ଭୁବନେଶ୍ୱର, ୨୬ା୩(ବ୍ୟୁରୋ): ବିଧାନସଭା ବଜେଟ୍ ଅଧିବେଶନ ଆରମ୍ଭ ହେବା ପୂର୍ବରୁ ବିଜେଡିର ବିଧାୟକ ଦଳ ବୈଠକ ବିଧାନସଭାର ୫୪ ନମ୍ବର ପ୍ରକୋଷ୍ଠରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଛି। ଅଧିବେଶନ ସମୟରେ ବିରୋଧୀ ଦଳର କିଭଳି ମୁକାବିଲା କରାଯିବ ସେନେଇ ମୁଖ୍ୟତଃ ଆଲୋଚନା କରାଯାଇଛି। ବିଜେଡି ବିଧାୟକ ଦଳ ବୈଠକ ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ କହିଛନ୍ତି, ବିରୋଧୀ ଦଳ ଯେଉଁ ପ୍ରସଙ୍ଗ ସବୁ ଉଠାଇବେ ସରକାର ତାହା ଉପରେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି। ତେବେ ସଂଘୀୟ ବ୍ୟବସ୍ଥାରେ କେନ୍ଦ୍ର ସରକାରଙ୍କ ଦ୍ୱାରା ଓଡ଼ିଶା ପ୍ରତି ଅବହେଳା, ତୈଳଦର ଓ ଅତ୍ୟାବଶ୍ୟକ ସାମଗ୍ରୀ ଦରବୃଦ୍ଧି ପ୍ରସଙ୍ଗକୁ ଗୃହରେ ବିଜେଡି ଉଠାଇବ ବୋଲି ସେ କହିଛନ୍ତି। ତେବେ ରାଜ୍ୟରେ ବିଭିନ୍ନ ସ୍ଥାନରେ ଘଟୁଥିବା ହିଂସା କଥାକୁ ନେଇ ବିରୋଧୀ ଘେରିବା ଲାଗି ରଣନୀତି କରୁଥିବା ବେଳେ ବିଜେଡି ମଧ୍ୟ ଅନୁରୂପ ଭାବେ ବାଜପା ଶାସିତ ରାଜ୍ୟର ଉଦାହରଣ ଦେଇ ସେହି କଥାକୁ କାଉଣ୍ଟର କରିବ। ସେହିପରି ପଞ୍ଚାୟତ ନିର୍ବାଚନରେ ବିଜେଡି ପାଇଥିବା ଏକପାଖିଆ ସଫଳତା କଥାକୁ ମଧ୍ୟ ଶାସକ ଦଳ ଆଗକୁ ଆଣି ବିରୋଧୀଙ୍କ ମୁକାବିଲା ଆହୁରି ଭଲ ଭାବେ କରିପାରିବ ବୋଲି ଆଶା ରଖିଛି। ଅନ୍ୟପଟେ ପୌର ଭୋଟ୍ ଫଳାଫଳ ଆସିବା ପରେ ଆହୁରି ଶାସକ ଦଳକୁ ତାହା ସୁହାଇବ। ଅନ୍ୟପଟେ ନିକଟରେ ପ୍ରଧାନମନ୍ତ୍ରୀ, କେନ୍ଦ୍ରମନ୍ତ୍ରୀମାନେ ବିଭିନ୍ନ ସମୟରେ ରାଜ୍ୟ ସରକାରଙ୍କୁ କରିଥିବା ପ୍ରଶଂସା ସମ୍ପର୍କରେ କହି ବିଜେଡି ବିରୋଧରେ ଭାଜପା ଆଣୁଥିବା ଅଭିଯୋଗର ମୁକାବିଲା କରିବା ପାଇଁ ଶାସକ ଦଳ ଆଲୋଚନା କରିଥିବା ଜଣାପଡିଛି। ଏହି ବୈଠକରେ ବିଜେଡିର ସମସ୍ତ ବିଧାୟକ ଭାଗ ନେଇଥିଲେ।
