ମୁମ୍ବାଇ,୮।୨: ଶିବସେନା (ୟୁବିଟି) ନେତା ତଥା ମହାରାଷ୍ଟ୍ରର ପୂର୍ବତନ ମନ୍ତ୍ରୀ ତଥା ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ପୁଅ ଆଦିତ୍ୟ ଠାକରେ ବୁଧବାର ଶିନ୍ଦେ ସରକାରଙ୍କ ଉପରେ ବର୍ଷିଛନ୍ତି। ସେ କହିଛନ୍ତି, ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ନେତୃତ୍ୱରେ ରାଜ୍ୟ ସରକାର ଅଧିକ ଦିନ ତିଷ୍ଠି ରହିବ ନାହିଁ ଏବଂ ଏହା ଖୁବ ଶୀଘ୍ର ପତନ ହେବ। ଜଲନା ଜିଲାର ବଦନାପୁରରେ ‘ଶିବ ସମ୍ବାଦ ଯାତ୍ରା’ ସମୟରେ ସେ ଏହି କଥା କହିଛନ୍ତି। ଆଦିତ୍ୟ ଠାକରେଙ୍କ ଏହି ବିବୃତ୍ତି ଫେବୃଆରୀ ୧୪ରେ ସୁପ୍ରିମକୋର୍ଟଙ୍କ ଦ୍ୱାରା ୧୬ ଶିବସେନା ବିଦ୍ରୋହୀ ବିଧାୟକଙ୍କ ଅଯୋଗ୍ୟତା ସମ୍ପର୍କିତ ମାମଲାର ଶୁଣାଣି ପୂର୍ବରୁ ଆସିଛି।
ଆଦିତ୍ୟ ଠାକରେ ଆହୁରି ମଧ୍ୟ କହିଛନ୍ତି, ମହାରାଷ୍ଟ୍ରର ଲୋକମାନେ ଭଲ ଭାବରେ ଜାଣିଛନ୍ତି ଏହି ସରକାର ଅନ୍ୟାୟ ମାର୍ଗରେ ଚାଲୁଛନ୍ତି। ଏହି ଅସାମ୍ବିଧାନିକ ସରକାର ଅଧିକ ଦିନ ତିଷ୍ଠି ରହିବ ନାହିଁ। ଶିନ୍ଦେ-ଭାଜପା ସରକାର ଜନସାଧାରଣଙ୍କ ଟଙ୍କା ନଷ୍ଟ କରୁଛନ୍ତି। ଶିନ୍ଦେ ବିଶ୍ୱ ଅର୍ଥନୈତିକ ଫୋରମରେ ଯୋଗଦେବା ପାଇଁ ଡାଭୋସ ଗଲେ ଏବଂ କେବଳ ବରଫ ଦେଖିବା ପାଇଁ ୪୦ କୋଟି ଟଙ୍କା ଖର୍ଚ୍ଚ କରିଦେଲେ। ମୁଖ୍ୟମନ୍ତ୍ରୀ ମାତ୍ର ୨୮ ଘଣ୍ଟା ମଧ୍ୟରେ ୪୦ କୋଟି ଟଙ୍କା କିପରି ଖର୍ଚ୍ଚ କରିପାରିବେ ବୋଲି ଠାକରେ ପ୍ରଶ୍ନ କରିଛନ୍ତି।
ସୂଚନାଯୋଗ୍ୟ ଯେ, ଗତ ବର୍ଷ ଜୁନ ମାସରେ ଶିବସେନା ନେତା ଏକନାଥ ଶିନ୍ଦେଙ୍କ ବିଦ୍ରୋହ ପରେ ମହାରାଷ୍ଟ୍ରର ଉଦ୍ଧବ ଠାକରେଙ୍କ ନେତୃତ୍ୱାଧୀନ ଏମଭିଏ ସରକାର ପତନ ହୋଇଥିଲା। ଦଳର କିଛି ବିଧାୟକ ଏବଂ ଏମ୍ପିଙ୍କୁ ଭାଙ୍ଗି ସେ ଭାଜପା ସହ ମେଣ୍ଟ କରି ସରକାର ଗଠନ କରିଥିଲେ।
