ଚେନ୍ନାଇ/ମୁମ୍ବାଇ, ୪ା୬ (ପି.ଟି.)-ଭାରତର ପୂର୍ବତନ ସିମ୍ ବୋଲର ଆବିଷ୍କାର ସାଲ୍ଭି ଆସନ୍ତା ଘରୋଇ ସିଜନ ପାଇଁ ପୁଡୁଚେରୀ ସିନିୟର କ୍ରିକେଟ ଦଳର ମୁଖ୍ୟ କୋଚ୍ ଭାବେ ନିଯୁକ୍ତି ପାଇଛନ୍ତି। ପୁଡୁଚେରୀ କ୍ରିକେଟ ଆସୋସିଏଶନ (ସିଏପି)ର ଜଣେ ଅଫିସିଆଲ ଏ ବିଷୟରେ ସୂଚନା ଦେଇଛନ୍ତି। ସେହିପରି ମୁମ୍ବାଇର ପୂର୍ବତନ ପ୍ରଥମଶ୍ରେଣୀ କ୍ରିକେଟର ଓଁକାର ଖରନ୍ଭିଲ୍କର ଓରାଜସ୍ଥାନର ପୂର୍ବତନ କିପର ଦିଶାନ୍ତ ୟାଗନିକ୍ ଫିଲ୍ଡିଂ କୋଚ୍ ଦାୟିତ୍ୱ ତୁଲାଇବେ। ୩୮ ବର୍ଷୀୟ ସାଲ୍ଭୀ ପୂର୍ବତନ କର୍ନାଟକ ବ୍ୟାଟ୍ସମ୍ୟାନ ଜେ. ଅରୁଣ କୁମାରଙ୍କ ସ୍ଥାନରେ ମୁଖ୍ୟ କୋଚ୍ ହେବେ। ଏହି ସମସ୍ତ ନିଯୁକ୍ତି ଗୋଟିଏ ସିଜନ ପାଇଁ କରାଯାଇଥିବା ସିଏପିର ଜଣେ ଅଫିସିଆଲ ପ୍ରକାଶ କରିଛନ୍ତି। ସାଲ୍ଭି ଦ୍ୱିତୀୟ ଥର ପାଇଁ ପୁଡୁଚେରୀର କୋଚ୍ ଦାୟିତ୍ୱ ଗ୍ରହଣ କରିବାକୁ ଯାଉଛନ୍ତି। ଏହା ପୂର୍ବରୁ ଦଳର ପ୍ରଥମ ସିଜନରେ ତାଙ୍କ ପ୍ରଦର୍ଶନ ଭଲ ରହିଥିଲା। ସେ ଆମ ଖେଳାଳିଙ୍କ ସହିତ ଭଲ ରୂପେ ଅଭ୍ୟସ୍ତ ଥିଲେ। ତେଣୁ ତାଙ୍କୁ ପୁଣି ଥରେ ଦାୟିତ୍ୱ ଦେବା ଲାଗି ଆମେ ନିଷ୍ପତ୍ତି ନେଇଥିଲୁ।
