କରାଚୀ, ୨୩ା୧୧ (ପି.ଟି.)- ଉଦ୍ଘାଟନୀ ଲଙ୍କାନ୍ ପ୍ରିମିୟର ଲିଗ୍ (ଏଲପିଏଲ୍) ଟି୨୦ ଟୁର୍ନାମେଣ୍ଟରେ ପାକିସ୍ତାନର ପୂର୍ବତନ ଅଲରାଉଣ୍ଡର ଶାହିଦ ଆଫ୍ରିଦୀ ଗାଲେ ଗ୍ଲାଡିଏଟର୍ସ ଫ୍ରାଞ୍ଚାଇଜ୍ର ଅଧିନାୟକତ୍ୱ କରିବେ। ଏହି ଇଭେଣ୍ଟ ନଭେମ୍ବର ୨୬ରୁ ଡିସେମ୍ବର ୧୬ପର୍ଯ୍ୟନ୍ତ ଶ୍ରୀଲଙ୍କାର ହାମ୍ବାନଟୋଟାଠାରେ ଖେଳାଯିବ। ସୂଚନାଯୋଗ୍ୟ, ପାକିସ୍ତାନୀ ବିଜନେସମ୍ୟାନ ନଦୀମ ଓମାର ହେଉଛନ୍ତି ଗାଲେ ଗ୍ଲାଡିଏଟର୍ସ ଟିମ୍ର ମାଲିକ। ଆଫିଦୀଙ୍କୁ ଶନିବାର ଏହି ଦଳର ଅଧିନାୟକ ଭାବେ ମନୋନୀତ କରାଯାଇଛି। ନଦୀମ ଓମାର ଆହୁରି ମଧ୍ୟ ପାକିସ୍ତାନ ସୁପର ଲିଗ୍ (ପିଏସ୍ଏଲ୍)ରେ ଲୋକପ୍ରିୟ କ୍ୱେଟା ଗ୍ଲାଡିଏଟର୍ସ ଫ୍ରାଞ୍ଚାଇଜ୍ର ମାଲିକ। ଓଭାର ପ୍ରଥମେ ସର୍ଫରାଜ ଅହମ୍ମଦଙ୍କୁ ଗାଲେ ଗ୍ଲାଡିଏଟର୍ସର ଅଧିନାୟକ କରିଥିଲେ। ମାତ୍ର ଏହି ଉଇକେଟକିପର ବ୍ୟାଟ୍ସମ୍ୟାନ ନ୍ୟୁଜିଲାଣ୍ଡ ଟୁର୍ ପାଇଁ ପାକିସ୍ତାନ ଦଳରେ ସ୍ଥାନ ପାଇଥିବାରୁ ସେ ତାଙ୍କ ନିଷ୍ପତ୍ତିରେ ପରିବର୍ତ୍ତନ କରିଥିଲେ। ଆଫ୍ରିଦୀ ହେଉଛନ୍ତି ଦଳର ସବୁଠାରୁ ବରଷ୍ଠେ ଖେଳାଳି। ଅଧିନାୟକ ହିସାବରେ ତାଙ୍କର ଅଭିଜ୍ଞତା ମଧ୍ୟ ରହିଛି। ତେଣୁ ସେ ବର୍ତ୍ତମାନ ଦଳର ଅଧିନାୟକ ଦାୟିତ୍ୱ ତୁଲାଇବେ ବୋଲି ଓଭାର କହିଛନ୍ତି। ଉଦ୍ଘାଟନୀ ଏଲପିଏଲ୍ କୋଭିଡ୍ ସମୟରେ ଅନୁଷ୍ଠିତ ହେଉଥିବାରୁ ଟୁର୍ନାମେଣ୍ଟ ଆରମ୍ଭ ପୂର୍ବରୁ ସମସ୍ୟା ଦେଖାଯାଇଛି। ବହୁ ଜଣାଶୁଣା ଅନ୍ତର୍ଜାତୀୟ ଖେଳାଳି ବିଭିନ୍ନ କାରଣରୁ ଇଭେଣ୍ଟରୁ ଓହରିଯାଇଛନ୍ତି। ସେମାନଙ୍କ ମଧ୍ୟରେ ରହିଛନ୍ତି କ୍ରିସ୍ ଗେଲ୍, ଫାଫ୍ ଡୁ’ପ୍ଲେସି, ଲିଆମ ପ୍ଲଙ୍କେଟ, ଡେଭିଡ୍ ମଲାନ, ଲସିଥ ମାଲିଙ୍ଗା, କମରାନ ଅକମଲ, ଓ୍ବାହାବ ରିଆଜ୍, ମହମ୍ମଦ ହାଫିଜ୍ ଓ ସର୍ଫରାଜ। ଲିଗ୍ରେ ଯେଉଁ ପାକିସ୍ତାନୀ ଖେଳାଳିମାନଙ୍କ ଆକ୍ସନ ଦେଖିବାକୁ ମିଳିବ ସେମାନଙ୍କ ମଧ୍ୟରେ ରହିଛନ୍ତି ସୋହେଲ ତନଭୀର, ମହମ୍ମଦ ଅମିର, ଏହସାନ ଅଲୀ, ଆଜାମ ଖାଁ, ଉସ୍ମାନ ସିନଓ୍ବାରୀ ଏବଂ ସୋଏବ ମଲିକ। କଲମ୍ବୋରେ ପହଞ୍ଚତ୍ବା ପରେ ବାମହାତୀ ପେସ୍ ବୋଲର ତନଭୀର ଓ କାନାଡା ବ୍ୟାଟ୍ସମ୍ୟାନ ରବିନ୍ଦରପାଲ ସିଂ କୋଭିଡ୍ ଟେଷ୍ଟରେ ପଜିଟିଭ ହୋଇଛନ୍ତି। ଉଦ୍ଘାଟନୀ ଏଲ୍ପିଏଲ୍ ଟ୍ରଫି ପାଇଁ ୫ ଫ୍ରାଞ୍ଚାଇଜ୍ ଜାଫନା ଷ୍ଟାଲିଅନ୍ସ, କାଣ୍ଡି ଟସ୍କର୍ସ, ଗାଲେଗ୍ଲାଡିଏଟର୍ସ, କଲମ୍ବୋ କିଙ୍ଗ୍ସ ଏବଂ ଦାମ୍ବୁଲା ହକ୍ସ ମଧ୍ୟରେ ମୁକାବିଲା ହେବ।
