ଶଟ୍‌ଡାଉନ୍‌ରେ ଯୋଡ଼ିହେଲା ଶୁକ୍ରବାର

ତାଳଚେର,୨୩ା୪(ନି.ପ୍ର.) ଅନୁଗୋଳ ଜିଲାରେ ଦୈନିକ କରୋନା ସଂକ୍ରମଣ ଏବେ ଦ୍ୱିଶତକ ମୁହାଁ । ଲଗାତର ୩ ଦିନ ଧରି ଜିଲାରୁ ଶତାଧିକ ପଜିଟିଭ୍‌ ଚିହ୍ନଟ ହେଉଛନ୍ତି। ବିଶେଷକରି ତାଳଚେର ଓ ଅନୁଗୋଳ ପୌରାଞ୍ଚଳରେ ସଂକ୍ରମଣ ବଢ଼ୁଥିବା ଲକ୍ଷ୍ୟ କରାଯାଉଛି। ଏହାକୁ ନେଇ ଅନୁଗୋଳ ଓ ତାଳଚେର ପୌର ପ୍ରଶାସନର ଚିନ୍ତା ବଢ଼ିଯାଇଛି। କରୋନା ଚେନ୍‌ ଭାଙ୍ଗିବାକୁ ଉଭୟ ପୌରପାଳିକା ପକ୍ଷରୁ ଗୁରୁବାର ନୂଆ କଟକଣା ଲଗାଯାଇଛି। ସରକାରଙ୍କ ପକ୍ଷରୁ ଘୋଷଣା କରାଯାଇଥିବା ସପ୍ତାହାନ୍ତ ଶଟ୍‌ଡାଉନ୍‌ ଆସନ୍ତା ଶନିବାର ଓ ରବିବାର ଲାଗୁ ହେବାକୁ ଥିବାବେଳେ ଅନୁଗୋଳ ଓ ତାଳଚେର ପୌରପାଳିକା ପକ୍ଷରୁ ଗୁରୁବାର ରାତି ୯ଟାରୁ ପୌରାଞ୍ଚଳର ସମସ୍ତ ଦୋକାନ ବଜାର ବନ୍ଦ ରଖିବାକୁ ନିର୍ଦ୍ଦେଶନାମା ଜାରି କରାଯାଇଛି। ତେଣୁ ଶନିବାର ଓ ରବିବାର ପରି ଶୁକ୍ରବାର ମଧ୍ୟ ଅନୁଗୋଳ ଏବଂ ତାଳଚେର ସହର ବନ୍ଦ ରହିବ। କେବଳ ସରକାରୀ ଅଫିସ, ବ୍ୟାଙ୍କ, ମେଡିସିନ ଷ୍ଟୋର ଖୋଲା ରହିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
ଗତ ୧୮ ତାରିଖରେ ଜିଲାରେ ୭୧ ଜଣ କରୋନା ପଜିଟିଭ୍‌ ଚିହ୍ନଟ ହୋଇଥିଲେ। ସେଥିରେ ତାଳଚେର ପୌରାଞ୍ଚଳର ୧୦ ଓ ବ୍ଲକର ୬ଜଣ ରହିଥିଲେ। ୧୯ ତାରିଖରେ ଜିଲାରୁ ୬୯ ପଜିଟିଭ୍‌ ବାହାରିଥିଲେ। କେବଳ ତାଳଚେର ପୌରାଞ୍ଚଳରୁ ୧୫ ଓ ବ୍ଲକରୁ ୧୫ ଜଣ ଚିହ୍ନଟ ହୋଇଥିଲେ। ୨୦ ତାରିଖରେ ଜିଲାରେ ପଜିଟିଭ୍‌ ସଂଖ୍ୟା ୧୦୬ ଥିବାବେଳେ ତାଳଚେର ପୌରାଞ୍ଚଳର ୧୦ ଓ ବ୍ଲକର ୨୦ ଜଣ ରହିଥିଲେ। ୨୧ ତାରିଖରେ ଜିଲାର ୧୩୮ ପଜିଟିଭ୍‌ଙ୍କ ମଧ୍ୟରୁ ତାଳଚେର ପୌରାଞ୍ଚଳରୁ ୨୪ ଓ ବ୍ଲକରୁ ୨୨ ଜଣ ସଂକ୍ରମିତ ଥିଲେ। ୨୨ ତାରିଖରେ ଜିଲାର ୧୫୦ କରୋନା ସଂକ୍ରମିତଙ୍କ ମଧ୍ୟରେ ତାଳଚେର ବ୍ଲକରୁ ୨୦ ଓ ପୌରାଞ୍ଚଳରୁ ୧୨ ଜଣ ରହିଛନ୍ତି। ସେହିପରି ଅନୁଗୋଳ ପୌରାଞ୍ଚଳରୁ ମଧ୍ୟ ଅଧିକ ସଂକ୍ରମିତ ବାହାରୁଛନ୍ତି। ତେଣୁ ଅନୁଗୋଳ ଓ ତାଳଚେର ପୌର ପ୍ରଶାସନ କଠୋର କଟକଣା ଲଗାଇବାକୁ ବାଧ୍ୟ ହୋଇଛି। ଆଗାମୀ ଦିନରେ ସ୍ଥିତି ନିୟନ୍ତ୍ରଣ ବାହାରକୁ ଯେପରି ନ ଯାଏ, ସେଥିପାଇଁ ଗୁରୁବାର ରାତି ୯ଟାରୁ ୨୬ ତାରିଖ ସୋମବାର ଭୋର୍‌ ୫ଟା ଯାଏ ଦୁଇ ପୌରାଞ୍ଚଳର ସମସ୍ତ ଦୋକାନ ବଜାର, ହୋଟେଲ ବନ୍ଦ ରଖିବାକୁ ଚିଠି କରାଯାଇଛି। ଅନୁଗୋଳ ପୌର ପ୍ରଶାସନ ପକ୍ଷରୁ ଚିଠି ନଂ. ୧୭୦୩/ ୨୨ା୪ା୨୦୨୧, ତାଳଚେର ପୌର ପ୍ରଶାସନ ପକ୍ଷରୁ ଚିଠି ନଂ. ୧୫୭୬/ ୨୨ା୪ା୨୦୨୧ରେ ଏହି ଘୋଷଣା କରାଯାଇଛି। ଏହି ସମୟରେ କେବଳ ଅତ୍ୟାବଶ୍ୟକ ଔଷଧ ଦୋକାନ, ସରକାରୀ କାର୍ଯ୍ୟାଳୟ, ବ୍ୟାଙ୍କ ଖୋଲା ରହିବ। ସେହିପରି ଚିଠି ନଂ. ୧୫୮୧/ ୨୨ା୪ା୨୦୨୧ରେ ତାଳଚେର ପୌରାଞ୍ଚଳ ୧୩ନଂ. ଓ୍ବାର୍ଡ ନବ ମିଶ୍ର କଲୋନିକୁ ଗୁରୁବାର ଅପରାହ୍ନ ୩ଟାଠାରୁ ୨୬ ତାରିଖ ସୋମବାର ଭୋର୍‌ ୫ଟା ପର୍ଯ୍ୟନ୍ତ କଣ୍ଟେନମେଣ୍ଟ ଜୋନ୍‌ ଘୋଷଣା କରାଯାଇଛି।

 

ଅଧିକ ସଂକ୍ରମିତ ସ୍ଥାନ ବନ୍ଦ କରାଯାଇଛି
ଜିଲାକୁ ଶଟ୍‌ଡାଉନ୍‌ କରାଯାଇ ନାହିଁ। ଅଧିକ ସଂକ୍ରମଣ ସଂଖ୍ୟା ଦେଖି ଅନୁଗୋଳ ଓ ତାଳଚେର ପୌରାପଳିକା, କିଶୋରନଗର, ବଅଁରପାଳ ଓ ଗୋଡ଼ିବନ୍ଧ ଅଞ୍ଚଳର କିଛି କ୍ଲଷ୍ଟର ବନ୍ଦ କରାଯାଇଛି। ଏହି ୮୦ ଘଣ୍ଟା ସମୟ ମଧ୍ୟରେ ସାନିଟାଇଜ୍‌, ଟେଷ୍ଟ ସଂଖ୍ୟା ବଢ଼ାଯିବ। ଡୋର୍‌ ଟୁ ଡୋର୍‌ ସ୍କ୍ରିନ୍‌ଙ୍ଗ କରାଯିବ।
-ସିଦ୍ଧାର୍ଥ ଶଙ୍କର ସ୍ବାଇଁ, ଜିଲାପାଳ, ଅନୁଗୋଳ

ସରକାରୀ ଅଫିସ, ବ୍ୟାଙ୍କ ଖୋଲା
ଶଟ୍‌ଡାଉନ ଘୋଷଣା ନୁହେଁ, କେବଳ ଗୁରୁବାର ରାତି ୯ଟାରୁ ଦୋକାନ ବଜାର ବନ୍ଦ କରାଯାଇଛି। ଶୁକ୍ରବାର ସରକାରୀ ଅଫିସ, ବ୍ୟାଙ୍କ ଖୋଲା ରହିବ। ଗୁରୁବାର ତାଳଚେର ପୌରାଞ୍ଚଳରୁ ଚିହ୍ନଟ ହୋଇଥିବା ସମସ୍ତଙ୍କ ଅବସ୍ଥା ଗୁରୁତର। ଲୋକମାନେ କଟକଣା ମାନୁ ନାହାନ୍ତି। କର୍ଫ୍ୟୁ ଜାରି ପରେ ମଧ୍ୟ ବୁଲୁଛନ୍ତି।
-ରଜନୀକାନ୍ତ ସ୍ବାଇଁ, ଉପଜିଲାପାଳ, ତାଳଚେର

ସଂକ୍ରମଣ ଚେନ୍‌ ଭାଙ୍ଗିବାକୁ ଉଦ୍ୟମ
ପୌରାଞ୍ଚଳରେ ସଂକ୍ରମଣ ବଢିଚାଲିଛି। ନବ ମିଶ୍ର କଲୋନିରୁ ଅଧିକ ପଜିଟିଭ୍‌ ଚିହ୍ନଟ ହୋଇଛନ୍ତି। ପ୍ରତିଦିନ ଏହି ଅଞ୍ଚଳରୁ ୨/୩ ଜଣ ସଂକ୍ରମିତ ବାହାରୁଛନ୍ତି। ତେଣୁ କଲୋନିକୁ କଣ୍ଟେନମେଣ୍ଟ ଜୋନ୍‌ ଘୋଷଣା କରାଯାଇଛି। ଶନିବାର ଓ ରବିବାର ଶଟ୍‌ଡାଉନ ଥିବାବେଳେ ଏଥିରେ କେବଳ ଶୁକ୍ରବାରକୁ ଯୋଡାଯାଇଛି।
-ରଶ୍ମିରେଖା ଅମାନ୍ତ, ନିର୍ବାହୀ ଅଧିକାରୀ, ପୌର ପରିଷଦ

ନିଷ୍ପତ୍ତିକୁ ସ୍ବାଗତ କରୁଛୁ
ପ୍ରଶାସନ ଭଲ ନିଷ୍ପତ୍ତି ନେଇଛି। ଏହାକୁ ଆମେ ସ୍ବାଗତ କରୁଛୁ। କିନ୍ତୁ ଦିନ ମଜୁରିଆ, ଖଟିଖିଆ ଓ ଯାଯାବରଙ୍କ କଥା ପ୍ରଶାସନ ବୁଝିବା ଦରକାର। ଅମାନିଆଙ୍କ ପ୍ରତି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଗଲେ ସ୍ଥିତି ସୁଧୁରିବ। ନଚେତ୍‌ ପୂର୍ବପରି ତାଳଚେରରେ ସଂକ୍ରମଣ ବଢ଼ିଚାଲିବ।
-ବାପି ମହାନ୍ତି, ସାମାଜିକ କର୍ମୀ, ତାଳଚେର

ସମସ୍ତେ ସମର୍ଥନ କରନ୍ତୁ
ପ୍ରଶାସନର ନିଷ୍ପତ୍ତି ଯୁକ୍ତିଯୁକ୍ତ। ଏହାକୁ ସମସ୍ତେ ସମର୍ଥନ କରିବା ଉଚିତ। ତଥାପି ବେପାର ବାଣିଜ୍ୟ ପ୍ରତି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯାଉ ା ଦୋକାନ ବଜାର ବନ୍ଦ କରାଯିବା ଦ୍ୱାରା ବ୍ୟବସାୟୀଙ୍କ ପେଟରେ ଲାତ ମରାଯାଉଛି। ସାମାଜିକ ଦୂରତ୍ୱ ଓ ମାସ୍କ ବ୍ୟବହାରକୁ କଡ଼ାକଡ଼ି କରାଯାଉ।
-ସୁଲେଖ ସେଠୀ, ତାଳଚେରବାସୀ

ବ୍ୟବସାୟ ବନ୍ଦ କରା ନ ଯାଉ
ଗତବର୍ଷର ଲକ୍‌ଡାଉନ୍‌ ବ୍ୟବସାୟୀଙ୍କ ଅଣ୍ଟା ଭାଙ୍ଗିଦେଇଥିଲା। ବେପାର ଟିକିଏ ସଳଖ ହେଉଥିବାବେଳେ ଏବେ ପୁଣି କରୋନା ବଢ଼ିବା ଯୋଗୁ ଶଟ୍‌ଡାଉନ୍‌ ଫେରିଛି। ମାସ୍କ ବ୍ୟବହାର, ସାମାଜିକ ଦୂରତ୍ୱ ନିୟମ ମାନୁଛୁ। ପ୍ରଶାସନ କଠୋର ହେଲେ ମଧ୍ୟ ସବୁ ଦୋକାନ ବନ୍ଦ କରା ନ ଯାଉ।
-ସଞ୍ଜୀବ ସାହୁ, ବ୍ୟବସାୟୀ, ତାଳଚେର

କଟକଣା କଡ଼ାକଡ଼ି କରାଯାଉ
ନାଇଟ୍‌ କର୍ଫ୍ୟୁ ଜାରି ରହିଛି। ସରକାରଙ୍କ ପକ୍ଷରୁ ସପ୍ତାହାନ୍ତ ଶଟ୍‌ଡାଉନ୍‌ ଘୋଷଣା କରାଯାଇଛି। ପଜିଟିଭ୍‌ ସଂଖ୍ୟା ବଢି ଚାଲିଥିବାରୁ ତାହାକୁ ପ୍ରତିହତ କରିବାକୁ ପ୍ରଶାସନ ନିଷ୍ପତ୍ତି ନେଇଛି। ସାମାଜିକ ଦୂରତ୍ୱ, ମାସ୍କ ବ୍ୟବହାର ନିୟମ ପାଳନକୁ କଡ଼ାକଡ଼ି କରାଯାଉ।
-ଜ୍ଞାନରଞ୍ଜନ ପାଣି, ଆଇନଜୀବୀ, ତାଳଚେର


Enter your email to get our daily news in your inbox.

All Right Reserved By Dharitri.Com

ବନ୍ୟା ରୋକିବାକୁ ଦୀର୍ଘମିଆଦୀ ରୋଡ୍‌ମ୍ୟାପ୍‌: ମନ୍ତ୍ରୀ ପୂଜାରୀ

ଭୁବନେଶ୍ୱର,୨୨ା୧୧(ସୁନିତ୍‌ ମିଶ୍ର): ବନ୍ୟା ରୋକିବାକୁ ରାଜ୍ୟ ସରକାର ଦୀର୍ଘମିଆଦୀ ଯୋଜନା କରିବା ସହ ପ୍ରଥମ ପର୍ଯ୍ୟାୟରେ ୮ଟି ନଦୀ ସିଷ୍ଟମର ଭିତ୍ତିଭୂମି ବିକାଶ ପାଇଁ ରୋଡ୍‌ ମ୍ୟାପ୍‌…

ଫେୟାର୍‌ନେସ୍‌ କ୍ରିମ୍‌ ବ୍ୟବହାରରୁ ନାବାଳିକାଙ୍କୁ କିଡନୀ ରୋଗ

ଥିରୁଭାନନ୍ତପୁରମ, ୨୨ା୧୧: ଅନ୍‌ଲାଇନରୁ କିଣାଯାଇଥିବା ପାରଦ ମିଶ୍ରିତ ଫେୟାରନେସ୍‌ କ୍ରିମ ବ୍ୟବହାର କରିବା ପରେ କେରଳର ଜଣେ ୧୭ ବର୍ଷୀୟା ନାବାଳିକାଙ୍କଠାରେ ଗୁରୁତର କିଡ୍‌ନୀ ସମସ୍ୟା ଦେଖାଦେଇଛି।…

ନବୀନ, ପାଣ୍ଡିଆନ, ରବିକାନ୍ତଙ୍କ ବିଦେଶ ଗସ୍ତର ତଦନ୍ତ ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ

ଭୁବନେଶ୍ୱର, ୨୨।୧୧(ସୁନିତ୍‌ ମିଶ୍ର): ପୂର୍ୱତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ, ଅବସରପ୍ରାପ୍ତ ଆଇଏଏସ୍‌ ଅଫିସର ଭି.କେ ପାଣ୍ଡିଆନ ଏବଂ ଆଇପିଏସ୍‌ ଅଫିସର ରବି…

ରାଜନୀତି ମଇଦାନରେ କ୍ରିକେଟର ୟୁଜବେନ୍ଦ୍ର ଚହଲ; ଭାଜପାରେ ହେଲେ ସାମିଲ, ମିଳିଲା ବଡ଼ ଦାୟିତ୍ୱ

ନୂଆଦିଲ୍ଲୀ,୨୨।୧୧: ଭାରତୀୟ କ୍ରିକେଟର ୟୁଜବେନ୍ଦ୍ର ଚହଲ ତାଙ୍କର ରାଜନୈତିକ ଇନିଂସ ଆରମ୍ଭ କରିବାର ଘୋଷଣା କରିଛନ୍ତି। ସେ ଶନିବାର ଭାରତୀୟ ଜନତା ପାର୍ଟିରେ ସାମିଲ ହୋଇଛନ୍ତି। ତାଙ୍କୁ…

ମେଟା କାର୍ଯ୍ୟାଳୟରେ ଯୁବକଂଗ୍ରେସର ଭଙ୍ଗାରୁଜା

ନୂଆଦିଲ୍ଲୀ,୨୨ା୧୧: କେତେଜଣ ଦଳୀୟ ନେତାଙ୍କ ଇନ୍‌ଷ୍ଟାଗ୍ରାମ୍‌ ଆକାଉଣ୍ଟକୁ ମେଟା ହଟାଇ ଦେଇଥିବାରୁ ଏହା ବିରୋଧରେ ଯୁବ କଂଗ୍ରେସ ପକ୍ଷରୁ ମୁମ୍ୱାଇ, ହାଇଦ୍ରାବାଦ, ଗୁରୁଗ୍ରାମ ଆଦି ବିଭିନ୍ନ ସ୍ଥାନରେ…

ସୋନିଆ ଗାନ୍ଧୀଙ୍କ ଇଟାଲୀସ୍ଥିତ ଘର ହେବ ସଂଗ୍ରହାଳୟ; ମାଲିକ ସୁଖଦେବ ସିଂହ କାଙ୍ଗ କଲେ ବଡ଼ ଘୋଷଣା

ଇଟାଲୀ,୨୧ା୧୧: କଂଗ୍ରେସ ନେତ୍ରୀ ସୋନିଆ ଗାନ୍ଧୀଙ୍କ ପିଲାଦିନର ଘରକୁ ନେଇ ଇଟାଲୀରୁ ଏକ ରୋଚକ କଥା ସାମ୍ନାକୁ ଆସିଛି। ଇଟାଲୀରେ ରହୁଥିବା ଶିଖ୍ ବ୍ୟବସାୟୀ ସୁଖଦେବ ସିଂହ…

ୟେମେନ୍‌ରେ ଏୟାରଷ୍ଟ୍ରାଇକ୍‌: ୪୧ ମୃତ

ସାନା/ ରିୟାଦ,୨୧ା୧୧: ସାଉଦି ଆରବ ଗତ ୨୪ ଘଣ୍ଟା ମଧ୍ୟରେ ୟେମେନ୍‌ର ବିଭିନ୍ନ ସ୍ଥାନରେ କରିଥିବା ଏୟାରଷ୍ଟ୍ରାଇକ୍‌ରେ ୧୧ ପିଲା ଓ ୭ ମହିଳାଙ୍କ ସମେତ ଅନୂ୍ୟନ…

ତାମିଲନାଡୁରେ ଚାଞ୍ଚଲ୍ୟ: ଟ୍ରେନ୍‌ରେ ମହିଳାଙ୍କୁ ବଳାତ୍କାର ପରେ ହତ୍ୟା

ଚେନ୍ନାଇ,୨୧ା୧୧: ତାମିଲନାଡୁର କନ୍ୟାକୁମାରୀ ଜିଲା ଅନ୍ତର୍ଗତ ନାଗେରକଏଲ ରେଲ୍‌ଓ୍ବେ ୟାର୍ଡରେ ଗତ ୧୩ ତାରିଖରେ ଏକ ଅବ୍ୟବହୃତ ଟ୍ରେନ୍‌ ବଗିରୁ ଜଣେ ୫୪ ବର୍ଷୀୟ ମହିଳାଙ୍କ ମୃତଦେହ…

Advertisement

ଧରିତ୍ରୀ କାର୍ଟୁନ

Archives

 

Dharitri-Rashifala


ଛୁଟିଦିନ
ପିଲାଙ୍କ ଧରିତ୍ରୀ
Trending
Let's Pledge For A 'Plastic Free' Odisha Join The Movement Of 'Plastic Free' Odisha

Akash Das Nayak, supports a Plastic Free Odisha. Do you?