ଭୁବନେଶ୍ୱର, ୧୬।୧୧(ବ୍ୟୁରୋ)/ ଆଠଗଡ଼(ସ୍ବ.ପ୍ର): ଆଠଗଡ଼ ବନଖଣ୍ଡ ଅଧୀନ ସୁବାସୀ ସଂରକ୍ଷିତ ଜଙ୍ଗଲରେ ଶିକାରୀ ଗୁଳିରେ ମୃତ ଦନ୍ତା ହାତୀକୁ ତରବରିଆ ଭାବେ ପୋତିଦିଆଯିବା ଘଟଣାରେ ବିଭାଗୀୟ କାର୍ଯ୍ୟାନୁଷ୍ଠାନ ହୋଇଛି। ଆଠଗଡ଼ ବନାଞ୍ଚଳ ଅଧିକାରୀ (ରେଞ୍ଜର) ଆୟେଶା ଅକ୍ତରୀ ନିଶାଙ୍କୁ ସୋମବାର କାର୍ଯ୍ୟରୁ ନିଲମ୍ବନ କରାଯାଇଛି। ଜଙ୍ଗଲ, ପରିବେଶ ଓ ଜଳବାୟୂ ପରିବର୍ତ୍ତନ ବିଭାଗ ପକ୍ଷରୁ ନିର୍ଦ୍ଦେଶନାମା ଜାରି ହେବା ପରେ ଆଠଗଡ଼ ବନଖଣ୍ଡ ଅଧିକାରୀ (ଡିଏଫ୍ଓ) ଏହି ପଦକ୍ଷେପ ନେଇଛନ୍ତି। ଅନୁଗୋଳ ଆଞ୍ଚଳିକ ମୁଖ୍ୟ ବନ ସଂରକ୍ଷକ (ଆର୍ସିସିଏଫ୍) ଅକ୍ଷୟ ପଟ୍ଟନାୟକଙ୍କ ତଦନ୍ତ ରିପୋର୍ଟକୁ ଆଧାରକରି ବିଭାଗ ଆୟେଶାଙ୍କୁ ନିଲମ୍ବିତ କରିଛି। ନିଲମ୍ବନ ସମୟରେ ସେ କର୍ତ୍ତୃପକ୍ଷଙ୍କ ବିନାନୁମତିରେ ମୁଖ୍ୟ ସଦର ମହକୁମା ଛାଡ଼ିପାରିବେ ନାହିଁ ବୋଲି ନିର୍ଦ୍ଦେଶ ଦିଆଯାଇଛି।
୨୦୨୦ ଅଗଷ୍ଟରେ ସୁବାସୀ ସଂରକ୍ଷିତ ଜଙ୍ଗଲରେ ଶିକାରୀମାନେ ଏକ ଦନ୍ତାହାତୀକୁ ଗୁଳି କରିଥିଲେ। ଏହି ଘଟଣାକୁ ଚପାଇଦେବାକୁ ଉଦ୍ୟମ ହୋଇଥିଲା। ମୃତ ହାତୀକୁ ଏକ ଗାତରେ ପୋତି ଦିଆଯାଇଥିଲା ଏବଂ ଦୁଇଟି ଦାନ୍ତକୁ କଢ଼ାଯାଇ ବନାଞ୍ଚଳ କାର୍ଯ୍ୟାଳୟରେ ସିଲ୍ କରି ଲକର ଭିତରେ ରଖାଯାଇଥିଲା। ବର୍ଷେ ପରେ ଅର୍ଥାତ୍ ଗତ କିଛିଦିନ ତଳେ ଗାତରେ ପୋତାଯିବାର ଏକ ଭିଡିଓ ଭାଇରାଲ ହେବା ପରେ ଏହି ଘଟଣା ସାମ୍ନାକୁ ଆସିଥିଲା। ଏହାର ତଦନ୍ତ ପାଇଁ ଅକ୍ଷୟ ପଟ୍ଟନାୟକଙ୍କୁ ଦାୟିତ୍ୱ ଦିଆଯାଇଥିଲା। ତଦନ୍ତ ଅଧିକାରୀ ପଟ୍ଟନାୟକ ବନାଞ୍ଚଳ ଅଧିକାରୀ ଆୟେଶାଙ୍କୁ ପଚରାଉଚରା କରିବା ସହିତ ତଦନ୍ତ ରିପୋର୍ଟ ପିସିସିଏଫ୍(ବନ୍ୟପ୍ରାଣୀ)ଙ୍କୁ ଦେଇଥିଲେ। ଉକ୍ତ ରିପୋର୍ଟ ଆଧାରରେ ଆୟେଶାଙ୍କୁ ନିଲମ୍ବିତ କରାଯାଇଛି। ତେବେ ଏହି କାର୍ଯ୍ୟାନୁଷ୍ଠାନକୁ ବନ୍ୟପ୍ରାଣୀ ବିଶେଷଜ୍ଞମାନେ ନାପସନ୍ଦ କରିଛନ୍ତି। ସେମାନଙ୍କ କହିବାନୁସାରେ, ରେଞ୍ଜର ଯଦିଓ ଭୁଲ୍ କରିଥିଲେ, କିନ୍ତୁ ଏଥିରେ ଉଚ୍ଚ ପଦସ୍ଥ ଅଧିକାରୀ ମଧ୍ୟ ନିଶ୍ଚୟ ସାମିଲ ଥିବେ। ଜଣେ ରେଞ୍ଜର ଉଚ୍ଚ ଅଧିକାରୀଙ୍କ ବିନାନୁମତିରେ ଏଭଳି କରି ନ ଥିବେ। ସେପଟେ ତଦନ୍ତବେଳେ ମଧ୍ୟ ରେଞ୍ଜର ଆୟେଶା ତତ୍କାଳୀନ ଆଠଗଡ଼ ଡିଏଫ୍ଓଙ୍କ ନାଁ କହିଥିଲେ। ତତ୍କାଳୀନ ଡିଏଫ୍ଓଙ୍କୁ ବ୍ୟବଚ୍ଛେଦ ରିପୋର୍ଟ ଓ ଅନ୍ୟସବୁ ନଥିପତ୍ର ହାତେ ହାତେ ଦେଇଥିଲେ ଏବଂ ଡିଏଫ୍ଓଙ୍କ ନିର୍ଦ୍ଦେଶରେ ହିଁ ଏହା କରିଥିଲେ ବୋଲି ସେ ତଦନ୍ତକାରୀ ଅଧିକାରୀଙ୍କୁ କହିଥିଲେ। କିନ୍ତୁ ଡିଏଫ୍ଓ ଏହାକୁ ଏଡାଇଯାଇଥିଲେ। ତେଣୁ ରେଞ୍ଜର ଏହି ଘଟଣାରେ ଫସିଯାଇଥିଲେ। କୌଣସି ତଥ୍ୟ ଭିତ୍ତିକ ପ୍ରମାଣ ନ ଥିବା ଯୋଗୁ ଓ ରାଜ୍ୟ ସରକାରଙ୍କ ଉଚ୍ଚ ପଦରେ ରହିଥିବା ତତ୍କାଳୀନ ଡିଏଫ୍ଓଙ୍କର ବନ ବିଭାଗରେ ପ୍ରଭାବ ରହିଥିବାରୁ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇପାରିଲା ନାହିଁ ବୋଲି ବନ୍ୟପ୍ରାଣୀ ବିଶେଷଜ୍ଞମାନେ କହୁଛନ୍ତି।
