ନୂଆଦିଲ୍ଲୀ,୨୧ା୨(ପି.ଟି.): ଜଣେ ଶିଶୁକୁ ପୋଷ୍ୟ ସନ୍ତାନ ରୂପେ ଗ୍ରହଣ କରିବାର ଅଧିକାରକୁ ଭାରତୀୟ ସମ୍ବିଧାନର ଅନୁଚ୍ଛେଦ ୨୧ ଅଧୀନକୁ ଆଣି ମୌଳିକ ଅଧିକାର ବୋଲି ଦାବି କରାଯାଇପାରିବ ନାହିଁ। କେଉଁ ପିଲାକୁ ପୋଷ୍ୟ ଭାବେ ଗ୍ରହଣ କରିବେ ତାହା ଚୟନ କରିବା ଅଧିକାର ମଧ୍ୟ ଭାବୀ ମାତାପିତାଙ୍କର ନାହିଁ ବୋଲି ଦିଲ୍ଲୀ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି।
ଦୁଇ କିମ୍ବା ତଦୂର୍ଦ୍ଧ୍ୱ ଶିଶୁଙ୍କ ମା’ବାପା କେବଳ ଦିବ୍ୟାଙ୍ଗ ଶିଶୁଙ୍କୁ ପୋଷ୍ୟ ରୂପେ ଗ୍ରହଣ କରିପାରିବେ ବୋଲି ଜୁଭେନାଇଲ୍ ଜଷ୍ଟିସ୍ (କେୟାର ଆଣ୍ଡ୍ ପ୍ରୋଟେକ୍ସନ ଅଫ୍ ଚିଲ୍ଡ୍ରେନ୍)-ସିଏଆର୍ଏ ଆକ୍ଟ, ୨୦୧୫ରେ ନିୟମ ରହିଛି। ଗତବର୍ଷ ସିଏଆର୍ଏ ପକ୍ଷରୁ ଜାରି ପୋଷ୍ୟ ନିୟମାବଳୀ, ୨୦୨୨ରେ ଷ୍ଟିୟରିଂ କମିଟି ରିସୋର୍ସ ଅଟରିଟି ମଧ୍ୟ ଏହି ବିଷୟ ଉଲ୍ଲେଖ କରିଥିଲେ। ଏହି ନିୟମକୁ ସମ୍ଭାବ୍ୟ ପୋଷ୍ୟ ମାତାପିତା (ପିଏପି)ମାନେ ଦିଲ୍ଲୀ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ। ଜଷ୍ଟିସ୍ ସୁବ୍ରମଣ୍ୟମ୍ ପ୍ରସାଦ ଏସମ୍ପର୍କିତ ଏକାଧିକ ଆବେଦନର ଶୁଣାଣି କରି କହିଛନ୍ତି, ଜିଲାପାଳ ପୋଷ୍ୟ ସନ୍ତାନ ଗ୍ରହଣ ଉପରେ ଚୂଡ଼ାନ୍ତ ନିର୍ଦ୍ଦେଶ ନ ଦେବା ପର୍ଯ୍ୟନ୍ତ ଏକ ନିର୍ଦ୍ଦିଷ୍ଟ ଶିଶୁକୁ ପୌଷ୍ୟ ରୂପେ ଗ୍ରହଣ କରିବା ପାଇଁ ଅନୁମତି ପ୍ରଦାନ କରାଯାଇପାରିବ ନାହିଁ। ଏହି ପ୍ରକ୍ରିୟା ପିଲାମାନଙ୍କ ମଙ୍ଗଳ ପାଇଁ ଉଦ୍ଦିଷ୍ଟ। ପିଏପିମାନଙ୍କ ଇଚ୍ଛା ବା ଆଗ୍ରହକୁ ଏଥିରେ ଅଗ୍ରାଧିକାର ଦିଆଯାଇପାରିବ ନାହିଁ। ସେମାନେ କାହାକୁ ପୌଷ୍ୟ ଭାବେ ଗ୍ରହଣ କରିବାକୁ ଚାହୁଁଛନ୍ତି, ସେନେଇ ଦାବି କରିପାରିବେ ନାର୍ହି ବୋଲି ନିକଟରେ ଦିଲ୍ଲୀ ହାଇକୋର୍ଟ ଏକ ରାୟ ଦେଇଛନ୍ତି। ଜଷ୍ଟିସ୍ ପ୍ରସାଦ ଆହୁରି କହିଛନ୍ତି, ପୋଷ୍ୟ ଗ୍ରହଣ ପାଇଁ ଦୀର୍ଘ ସମୟ ଧରି ଅପେକ୍ଷା କରିବାକୁ ପଡ଼ୁଛି। ଅନେକ ନିଃସନ୍ତାନ ଦମ୍ପତି ଏବଂ ଗୋଟିଏ ପିଲାର ମାତାପିତା ଜଣେ ସ୍ବାଭାବିକ ମାନସିକତାର ଶିଶୁକୁ ପୋଷ୍ୟ ରୂପେ ଗ୍ରହଣ କରିବା ପାଇଁ ଚାହୁଁଛନ୍ତି। ଏଥିଯୋଗୁ ଜଣେ ଭିନ୍ନକ୍ଷମ ଶିଶୁର ପୋଷ୍ୟ ଗ୍ରହଣ ସମ୍ଭାବନା କମିଯାଉଛି। ତେଣୁ ଏଭଳି ଶିଶୁଙ୍କୁ ଅଧିକରୁ ଅଧିକ ଆପଣାଯିବାକୁ ସୁନିଶ୍ଚିତ କରାଯିବା ଏହି ଆଇନର ଉଦ୍ଦେଶ୍ୟ ବୋଲି ବିଚାରପତି ପ୍ରସାଦ ସ୍ପଷ୍ଟ କରିଛନ୍ତି। ଏଥିସହ ସେ ପିଏପିମାନଙ୍କ ପିଟିଶନଗୁଡ଼ିକୁ ଖାରଜ କରିଦେଇଛନ୍ତି। ଆବେଦନକାରୀମାନେ ନ୍ୟସ୍ତସ୍ବାର୍ଥ ସମ୍ବଳିତ ଦାବି କରୁଛନ୍ତି, ଯାହାକି ଗ୍ରହଣୀୟ ନୁହେଁ ବୋଲି ବିଚାରପତି କହିଛନ୍ତି।
