ନୂଆଦିଲ୍ଲୀ, ୨୮ା୭ (ପି.ଟି.):ଜଳବାୟୁ ପରିବର୍ତ୍ତନ ଜନିତ ତାପମାତ୍ରା ବୃଦ୍ଧି ଯୋଗୁ ୨୦୫୦ ସୁଦ୍ଧା ବିଶ୍ୱରେ ପ୍ରତିବର୍ଷ ପ୍ରାୟ ୪ ଲକ୍ଷ ୩୦ ହଜାର ଅତିରିକ୍ତ ଲୋକଙ୍କ ମୃତ୍ୟୁ ଘଟିବା ନେଇ ଏକ ନୂତନ ରିପୋର୍ଟରୁ ଆଶଙ୍କା ପ୍ରକାଶ ପାଇଛି। ସବୁଠାରୁ ଚିନ୍ତାଜନକ ବିଷୟ ହେଉଛି, ଗରିବ ଦେଶଗୁଡ଼ିକରେ ଆବଶ୍ୟକ କୁଲିଂ ବ୍ୟବସ୍ଥା (ଏସି/ଫ୍ୟାନ୍) ପରିଚାଳନା ପାଇଁ ସମ୍ବଳ ଓ ବିଦ୍ୟୁତ୍ ଅଭାବ ଯୋଗୁ ଧନୀ ଦେଶଗୁଡ଼ିକ ତୁଳନାରେ ୧୦ ଗୁଣ ଅଧିକ ମୃତ୍ୟୁ ଘଟିବ।
ୟୁନିଭର୍ସିଟି ଅଫ୍ ସିକାଗୋର ଏନର୍ଜି ପଲିସି ଇନ୍ଷ୍ଟିଚ୍ୟୁଟ୍ (ଇପିଆଇସି) ଦ୍ୱାରା ପରିଚାଳିତ ‘କ୍ଲାଇମେଟ୍ ଇମ୍ପାକ୍ଟ ଲାବ୍’ର ଏହି ରିପୋର୍ଟ ଅନୁଯାୟୀ, କେବଳ ଧନୀ ଦେଶର ଲୋକମାନେ ହିଁ ଆବଶ୍ୟକତା ଅନୁଯାୟୀ ଏସି ବ୍ୟବହାର କରିବାରେ ସମର୍ଥ। ଲାବ୍ର ସହ-ସଂସ୍ଥାପକ ତଥା ଅର୍ଥନୀତି ପ୍ରଫେସର୍ ମାଇକେଲ ଗ୍ରୀନ୍ଷ୍ଟୋନ୍ଙ୍କ କହିବା ଅନୁଯାୟୀ, ‘ଜଳବାୟୁ ପରିବର୍ତ୍ତନରେ ଯେଉଁ ଦେଶଗୁଡ଼ିକ ସବୁଠାରୁ କମ୍ ଦାୟୀ, ସେହି ଦେଶଗୁଡ଼ିକର ଲୋକମାନେ ହିଁ ଅତ୍ୟଧିକ ଗରମ ଯୋଗୁ ପ୍ରାଣ ହରାଉଛନ୍ତି, ଯାହା ପ୍ରକୃତିର ସବୁଠାରୁ ବଡ଼ ନିର୍ଦ୍ଦୟତା।
ଜଳବାୟୁ ପରିବର୍ତ୍ତନ ଯୋଗୁ ମଧ୍ୟମ-ଆୟବର୍ଗର ଦେଶଗୁଡ଼ିକରେ କୁଲିଂ ପାଇଁ ବିଦ୍ୟୁତ୍ ବ୍ୟବହାର ଯେତିକି ବଢ଼ିବ, ଗରିବ/ସ୍ବଳ୍ପ-ଆୟବର୍ଗ ଦେଶଗୁଡ଼ିକରେ ତାହା ତୁଳନାରେ ୭ ଗୁଣ କମ୍ ରହିବ। ନିମ୍ନ-ଆୟକାରୀ ଦେଶଗୁଡ଼ିକରେ ମୁଣ୍ଡପିଛା ବିଦ୍ୟୁତ୍ ବ୍ୟବହାର ବୃଦ୍ଧି ଏତେ କମ୍ ହେବ ଯେ, ତାହା କେବଳ ଗୋଟିଏ ଏଲଇଡି ବଲ୍ବକୁ ୪ ମାସ ଚଲାଇବା ପାଇଁ ଯଥେଷ୍ଟ। ବିଶ୍ୱର ୧୮ଟି ଦେଶର ପ୍ରାୟ ୬୭ କୋଟି ୬୦ ଲକ୍ଷ ଲୋକ ଅତ୍ୟଧିକ ଉତ୍ତାପ ଏବଂ କୁଲିଂ ବ୍ୟବସ୍ଥାର ଅଭାବ ଭଳି ଭୟଙ୍କର ଚକ୍ରବୂ୍ୟହ ମଧ୍ୟରେ ଫସିରହିଛନ୍ତି। ଏହି କାରଣରୁ ୨୦୫୦ ସୁଦ୍ଧା କେବଳ ଏହି ଅଞ୍ଚଳଗୁଡ଼ିକରେ ବାର୍ଷିକ ପ୍ରାୟ ୩ ଲକ୍ଷ ୭୭ ହଜାର ଲୋକଙ୍କ ଜୀବନ ଯାଇପାରେ। ଏହି ପ୍ରଭାବିତ ଲୋକମାନେ ମୁଖ୍ୟତଃ ନାଇଜର, ମାଲି, ବୁର୍କିନା ଫାସୋ, ଚାଦ ଭଳି ଉତ୍ତର ସବ୍-ସାହାରା ଆଫ୍ରିକୀୟ ଦେଶ ଏବଂ ପାକିସ୍ତାନ, ବାଂଲାଦେଶ, ନେପାଳ ଓ ମ୍ୟାନ୍ମାର ଭଳି ଦକ୍ଷିଣ ଏସିଆର ଦେଶଗୁଡ଼ିକରେ ବାସ କରନ୍ତି। ବାହାରିନ, କୁଏଟ୍ ଓ ସାଉଦି ଆରବ ଭଳି ଗଲ୍ଫ ଦେଶଗୁଡ଼ିକରେ ମଧ୍ୟ ସବ୍-ସାହାରା ଆଫ୍ରିକା ଭଳି ଅତ୍ୟଧିକ ଗରମ ହୋଇଥାଏ। ତେବେ ଆର୍ଥିକ ସ୍ବଚ୍ଛଳତା ଯୋଗୁ ସେଠାରେ ଅଧିକ ବିଦ୍ୟୁତ୍ ଓ ଏସି ବ୍ୟବହାର ହେଉଥିବାରୁ ଗରମ ଜନିତ ମୃତ୍ୟୁସଂଖ୍ୟା ଯଥେଷ୍ଟ କମ୍ ରହିଥାଏ। କ୍ଲାଇମେଟ ଇମ୍ପାକ୍ଟ ଲାବ୍ର ଗବେଷଣା ନିର୍ଦ୍ଦେଶକ ଅଶ୍ୱିନ ରୋଡ୍ଙ୍କ ମତରେ, ବିଭିନ୍ନ ଦେଶର ସରକାରଙ୍କୁ ଶସ୍ତାରେ ବିଦ୍ୟୁତ୍ ଯୋଗାଣ, ସ୍ବାସ୍ଥ୍ୟସେବାର ସମ୍ପ୍ରସାରଣ, ଉତ୍ତାପ ସମ୍ପର୍କିତ ସୂଚନା ପାଇଁ ‘ଅଗ୍ରିମ ଚେତାବନୀ ବ୍ୟବସ୍ଥା’ ଏବଂ ସାମାଜିକ ସୁରକ୍ଷା ଯୋଜନା ଉପରେ ତୁରନ୍ତ ଧ୍ୟାନ ଦେବାକୁ ପଡ଼ିବ। ଏହି ସମସ୍ୟାର ସମାଧାନ ପାଇଁ ଲାବ୍ ପକ୍ଷରୁ ଏକ ବିଶ୍ୱସ୍ତରୀୟ ତଥ୍ୟ-ଆଧାରିତ କାର୍ଯ୍ୟପନ୍ଥା ପ୍ରସ୍ତୁତ କରାଯାଉଛି।
Dharitri – Odisha’s No.1 Odia Daily
