ଜଳେଶ୍ୱର,୧୭ା୮(ନବୀନ ସାହୁ): ବାଲେଶ୍ୱର ଜିଲା ଜଳେଶ୍ୱର ବ୍ଲକ ଅନ୍ତର୍ଗତ ନେତୁଆ ପଞ୍ଚାୟତର କପାସଦା ଗ୍ରାମରେ ଏକ ଅତ୍ୟନ୍ତ ଦୁଃଖଦ ଘଟଣା ଘଟିଚି। ଘରେ ଶୋଇଥିବା ଅବସ୍ଥାରେ ହଠାତ୍ କାନ୍ଥ ଭୁଶୁଡ଼ି ପଡ଼ିବାରୁ ଚାପି ହୋଇ ଆଈ ଓ ନାତିଙ୍କର ମୃତ୍ୟୁ ଘଟିଥିବା ବେଳେ ନାତୁଣୀ ଗୁରୁତର ହୋଇଛନ୍ତି।
ସୂଚନା ଅନୁସାରେ, ରବିବାର ରାତିରେ ସ୍ବର୍ଗତଃ ନରେନ୍ଦ୍ର ଜେନାଙ୍କ ସ୍ତ୍ରୀ ରାଧିକା ଜେନା (୬୫) ଏବଂ ନାତି ଜ୍ୟୋତିପ୍ରକାଶ ସ୍ବାଇଁ (୧୭)ପରିବାରର ସଦସ୍ୟମାନେ ନିଜ ଘରେ ଶୋଇଥିଲେ। ଲଘୁଚାପ ଜନିତ ବର୍ଷା ଯୋଗୁ ମାଟି କାନ୍ଥ ଦୁର୍ବଳ ହୋଇଯିବା କାରଣରୁ କାନ୍ଥଟି ଭୁଶୁଡ଼ି ଶୋଇଥିବା ଲୋକଙ୍କ ଉପରେ ପଡ଼ିଥିଲା। କାନ୍ଥ ତଳେ ଚାପି ହୋଇ ଘଟଣାସ୍ଥଳରେ ହିଁ ଆଈ ରାଧିକା (୬୦) ଏବଂ ନାତି ଜ୍ୟୋତିପ୍ରକାଶ (୧୭)ଙ୍କୀ ଜୀବନ ଚାଲିଯାଇଥିଲା। କାନ୍ଥ ଭୁଶୁଡ଼ିବା ଶବ୍ଦ ଶୁଣି ସ୍ଥାନୀୟ ଲୋକେ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ମାଟି ଅଳିଆ ତଳୁ ଆହତ ନାତୁଣୀ ସ୍ମୃତିରେଖାଙ୍କୁ ଉଦ୍ଧାର କରାଯାଇ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ବର୍ତ୍ତମାନ ତାଙ୍କର ଚିକିତ୍ସା ଚାଲିଛି।
