ରାୟପୁର,୧୧।୧୦: ଛତିଶଗଡର ମୁଖ୍ୟମନ୍ତ୍ରୀ ଭୁପେଶ ବାଘେଲଙ୍କ ନିକଟରେ କ୍ୟାଣ୍ଡି କ୍ରସ ଖେଳୁଥିବା ଫଟୋ ଶେୟାର କରି ସୋସିଆଲ ମିଡିଆରେ ଭାଜପା ତାଙ୍କୁ ଟାର୍ଗେଟ୍ କରିଛି। ଏହା ପରେ ବାଘେଲ ଭାଜପାକୁ କଡ଼ା ଜବାବ ଦେଇ କହିଛନ୍ତି, ମୁଁ ଆମ ରାଜ୍ୟର ପାରମ୍ପରିକ ଖେଳ ଏବଂ କ୍ୟାଣ୍ଡି କ୍ରସ ଖେଳିବା ଜାରି ରଖିବି। କାରଣ ମୁଁ ଜାଣିଛି ଛତିଶଗଡର ଲୋକମାନେ କାହାକୁ ଚୟନ କରିବାକୁ ଯାଉଛନ୍ତି। ବାଘେଲ ଏଠାରେ ଅଟକି ନାହାଁନ୍ତି ବରଂ ଗୋଟିଏ ପରେ ଗୋଟିଏ ଟୁଇଟ କରି ଭାଜପାକୁ ଜବାବ ଦେଇଛନ୍ତି।
ବାଘେଲ କହିଛନ୍ତି, କ୍ୟାଣ୍ଡି କ୍ରସ ଖେଳିବା ଅପରାଧ କି? ମୁଁ ଚାପରେ ରହେ ନାହିଁ। ନିର୍ବାଚନ ଆସିବା ମାତ୍ରେ ଭାଜପା ଲୋକ ସକ୍ରିୟ ହୋଇଯାଆନ୍ତି। ମୁଁ ପାଞ୍ଚ ବର୍ଷ କାର୍ଯ୍ୟ କଲି ଏବଂ ଜନସାଧାରଣଙ୍କ ମଧ୍ୟରେ ରହିଲି, ଯେହେତୁ ନିର୍ବାଚନ ଆସୁଛି ମୋର ଚାପ ଆହୁରି ହ୍ରାସ ପାଇବ। ଖାଇବା ପରେ ମୁଁ କ୍ୟାଣ୍ଡି କ୍ରସ ଖେଳେ। ମହାରାଜ ଜୀ (ଟି.ଏସ ସିଂ ଦେବ) ମୋତେ ରାତ୍ରି ଭୋଜନ ପାଇଁ ନିମନ୍ତ୍ରଣ କରିଥିଲେ। ସେଠାରୁ ଆମେ ବୈଠକକୁ ଗଲୁ। ମୁଁ କାରରେ କ୍ୟାଣ୍ଡି କ୍ରସ ଖେଳୁଥିଲ। ବୈଠକ ପୂର୍ବରୁ ଖେଳୁଥିଲି ଏବଂ ଏହା ଆରମ୍ଭ ହେବା ମାତ୍ରେ ବନ୍ଦ କରିଦେଇଥିଲି। କ୍ୟାଣ୍ଡି କ୍ରସ ଖେଳିବାରେ ଅସୁବିଧା କ’ଣ ବୋଲି ସେ ପ୍ରଶ୍ନ କରିଛନ୍ତି।
ଭୁପେଶ ବାଘେଲ ପୂର୍ବରୁ ଟୁଇଟରରେ କ୍ୟାଣ୍ଡି କ୍ରସ ଖେଳିବାର ଫଟୋ ଶେୟାର କରି ଭାଜପା ଉପରେ ଆକ୍ରମଣ କରିଥିଲେ। ସେ କ୍ୟାପସନରେ ଲେଖିଛନ୍ତି, ପୂର୍ବରୁ ଭାଜପାର ଆପତ୍ତି ଥିଲା ଯେ ମୁଁ କାହିଁକି ଗାଡି ଚଳାଉଛି, ମୁଁ କାହିଁକି ଗିଲି ଦଣ୍ଡା ଖେଳୁଛି, ଗତକାଲି ଏକ ବୈଠକ ପୂର୍ବରୁ କ୍ୟାଣ୍ଡି କ୍ରସ ଖେଳୁଥିବା ମୋର ଏକ ଫଟୋ ମିଳିଛି। ଏହାକୁ ନେଇ ମଧ୍ୟ ଭାଜପାର ଆପତ୍ତି ରହିଛି। କ୍ୟାଣ୍ଡି କ୍ରସ ମଧ୍ୟ ମୋର ପ୍ରିୟ ଖେଳ। ମୁଁ ଏହି ଖେଳରେ ବିଭିନ୍ନ ସ୍ତରକୁ ଭଲ ଅତିକ୍ରମ କରିଛି, ତାହା ମଧ୍ୟ ଜାରି ରହିବ।
