ସମ୍ବଲପୁର,୧୨।୫(ପ୍ରମୋଦ ବହିଦାର): କିଛିଦିନ ବ୍ୟବଧାନରେ ଭାଲୁପାଲି ଛକରେ ପୁଣି ଦୁର୍ଘଟଣାରେ ଜଣେ ବ୍ୟକ୍ତି ପ୍ରାଣ ହରାଇଛନ୍ତି। ସୋମବାର ଅପରାହ୍ନରେ ଏକ ବୁଲେଟ ଧକ୍କାରେ ଗୁରୁତର ଆହତ ସମଲେଇ ମନ୍ଦିର ଝାଁକରଙ୍କ ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ଭୋରରେ ମୃତ୍ୟୁ ଘଟିଛି। ସେ ହେଉଛନ୍ତି ଅଇଁଠାପାଲି ଥାନା ଅନ୍ତର୍ଗତ ବୈଦରନୁଆପାଲି ସମଲେଇ ମନ୍ଦିରର ଝାଁକର କୃଷ୍ଣଚନ୍ଦ୍ର ପଟ୍ଟା(୬୮)।
ବିଜୁ ଏକ୍ସପ୍ରେସ ୱେ(ରାଜ ରାଜପଥ-୧୦)ର ଭାଲୁପାଲି ଛକରେ ରାସ୍ତା ପାରି ହେଉଥିବାବେଳେ ଦ୍ରୁତଗତିରେ ଆସି ଏକ ବୁଲେଟ ତାଙ୍କୁ ଧକ୍କା ଦେଇଥିଲା। ଫଳରେ ତାଙ୍କର ଦୁଇ ଗୋଡ଼ ଭାଙ୍ଗି ଯାଇଥିବା ବେଳେ ମୁଣ୍ଡରେ ଗଭୀର ଆଘାତ ଲାଗିଥିଲା। ଦୁର୍ଘଟଣା ପରେ ତାଙ୍କୁ ପ୍ରଥମେ ସ୍ଥାନୀୟ ବିକାଶ ହସ୍ପିଟାଲରେ ଭର୍ତ୍ତି କରାଯାଇଥିଲା। ତେବେ ତାଙ୍କର ଅବସ୍ଥା ସଙ୍କଟାପନ୍ନ ହେବାରୁ ପରିବାର ଲୋକଙ୍କ ଅନୁରୋଧ କ୍ରମେ ତାଙ୍କୁ ବୁର୍ଲା ଭିମସାରକୁ ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କୁ ବଞ୍ଚାଇବା ପାଇଁ ଚିକିତ୍ସା କରୁଥିବା ଡାକ୍ତରଙ୍କ ସମସ୍ତ ପ୍ରୟାସ ବିଫଳ ହୋଇ ପରିଶେଷରେ ମଙ୍ଗଳବାର ଭୋର ୫ଟା ୨୦ ମିନିଟରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବୁଲେଟ(ଓଡି-୧୬-ଏନ-୬୫୬୯)କୁ ଥାନାକୁ ନେଇ ଅଟକ ରଖଛି । ବୁଲେଟ ଆରୋହୀ ଦ୍ୱୟ ଝାରସୁଗୁଡା ଜିଲା କୋଲାବିରାର ରାହୁଲ ରାୟ ଓ ତାଙ୍କ ପିତା ବୋଲି ଜଣାପଡିଛି ।
ସୂଚନାଯୋଗ୍ୟ ଯେ, ସେ ବୈଦାରନୁଆପାଲି ସମଲେଇ ଗୁଡିର ଝାଁଙ୍କର ଭାବେ ପରିଚିତ କୃଷ୍ଣଚନ୍ଦ୍ର ଗ୍ରାମର କୀର୍ତ୍ତନ ମଣ୍ଡଳୀରେ ସେ ଜଣେ ଜଣାଶୁଣା ଖୋଳ ବାଦକ ମଧ୍ୟ ଥିଲେ। ମୃତକ କୃଷ୍ଣଚନ୍ଦ୍ର ତାଙ୍କ ପଛରେ ତାଙ୍କ ପତ୍ନୀ ସୁଭଦ୍ରା ପଟ୍ଟା, ଦୁଇ ବିବାହିତ ଝିଅ ଓ ଜଣେ ଅବିବାହିତ ଝିଅଙ୍କୁ ଛାଡ଼ି ଯାଇଛନ୍ତି। ଜଣେ ପରୋପକାରୀ ତଥା ଧର୍ମପରାୟଣ ବ୍ୟକ୍ତିଙ୍କ ବିୟୋଗରେ ବୈଦରନୁଆପାଲି ସମେତ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି।
Dharitri – Odisha’s No.1 Odia Daily
