ଭଞ୍ଜନଗର,୩୧ା୭(ବାବୁଲା ପ୍ରଧାନ): ଭଞ୍ଜନଗର ଆମ ପୋଲିସ ସମିତି ପକ୍ଷରୁ ବଡକୋଦଣ୍ଡା ହାଇସ୍କୁଲ ପରିସରରେ ସୋମବାର ସଭା ହୋଇଥିଲା। ଏଥିରେ ଭଞ୍ଜନଗର ଆଞ୍ଚଳିକ ପରିବହନ ବିଭାଗର ଏମ୍ଭିଆଇ ଭାଗୀରଥି ନାୟକ ଏବଂ ଭଞ୍ଜନଗର ଥାନା ଅଧିକାରୀ ଧୀରେଶ ଦାସ ଯୋଗଦେଇ ଅନ୍ୟ ଜିଲା ଅପେକ୍ଷା ଗଞ୍ଜାମ ଜିଲାରେ ଦୁର୍ଘଟଣାଜନିତ ମୃତ୍ୟୁହାର ସର୍ବାଧିକ ବୋଲି କହିଥିଲେ। ବିଶେଷକରି ମଦପିଇ ଗାଡି ଚଳାଇବା ଦୁର୍ଘଟଣାର ମୁଖ୍ୟ କାରଣ। ସେହିପରି ଦ୍ରୁତ ଗତିରେ ଗାଡ଼ି ଚଲାଇବା, ଟ୍ରାଫିକ ନିୟମ ନ ମାନିବା ଓ ନାବାଳକମାନେ ଗାଡି ଚଲାଉଥିବାରୁ ଜିଲାରେ ଦୁର୍ଘଟଣା ବଢ଼ିବା ସହ ମୃତ୍ୟୁ ସଂଖ୍ୟା ମଧ୍ୟ ବଢ଼ୁଛି। ଏଥିପ୍ରତି ଲୋକେ ଅଧିକରୁ ଅଧିକ ସଚେତନ ହେବା ଆବଶ୍ୟକ ବୋଲି ଉଭୟ ଅଧିକାରୀ କହିଥିଲେ।
ସେହିପରି ଗଞ୍ଜାମ ପୋଲିସ ଜିଲା ଅନ୍ତର୍ଗତ ଭଞ୍ଜନଗର ଥାନାରେ ୨୦୧୪ରୁ ବର୍ତ୍ତମାନ ସୁଦ୍ଧା ୧୯ଜଣ ନାବାଳିକା ଅପହରଣ ନେଇ ମାମଲା ରୁଜୁ ହୋଇଛି। ଯାହାକି ଜିଲାରେ ସର୍ବାଧିକ। ନାବାଳିକା, ନାବାଳକମାନେ ଭୁଲ ବାଟରେ ନ ଯିବାକୁ ଥାନା ଅଧିକାରୀ ଦାସ ଉପସ୍ଥିତ ଛାତ୍ରୀଛାତ୍ରଙ୍କୁ କହିଥିଲେ।
ବୈଠକରେ ଥାନା ଅଧିକାରୀ ଦାସ ଅଧକ୍ଷତା କରିଥିଲେ। ସଭ୍ୟ ତଥା ଅବସରପ୍ରାପ୍ତ କଲେଜ ଅଧ୍ୟକ୍ଷ କୃତିବାସ ବିଶ୍ୱାଳ, ଡଃ ପୂର୍ଣ୍ଣଚନ୍ଦ୍ର ତ୍ରିପାଠୀ, ଅନ୍ତର୍ଯ୍ୟାମୀ ତ୍ରିପାଠୀ, ଅତିରିକ୍ତ ଥାନା ଅଧିକାରୀ ବିଦ୍ୟା ଭାରତୀ ନାୟକ, ଶିକ୍ଷକ ନେତା ଜଗବନ୍ଧୁ ଜେନା, ପ୍ରଧାନ ଶିକ୍ଷକ ସନ୍ତୋଷ ଜେନା ପ୍ରମୁଖ ଅତିଥି ଭାବେ ଯୋଗ ଦେଇ ଅନ୍ଧବିଶ୍ୱାସ, ଗୁଣିଗାରେଡ଼ି, ସାଇବର କ୍ରାଇମ ଉପରେ ଛାତ୍ରୀଛାତ୍ରଙ୍କୁ ସଚେତନ କରାଇଥିଲେ। ଅନୁପମ ବାନାର୍ଜୀ ଧନ୍ୟବାଦ ଦେଇଥିଲେ।
