ଥୁଆମୂଳ ରାମପୁର,୨।୫(ଦୁର୍ଗା କୀର୍ତ୍ତି): ବଡ଼ ବଡ଼ କମ୍ପାନୀର ବେପରୁଆ କାର୍ଯ୍ୟଶୈଳୀ କେମିତି ଜଣେ ଗରିବ ପରିବାରର ହସଖୁସି ଛଡ଼ାଇ ନିଏ, ତାହାର କରୁଣ ଚିତ୍ର ଦେଖିବାକୁ ମିଳିଛି କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଗୁଣୁପୁର ପଞ୍ଚାୟତର ରଣପୁର ଗ୍ରାମରେ। ଜିଓ କମ୍ପାନୀ ଖୋଳିଥିବା ଗାତରେ ପଡ଼ି ଅଣ୍ଟା ହାଡ଼ ଭାଙ୍ଗିଯିବା ପରେ ଆଜି ପରିବାରର ଏକମାତ୍ର ରୋଜଗାରିଆ ପୁଅ ନେକା ମାଝୀ (୩୪) ଦୀର୍ଘ ଦିନ ଧରି ଖଟରେ ପଡ଼ିଛନ୍ତି। ଅର୍ଥ ଅଭାବରୁ ଉତ୍ତମ ଚିକିତ୍ସା ହୋଇପାରୁ ନଥିବା ବେଳେ ପରିବାର ପ୍ରତିପୋଷଣ ଏବେ ଅନ୍ଧାର ଭିତରକୁ ଠେଲି ହୋଇଯାଇଛି।
ସୂଚନା ମୁତାବକ, ଗତ କିଛି ଦିନ ତଳେ ଗଣମାଧ୍ୟମରେ ଖବର ପ୍ରସାର ପରେ ଜିଓ କମ୍ପାନୀ JCB ଲଗାଇ ଗାତଗୁଡ଼ିକୁ ପୋତି ଦେଇଛି ସତ, କିନ୍ତୁ ସେହି ଗାତ ଯୋଗୁ ନଷ୍ଟ ହୋଇଯାଇଥିବା ନେକାଙ୍କ ଜୀବନ ପ୍ରତି କମ୍ପାନୀ ସମ୍ପୂର୍ଣ୍ଣ ଆଖି ବୁଜି ଦେଇଛି। କାମ ସାରି ଫେରୁଥିବା ବେଳେ ଗଭୀର ଗାତରେ ପଡ଼ି ନେକାଙ୍କ ଅଣ୍ଟା ଏବଂ ଜଙ୍ଘ ହାଡ଼ ସମ୍ପୂର୍ଣ୍ଣ ଭାଙ୍ଗି ଯାଇଛି। ଜିଲା ମୁଖ୍ୟ ଚିକିତ୍ସାଳୟରୁ ତାଙ୍କୁ ବୁର୍ଲା ବଡ଼ ଡାକ୍ତରଖାନାକୁ ରେଫର କରାଯାଇଥିଲେ ହେଁ, ଅର୍ଥ ସାଜିଛି ବଡ଼ ବାଧକ। ଗରିବ ଶ୍ରେଣୀର ହୋଇଥିବାରୁ ଚିକିତ୍ସା ଖର୍ଚ୍ଚ ତୁଲାଇବା ନେକାଙ୍କ ବୃଦ୍ଧ ପିତାମାତାଙ୍କ ପକ୍ଷେ ଅସମ୍ଭବ ହୋଇପଡ଼ିଛି।
ଆଶ୍ଚର୍ଯ୍ୟର ବିଷୟ, ଏହି ଘଟଣା ସମ୍ପର୍କରେ ଜିଲା ପ୍ରଶାସନଙ୍କ ଜନ ଅଭିଯୋଗ ଶୁଣାଣିରେ ଫେରାଦ ହୋଇଥିଲେ ସୁଦ୍ଧା ଏପର୍ଯ୍ୟନ୍ତ କୌଣସି ସୁଫଳ ମିଳିନାହିଁ। ବିଶେଷ କରି ରଣପୁର ଗ୍ରାମ ଯେଉଁ ଗୁଣୁପୁର ପଞ୍ଚାୟତ ଅଧୀନରେ ଆସୁଛି, ସେଠାକାର ସମିତି ସଭ୍ୟ, ସରପଞ୍ଚ, ଜିଲା ପରିଷଦ ଏବଂ ବ୍ଲକ ଅଧ୍ୟକ୍ଷ ମଧ୍ୟ ସେହି ସମାନ ଅଞ୍ଚଳର ହୋଇଥିବା ସତ୍ତ୍ୱେ ଜଣେ ଅସହାୟ ଯୁବକଙ୍କ ପାଇଁ ସ୍ବର ଉତ୍ତୋଳନ ନକରିବା ଦୁର୍ଭାଗ୍ୟଜନକ। ଲୋକଙ୍କ ଭୋଟ୍ରେ ଜିତିଥିବା ଏହି ଜନପ୍ରତିନିଧିମାନେ କେବେ ନେକାଙ୍କ ପାଖରେ ପହଞ୍ଚିବେ ବୋଲି ଗ୍ରାମବାସୀ ପ୍ରଶ୍ନ କରିଛନ୍ତି।
ରାଜ୍ୟରେ ଏବେ ‘ଡବଲ ଇଞ୍ଜିନ’ ସରକାର ଥିବା ବେଳେ ଗରିବଙ୍କୁ ଉଚିତ୍ ନ୍ୟାୟ ମିଳିବ ବୋଲି ଆଶା କରାଯାଉଛି। ତେଣୁ ଜିଲା ପ୍ରଶାସନ କିମ୍ବା ଶାସକ ଦଳର ନେତୃତ୍ୱ ଏହି ଘଟଣାରେ ତୁରନ୍ତ ହସ୍ତକ୍ଷେପ କରି ନେକାଙ୍କୁ ଉଚ୍ଚକୋଟୀର ଚିକିତ୍ସା ସୁବିଧା ଯୋଗାଇ ଦେବା ସହ ଜିଓ କମ୍ପାନୀ ପକ୍ଷରୁ ଉପଯୁକ୍ତ କ୍ଷତିପୂରଣ ପ୍ରଦାନ ପାଇଁ ଗ୍ରାମବାସୀ ଦୃଢ଼ ଦାବି କରିଛନ୍ତି। ଯଦି ଶୀଘ୍ର ପଦକ୍ଷେପ ନିଆନଯାଏ, ତେବେ ଆଗାମୀ ଦିନରେ ଏହି ଅଭିଯାନ ଆହୁରି ତୀବ୍ର ହେବ ବୋଲି ଚେତାବନୀ ଦିଆଯାଇଛି।
Dharitri – Odisha’s No.1 Odia Daily
