ପୋଲସରା,୧୫ା୫: ଗ୍ରାମାଞ୍ଚଳରେ ଲୋକଙ୍କୁ କର୍ମନିଯୁକ୍ତିରେ କାମ ଯୋଗାଇଦେବା ଲକ୍ଷ୍ୟ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ମହତ୍ମାଗାନ୍ଧୀ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା କରିଛନ୍ତି। ଏହି ଯୋଜନା ମାଧ୍ୟମରେ ସରକାରଙ୍କ ପକ୍ଷରୁ କୋଟି କୋଟି ଟଙ୍କା ପାଣି ଭଳି ଖର୍ଚ୍ଚ କରି ପ୍ରତ୍ୟେକ ଜବ କାର୍ଡ ହିତାଧକାରୀଙ୍କୁ ଶହେ ଦିନର କର୍ମ ନିଯୁକ୍ତି ଯୋଗାଇ ଦେଉଛନ୍ତି ବୋଲି ଡିଣ୍ଡିମ ପିଟୁଛନ୍ତି। କିନ୍ତୁ ଏହାର ବାଟ ମାରଣା ହେଉଛି ଗଞ୍ଜାମ ଜିଲାରେ। ପୋଲସରା ବ୍ଲକ ଢୁଙ୍କାପଡ଼ା ଗ୍ରାମରେ ରହିଥିବା ଆମ୍ବପୁଆ ବନ୍ଧକୁ ନାମ ବଦଳାଇ ହାଡ଼ିବନ୍ଧ ନାମରେ ମେଶିନ ସାହାଯ୍ୟରେ କାମ କରୁଥିବା ଅଭିଯୋଗ ହୋଇଛି। ଏହି ପୋଖରୀକୁ ପୁନଃଉଦ୍ଧାର ନାମରେ ପୂର୍ବରୁ ଫଲ୍ସ ବିଲ କରି ଅର୍ଥ ହରିଲୁଟ କରିଥିବା ଓଡିଶା ଲୋକାୟୁତରେ ଗ୍ରାମବାସୀ ଅଭିଯୋଗ କରିଛନ୍ତି। ଚଳିତ ବର୍ଷ ୨୦୨୨-୨୩ ଆର୍ଥିକ ବର୍ଷ କାର୍ଯ୍ୟର କୋର୍ଡ ୧୦୫୦୫୭୦୯ ନମ୍ବରରେ ଅଟକଳ ମୂଲ୍ୟ ୬ ଲକ୍ଷ ଟଙ୍କା ହାଡିବନ୍ଧ ପୁନରୁଦ୍ଧାର କରିବା ନେଇ ନାମ ଫଳକରେ ଦର୍ଶାଯାଇଛି। ହେଲେ ଲୋକେ କାମ କରିବା ବଦଳରେ ମେଶିନ ସାହାଯ୍ୟରେ କାମ କରି ୧ ଲକ୍ଷ ୧୬ ହଜାର ୮୩୪ ଟଙ୍କା ଉକ୍ତ ଗ୍ରାମର ଜବ କାର୍ଡ ହିତାଧକାରୀ ସିଆର୍ପି, ବିଦ୍ୟୁତ୍ ବିଭାଗ କର୍ମଚାରୀ, ଛାତ୍ର, ଗର୍ଭବତୀ ମହିଳା, ବୃଦ୍ଧା, ବୃଦ୍ଧଙ୍କ ନାଁରେ ଖାତାକୁ ଟଙ୍କା ପଠାଯାଇଥିବା ଅଭିଯୋଗ ହୋଇଛି। ଏ ନେଇ ପୋଲସରା ଗୋଷ୍ଠୀ ଉନ୍ନୟନ ଅଧିକାରୀ ଧର୍ମରାଜ ପରିଡ଼ାଙ୍କୁ ପଚାରିବାରୁ ଏହି ବିଷୟରେ ତଦନ୍ତ କରାଯିବ ବୋଲି ସେ କହିଛନ୍ତି।
