ପଟ୍ଟାଙ୍ଗି୨୯।୧୧(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନ କୋଟିଆ ପଞ୍ଚାୟତରେ ରହିଛି ଦେଓମାଳି ପର୍ଯ୍ୟଟନ ସ୍ଥଳ। ଏଠାକୁ ଆସୁଥିବା ପର୍ଯ୍ୟଟକଙ୍କ ରହିବାର ଏବଂ ସୁରକ୍ଷା ପାଇଁ ପ୍ରଶାସନ ପକ୍ଷରୁ ତମ୍ବୁର ବ୍ୟବସ୍ଥା କରାଯାଇଛି। ଏନେଇ ବ୍ଲକ ପ୍ରଶାସନ ପକ୍ଷରୁ ପୂର୍ବରୁ ଗଣମାଧ୍ୟମ ଜରିଆରେ ଅବଗତ କରାଯାଇଛି। ହେଲେ ପର୍ଯ୍ୟଟକମାନେ ଏହାକୁ ଅଣଦେଖା କରି ନିଜେ କିମ୍ବା ଘରୋଇ ତମ୍ବୁ ଧରି ପର୍ଯ୍ୟଟନ ସ୍ଥଳକୁ ଆସୁଛନ୍ତି। ଫଳରେ ପ୍ରଶାସନର ନିୟମକୁ ଖୋଲାଖୋଲି ଉଲଂଘନ କରାଯାଉଛି।
ଏହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଏକ କଟକଣା ଜାରି କରାଯାଇଛି। ପର୍ଯ୍ୟଟକଙ୍କ ପାଇଁ ପ୍ରଶାସନ ପକ୍ଷରୁ ତମ୍ବୁର ବ୍ୟବସ୍ଥା କରାଯାଇଥିବା ପୁଣି ଅବଗତ କରାଯାଇଛି। ଏପରିକି ପର୍ଯ୍ୟଟନସ୍ଥଳକୁ ତମ୍ବୁ ନ ଆଣିବା ପାଇଁ କଟକଣା ଜାରି କରାଯାଇଛି। ନିୟମ ଉଲଘଂନ କଲେ ଜରିମାନା ଦେବାକୁ ପଡିବ ବୋଲି ଏକ ନୋଟିସ ନଂ.୯୦୯୪/୨୪ ଅନୁଯାଇ ପର୍ଯ୍ୟଟକଙ୍କ ଉଦ୍ଦେଶ୍ୟରେ ଜାରି କରାଯାଇଥିବା ଉପଜିଲାପାଳ ବେଣୁଧର ଶବର କହିଛନ୍ତି।
ସୂଚନା ମୁତାବକ, ଦେଓମାଳି ପର୍ଯ୍ୟଟନସ୍ଥଳରେ ପର୍ଯ୍ୟଟକଙ୍କ ପାଇଁ କମ୍ ଦାମ୍ରେ ପ୍ରଶାସନ ପକ୍ଷରୁ ତମ୍ବୁ ଯୋଗାଇ ଦେବା ସହ ପାଣି ବୋତଲ, ସ୍ନାକ୍ସ ଆଦି ଖାଦ୍ୟ ଯୋଗାଇ ଦେବା ନେଇ ବ୍ୟବସ୍ଥା ହୋଇଛି। ଏପରିକି ବ୍ଲକ ପ୍ରଶାସନ ଓ ପଞ୍ଚାୟତ କାର୍ଯ୍ୟାଳୟର ମିଳିତ ସହଯୋଗରେ ଗତ ୧ ତାରିଖରୁ ଏହି ବ୍ୟବସ୍ଥା ହୋଇଛି।
ହେଲେ ନିୟମକୁ କିଛି ପର୍ଯ୍ୟଟକ ଖିଲାପ କରୁଥିବା ଅଭିଯୋଗ ପାଇ କୋଟିଆ ସରପଞ୍ଚ ଲିୟୁ ଗେମେଲ ଜିଲାପାଳ ଭି.କିର୍ତ୍ତି ଭାସନଙ୍କୁ ଭେଟି ଘଟଣା ସମ୍ପର୍କରେ ଅବଗତ କରାଇଥିଲେ। ଏହାକୁ ଦୃଷ୍ଟିରେ ରଖି ଜିଲା ପ୍ରଶାସନ ବର୍ତ୍ତମାନ ଏହି ପଦକ୍ଷେପ ଗ୍ରହଣ କରିଛି। ନିୟମ ଉଲଘଂନ କଲେ ପର୍ଯ୍ୟଟକଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରି ଜରିମାନା ସ୍ବରୁପ ୫୦୦୦ ଟଙ୍କା ଆଦାୟ କରାଯିବ ବୋଲି ନୋଟିସରେ ଉଲ୍ଲେଖ କରାଯାଇଛି।
