ନୂଆଦିଲ୍ଲୀ,୨୪।୮:କକରୋଚ ଜନତା ପାର୍ଟି’ (CJP)ର ପ୍ରତିଷ୍ଠାତା ଅଭିଜିତ ଦୀପକେ ଦେଶର ସମସ୍ତ ରାଜ୍ୟର ଶିକ୍ଷାମନ୍ତ୍ରୀଙ୍କୁ ଏକ ଚିଠି ଲେଖିଛନ୍ତି। ଏହି ଚିଠିରେ ସେ ରାଜ୍ୟର ସରକାରୀ ସ୍କୁଲଗୁଡ଼ିକ ସମ୍ପର୍କରେ ୬ଟି ଗୁରୁତ୍ୱପୂର୍ଣ୍ଣ ତଥ୍ୟ ଦେବାକୁ ଶିକ୍ଷାମନ୍ତ୍ରୀମାନଙ୍କୁ ଅପିଲ କରିଛନ୍ତି। ଏଥିରେ ସ୍କୁଲ ମରାମତି, ଶିକ୍ଷକ ପଦବୀ, ବଜେଟ ବ୍ୟବହାର ଓ ଡିଜିଟାଲ ଶିକ୍ଷା ସୁବିଧା ଭଳି ବିଷୟ ସାମିଲ ରହିଛି।
ଶିକ୍ଷାମନ୍ତ୍ରୀଙ୍କୁ ଲେଖିଥିବା ଚିଠିରେ ଅଭିଜିତ ଦୀପକେ କହିଛନ୍ତି ଯେ, ଭାରତ ସ୍ବାଧୀନ ହେବାର ପ୍ରାୟ ୮୦ ବର୍ଷ ପରେ ମଧ୍ୟ ଅନେକ ସରକାରୀ ସ୍କୁଲରେ ଛାତ୍ରୀଛାତ୍ରଙ୍କ ପାଇଁ ପିଇବା ପାଣି, ଶୌଚାଳୟ, ଭଲ ଶ୍ରେଣୀଗୃହ ଓ ବସିବା ପାଇଁ ବେଞ୍ଚ ଭଳି ମୌଳିକ ସୁବିଧା ନଥିବା ଦେଖାଯାଉଛି।
ସରକାରୀ ସ୍କୁଲର ବର୍ତ୍ତମାନ ସ୍ଥିତି ସ୍ପଷ୍ଟ ହେବା ପାଇଁ ସେ ଶିକ୍ଷାମନ୍ତ୍ରୀମାନଙ୍କଠାରୁ ନିମ୍ନଲିଖିତ ୬ଟି ତଥ୍ୟ ମାଗିଛନ୍ତି।
୧. ସ୍କୁଲର ମରାମତି
ଗତ ୫ ବର୍ଷରେ ରାଜ୍ୟର କେତେ ସରକାରୀ ସ୍କୁଲର କାୟାକଳ୍ପ କରାଯାଇଛି ଏବଂ ବର୍ତ୍ତମାନ କେତେ ସ୍କୁଲର ମରାମତି କିମ୍ବା ସମ୍ପୂର୍ଣ୍ଣ କାୟାକଳ୍ପ ଆବଶ୍ୟକ, ତାହାର ତଥ୍ୟ ଦେବାକୁ ସେ କହିଛନ୍ତି।
୨. ଶିକ୍ଷକ ପଦବୀର ସ୍ଥିତି
ବର୍ତ୍ତମାନ କେତେ ଶିକ୍ଷକ ପଦବୀ ମଞ୍ଜୁର ହୋଇଛି, ସେଥିରୁ କେତେ ପଦବୀ ପୂରଣ ହୋଇଛି ଏବଂ କେତେ ପଦବୀ ଖାଲି ରହିଛି, ସେ ସମ୍ପର୍କରେ ତଥ୍ୟ ମାଗିଛନ୍ତି।
୩. ସରକାରୀ ସ୍କୁଲ ପାଇଁ ବଜେଟ
ଗତ ୫ ବର୍ଷରେ ସରକାରୀ ସ୍କୁଲଗୁଡ଼ିକ ପାଇଁ କେତେ ଟଙ୍କା ଆବଣ୍ଟନ କରାଯାଇଛି ଏବଂ ସେଥିରୁ କେତେ ଟଙ୍କା ଖର୍ଚ୍ଚ ହୋଇଛି, ତାହାର ତଥ୍ୟ ଦେବାକୁ ଚିଠିରେ ଅନୁରୋଧ କରାଯାଇଛି।
୪. ଆଉ କେତେ ସ୍କୁଲ ଆବଶ୍ୟକ?
ପ୍ରତ୍ୟେକ ଶିଶୁଙ୍କୁ ଗୁଣାତ୍ମକ ଶିକ୍ଷା ଦେବା ନିଶ୍ଚିତ କରିବା ପାଇଁ ରାଜ୍ୟରେ ଆଉ କେତେଟି ସରକାରୀ ସ୍କୁଲ ଆବଶ୍ୟକ, ସେ ସମ୍ପର୍କରେ ମଧ୍ୟ ତଥ୍ୟ ମାଗିଛନ୍ତି।
୫. ଶିକ୍ଷକଙ୍କୁ କେଉଁ ଅଣ-ଶିକ୍ଷା କାର୍ଯ୍ୟ ଦିଆଯାଉଛି?
ପାଠପଢ଼ା ବ୍ୟତୀତ ସରକାରୀ ସ୍କୁଲର ଶିକ୍ଷକମାନଙ୍କୁ କେଉଁ କେଉଁ ଅଣ-ଶିକ୍ଷା କାର୍ଯ୍ୟ ଓ ଦାୟିତ୍ୱ ଦିଆଯାଉଛି, ତାହା ମଧ୍ୟ ଜଣାଇବାକୁ ସେ ଅନୁରୋଧ କରିଛନ୍ତି।
୬. ଡିଜିଟାଲ ଶିକ୍ଷା ଓ ଅନ୍ୟାନ୍ୟ ସୁବିଧା
ବର୍ତ୍ତମାନ କେତେ ସରକାରୀ ସ୍କୁଲରେ କମ୍ପ୍ୟୁଟର ଓ ଡିଜିଟାଲ ଲର୍ଣ୍ଣିଂ ସୁବିଧା ରହିଛି, କେତେ ସ୍କୁଲରେ ପରିଷ୍କାର ଓ ବ୍ୟବହାରଯୋଗ୍ୟ ଶୌଚାଳୟ ଅଛି ଏବଂ କେତେ ସ୍କୁଲରେ ପିଲାଙ୍କ ପାଇଁ ଖେଳ ସୁବିଧା ଓ ଉପକରଣ ରହିଛି, ସେ ସମ୍ପର୍କରେ ତଥ୍ୟ ମାଗିଛନ୍ତି।
ଅଭିଜିତ ଦୀପକେଙ୍କ ଏହି ଚିଠି ମାଧ୍ୟମରେ ସରକାରୀ ସ୍କୁଲର ଭିତ୍ତିଭୂମି, ଶିକ୍ଷକ ଅଭାବ, ବଜେଟ ବ୍ୟବହାର ଓ ଛାତ୍ରଛାତ୍ରୀଙ୍କୁ ମିଳୁଥିବା ସୁବିଧା ସମ୍ପର୍କରେ ଅଧିକ ସ୍ବଚ୍ଛତା ଆଣିବାକୁ ଦାବି କରାଯାଇଛି।
