ନୂଆଦିଲ୍ଲୀ,୧୦।୧୧: ଦେଶରେ କରୋନା ମହାମାରୀ ସଂକ୍ରମଣ ବିରୋଧରେ ସାର୍ବଜନୀକ ଟିକାକରଣ ଜାରି ରହିଛି। ଇତିମଧ୍ୟରେ ୯୬ ଦେଶରେ ଭାରତୀୟ ଟିକାକରଣ ପ୍ରମାଣପତ୍ରକୁ ମାନ୍ୟତା ମିଳିଛି। ଏନେଇ କେନ୍ଦ୍ରୀୟ ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭ୍ୟ ସୂଚନା ଦେଇଛନ୍ତି। ମାଣ୍ଡଭ୍ୟ ଏକ ବିବୃତ୍ତିରେ କହିଛନ୍ତି ଯେ ଭାରତରେ ଜାରି ରହିଥିବା ବିଶ୍ୱର ସର୍ବବୃହତ କରୋନା ଟିକାକରଣ କାର୍ଯ୍ୟକ୍ରମର ପ୍ରମାଣପତ୍ରକୁ ଏବେ ବିଶ୍ୱର ବିଭିନ୍ନ ରାଷ୍ଟ୍ର ପକ୍ଷରୁ ମାନ୍ୟତା ପ୍ରଦାନ କରାଯାଉଛି।
ଧୀରେଧୀରେ ଏଭଳି ରାଷ୍ଟ୍ରଙ୍କ ସଂଖ୍ୟା ବଢ଼ିବାରେ ଲାଗିଛି। ଫଳରେ ଏଣିକି ଭାରତୀୟ ନାଗରିକ ଶିକ୍ଷା, ବ୍ୟବସାୟ ଏବଂ ପର୍ଯ୍ୟଟନ ଉଦ୍ଦେଶ୍ୟରେ ମୁକ୍ତ ଭାବରେ ସମ୍ପୃକ୍ତ ଦେଶକୁ ଯାତ୍ରା କରିପାରିବେ। ଭାରତର ଟିକାକରଣ ପ୍ରମାଣପତ୍ରକୁ ପାରସ୍ପରିକ ସ୍ବୀକୃତି ପ୍ରଦାନ ପାଇଁ ସମ୍ପୃକ୍ତ ରାଷ୍ଟ୍ରଗୁଡ଼ିକ ସହମତ ହୋଇଛନ୍ତି। ସ୍ବାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଯେଉଁମାନେ ବିଦେଶ ଭ୍ରମଣ କରିବାକୁ ଚାହୁଁଛନ୍ତି ସେମାନେ କୋ-ୱିନ ପୋର୍ଟାଲରୁ ଅନ୍ତର୍ଜାତୀୟ ଟ୍ରାଭେଲ ଇମ୍ୟୁନାଇଜେସନ ସାର୍ଟିଫିକେଟ ମଧ୍ୟ ଡାଉନଲୋଡ କରିପାରିବେ।
ଟିକାକରଣ ପ୍ରମାଣପତ୍ରକୁ ପାରସ୍ପରିକ ସ୍ବୀକୃତି ଦେବାକୁ ରାଜି ହୋଇଥିବା ଦେଶ ମଧ୍ୟରେ କାନାଡା, ଆମେରିକା, ବ୍ରିଟେନ, ଫ୍ରାନ୍ସ, ଜର୍ମାନୀ, ବେଲଜିୟମ, ଆୟର୍ଲାଣ୍ଡ, ନେଦରଲାଣ୍ଡ, ସ୍ପେନ, ବାଂଲାଦେଶ, ଫିନଲାଣ୍ଡ, ମାଲି, ଘାନା, ସିଏରା ଲିୟନ, ନାଇଜେରିଆ, ସର୍ବିଆ, ପୋଲାଣ୍ଡ, ସ୍ଲୋଭାକିଆ ରିପବ୍ଲିକ, କ୍ରୋଏସିଆ, ବୁଲଗେରିଆ, ତୁର୍କୀ, ଚେକ ରିପବ୍ଲିକ, ସ୍ବିଜରଲ୍ୟାଣ୍ଡ, ସ୍ବିଡେନ, ଅଷ୍ଟ୍ରିଆ, ରୁଷିଆ, କୁଏତ, ସଂଯୁକ୍ତ ଆରବ ଏମିରେଟ୍ସ, ବାହାରିନ, କତାର ଆଦି ରହିଛନ୍ତି।
ପୃଥିବୀର ଅନ୍ୟ ଦେଶରେ କୋଭିଶିଲ୍ଡ ଏବଂ କୋଭାକ୍ସିନ୍ ଟିକାକରଣ ପ୍ରମାଣପତ୍ରକୁ ମାନ୍ୟତା ପ୍ରଦାନ କରିବା ଲାଗି କେନ୍ଦ୍ରୀୟ ସ୍ବାସ୍ଥ୍ୟ ଏବଂ ବହିର୍ବ୍ୟାପାର ମନ୍ତ୍ରଣାଳୟ ମିଳିତ ଭାବେ କାର୍ଯ୍ୟ କରୁଛନ୍ତି। ପୃଥିବୀର ସବୁଠାରୁ ବଡ ଟିକାକରଣ କାର୍ଯ୍ୟକ୍ରମରେ ବର୍ତ୍ତମାନ ଭାରତ ସରକାର ଘରଘର ବୁଲି ଟିକାପ୍ରଦାନ ଅଭିଯାନ ଆରମ୍ଭ କରିଛନ୍ତି। ଏହି ଅଭିଯାନରେ ସ୍ବାସ୍ଥ୍ୟ କର୍ମୀମାନେ ଘରଘର ବୁଲି ଲୋକଙ୍କ ଟିକାକରଣ କରୁଛନ୍ତି।
ବର୍ତ୍ତମାନ ସୁଦ୍ଧା ଦେଶରେ ୧୦୯ କୋଟିରୁ ଅଧିକ ଟିକା ପ୍ରଦାନ କରାଯାଇଛି। ସେଥିମଧ୍ୟରେ ପ୍ରଥମ ଡୋଜ ସଂଖ୍ୟା ୭୪,୨୧,୬୨,୯୪୦ ଥିବାବେଳେ ଦ୍ୱିତୀୟ ଡୋଜ ସଂଖ୍ୟା ୩୪,୮୬,୫୩,୪୨୬ ରହିଛି।
