ନୂଆଦିଲ୍ଲୀ,୧ା୯(କୁଲଦୀପ ସିଂ):ସେପ୍ଟେମ୍ବର ୧୮ରୁ ୨୨ ପର୍ଯ୍ୟନ୍ତ ପାର୍ଲାମେଣ୍ଟର ସ୍ବତନ୍ତ୍ର ଅଧିବେଶନ ଚାଲିବ ବୋଲି ଗୁରୁବାର କେନ୍ଦ୍ର ସରକାର ଘୋଷଣା କରିଛନ୍ତି। ଏହି ଘୋଷଣା ପରେ ମୋଦି ସରକାରଙ୍କ ଏଭଳି ଅପ୍ରତ୍ୟାଶିତ ପଦକ୍ଷେପ ପଛର କାରଣକୁ ନେଇ ନାନା କଳ୍ପନାଜଳ୍ପନା ପ୍ରକାଶ ପାଇବାରେ ଲାଗିଛି। ‘ଅମୃତ କାଳରେ’ ଆଲୋଚନା ଓ ବିତର୍କ ପାଇଁ ଏହି ଅଧିବେଶନ ଡକାଯାଇଥିବା ବିଷୟ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଜୋଷୀ ସୋସିଆଲ ମିଡିଆ ପ୍ଲାଟ୍ଫର୍ମ ଏକ୍ସ’ରେ ଉଲ୍ଲେଖ କରିଛନ୍ତି। ଜୋଷୀ ଯାହା କହିଛନ୍ତି, ସେଥିରୁ ଅଧିକ ସୂଚନା ସରକାରଙ୍କ କୌଣସି ଅଧିକାରୀ ଦେଇନାହାନ୍ତି। ତେବେ ସୂତ୍ରରୁ ଜଣାପଡ଼ିଛି ଯେ, ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼, ତେଲଙ୍ଗାନା ଓ ମିଜୋରାମ ବିଧାନସଭା ନିର୍ବାଚନ ପୂର୍ବରୁ ସରକାର ଏହି ଅଧିବେଶନକୁ ନିଜ ସଫଳତା ପ୍ରଚାର ପାଇଁ ବ୍ୟବହାର କରିପାରନ୍ତି। ଅଧିବେଶନର ୫ଟି କାର୍ଯ୍ୟଦିବସରେ ସରକାର ଚନ୍ଦ୍ରୟାନ-୩ ଏବଂ ଜି୨୦ ସମ୍ମିଳନୀର ସଫଳତା ବତାଇବା ସହ ଅମୃତକାଳ ପାଳନ ସମ୍ପର୍କରେ ଜଣାଇବେ। ଗୁରୁତ୍ୱପୂର୍ଣ୍ଣ ବିଧାନସଭା ନିର୍ବାଚନ ପୂର୍ବରୁ ଚନ୍ଦ୍ର ମିଶନ ଏବଂ ଜି୨୦ ସମିଟ୍ର ସଫଳତାକୁ ପ୍ରୋତ୍ସାହିତ କରିବା ପାଇଁ ଏହି ସ୍ବତନ୍ତ୍ର ଅଧିବେଶନ ସରକାରଙ୍କ ପାଇଁ ଏକ ପ୍ଲାଟ୍ଫର୍ମ ପାଲଟିବାକୁ ଯାଉଛି।
ସରକାରଙ୍କ ପକ୍ଷରୁ କୌଣସି ବିଲ୍ ଆଗତ ନେଇ ଘୋଷଣା କରାଯାଇ ନ ଥିଲେ ସୁଦ୍ଧା ‘ଏକ ଦେଶ, ଏକ ନିର୍ବାଚନ’ କରାଇବା ପାଇଁ ଏହି ଅଧିବେଶନ ଡକାଯାଇଥିବା ଆଲୋଚନା ହେଉଛି। ଦେଶବ୍ୟାପୀ ଏକକାଳୀନ ଲୋକ ସଭା ଓ ବିଧାନସଭା ନିର୍ବାଚନ କରାଇବା ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୋର୍ ଦେଇଆସୁଛନ୍ତି। ଏକସଙ୍ଗେ ନିର୍ବାଚନ କରାଯିବା ଦ୍ୱାରା ଖର୍ଚ୍ଚ ଓ ପ୍ରଶାସନିକ ବୋଝ କମିଯିବ ବୋଲି ମୋଦି ଅନେକ ସମୟରେ କହିଥାନ୍ତି। ଏହାଦ୍ୱାରା ବିକାଶ କାର୍ଯ୍ୟ ବାଧାପ୍ରାପ୍ତ ହେଉଥିବା ମୋଦି ଗତ ବର୍ଷ ଜାନୁୟାରୀରେ କହିଥିଲେ।
ସେହିପରି ମହିଳା ସଂରକ୍ଷଣ ବିଲ୍କୁ ନେଇ ମଧ୍ୟ ଚର୍ଚ୍ଚା ହେଉଛି। ଲୋକ ସଭା ଓ ବିଧାନସଭାଗୁଡ଼ିକରେ ମହିଳାମାନଙ୍କୁ ୩୩% ସଂରକ୍ଷଣ ଦେବା ପାଇଁ ଉଦ୍ଦିଷ୍ଟ ଏହି ବିଧେୟକକୁ ସରକାର ଲୋକ ସଭାରେ ଆଗତ କରିପାରନ୍ତି। କାରଣ ଏହା ଉପରେ ପ୍ରାୟ ସବୁ ଦଳର ଆଭିମୁଖ୍ୟ ସମାନ ରହିଛି। ଆଉ ଏକ ଗୁରୁତ୍ୱପୂର୍ଣ୍ଣ କଥା ହେଉଛି ନିର୍ବାଚନରେ ମହିଳାଙ୍କ ଯୋଗଦାନକୁ ସରକାର ଅଣଦେଖା କରିପାରିବେ ନାହିଁ। ଭାରତର ନିର୍ବାଚନ କମିଶନ(ଇସିଆଇ)ଙ୍କ ସୂତ୍ରରୁ ମିଳିଥିବା ତଥ୍ୟାନୁସାରେ ୨୦୧୯ ଲୋକ ସଭା ନିର୍ବାଚନରେ ମହିଳା ଭୋଟରଙ୍କ ମତଦାନ ବଢ଼ିଥିଲା। ମହିଳାମାନେ ୬୭.୧୮% ମତଦାନ କରିଥିବାବେଳେ ପୁରୁଷ ମତଦାତାଙ୍କ ସଂଖ୍ୟା ୬୭.୦୧% ରହିଥିଲା। ନିର୍ବାଚନରେ ମହିଳାମାନେ ଅଧିକରୁ ଅଧିକ ଭାଗନେଉଥିବାରୁ ନିମ୍ନ ସଦନରେ ମହିଳା ବିଲ୍ ଆଗତ କରିବା ସରକାରଙ୍କ ପାଇଁ ଜରୁରୀ ହୋଇପଡ଼ିଛି। ଏହି ବିଲ୍ ରାଜ୍ୟ ସଭାରେ ପାରିତ ହୋଇଛି। ସେହିପରି ଜମ୍ମୁ-କଶ୍ମୀରରେ ନିର୍ବାଚନ କରାଇବା ପାଇଁ ସରକାର ପ୍ରସ୍ତୁତ ଥିବା ବିଷୟ ସଲିସିଟର ଜେନେରାଲ ତୁଷାର ମେହେଟ୍ଟା ସୁପ୍ରିମକୋର୍ଟଙ୍କୁ ଜଣାଇଥିବାବେଳେ ଏହା ଉପରେ ମଧ୍ୟ କିଛି ନିଷ୍ପତ୍ତି ହୋଇପାରେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଶିଳ୍ପପତି ଗୌତମ ଆଦାନୀ (ମୋଦାନୀ)ଙ୍କ ସମ୍ପର୍କକୁ ନେଇ ସଦ୍ୟ ପ୍ରଘଟ ପରେ ଏହି ଖବର ସାମ୍ନାକୁ ଆସିଛି। ମୁମ୍ବାଇରେ ବିରୋଧୀ ବ୍ଲକ୍ ଇଣ୍ଡିଆର ବୈଠକ ଚାଲିଥିବାବେଳେ କିପରି ଏହାର ମୁକାବିଲା କରାଯିବ। ତେଣୁ ୫ ଦିନିଆ ଅଧିବେଶନ ଡକାଯାଇଥିବା ବରିଷ୍ଠ କଂଗ୍ରେସ ନେତା ଜୟରାମ ରମେଶ ସମାଲୋଚନା କରିଛନ୍ତି।
