଫ କ୍ବାର୍ଟର୍ସ, ବାରାକ, ଅଗ୍ନିଶମ କାର୍ଯ୍ୟାଳୟ ଭଳି ଅନ୍ୟାନ୍ୟ ଆନୁଷାଙ୍ଗିକ ନିର୍ମାଣ କାର୍ଯ୍ୟ ଆରମ୍ଭ ହୋଇଯାଇଛି। ୨-ବି କାଟଗୋରିରେ ଡିଜିସିଏ ନୂଆଦିଲ୍ଲୀରେ ବିମାନ ଚଳାଚଳ ଲାଇସେନ୍ସ ପାଇଁ ଆବେଦନ କରାଯାଇଥିଲା। ସରକାରଙ୍କ ବାଣିଜ୍ୟ ଓ ପରିବହନ ବିଭାଗ ଅତିରିକ୍ତ ସଚିବ, କଳାହାଣ୍ଡି ଜିଲାପାଳ, ପୂର୍ତ୍ତ ବିଭାଗ, ଅତିରିକ୍ତ ପୋଲିସ ମହାନିର୍ଦ୍ଦେଶକଙ୍କୁ ଆବଶ୍ୟକ କର୍ମଚାରୀ ଡିଜିସିଏ ନିୟମ ଅନୁଯାୟୀ ଯୋଗାଇବା ପାଇଁ ଚିଠି ଯୋଗେ ସୂଚନା ଦିଆଯାଇଥିଲା। ଡିଜିସିଏର ଅନୁମତି ପରେ ଏଠାରେ ବିମାନ ସେବା ଆରମ୍ଭ ହେବ। ତେଣୁ ଆସନ୍ତା ଏପ୍ରିଲରୁ ବିମାନ ଉଡାଣ ନେଇ ଜିଲା ପ୍ରଶାସନ ସୂଚନା ଦେଇଛି।
