ଭୁବନେଶ୍ୱର,୧୭ା୨(ବ୍ୟୁରୋ):ଶକ୍ତି କ୍ଷେତ୍ରରେ ଉପଲବ୍ଧି ଏବଂ ଦରରେ ସନ୍ତୁଳନ ଆଣିବା ଲାଗି ଭାରତ ଊର୍ଜା ନ୍ୟାୟର ଏକ ବିଶ୍ୱସ୍ତରୀୟ ମଡେଲ ତିଆରି କରୁଛି। ସବୁଜ ଶକ୍ତି ରୂପାନ୍ତର ପାଇଁ ଋଣନୀତି ପ୍ରସ୍ତୁତ କରାଯାଉଛି ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ମଙ୍ଗଳବାର ଡିଜିଟାଲ ମୋଡ୍ରେ ଆୟୋଜିତ ୧୧ତମ ବିଶ୍ୱ ପ୍ରୋଟୋକଲ କଂଗ୍ରେସ ଓ ବିଶ୍ୱ ଭବିଷ୍ୟତ ଇନ୍ଧନ ସମ୍ମିଳନୀ-୨୦୨୧ ଆଲୋଚନାରେ ଅଂଶଗ୍ରହଣ କରି ସେ ଏହି ସୂଚନା ଦେଇଛନ୍ତି। ଭବିଷ୍ୟତରେ ଭାରତର ଶକ୍ତି ଚାହିଦା ବୃଦ୍ଧି ପାଇବ। ସବୁଜ ଶକ୍ତିର ଅଧିକ ବ୍ୟବହାର ଏବଂ ପ୍ରଦୂଷଣ ହ୍ରାସ କରିବା ଲାଗି ଏବେଠାରୁ ସରକାର ଅନେକ ପଦକ୍ଷେପ ନେଉଛନ୍ତି। ୨୦୪୦ ସୁଦ୍ଧା ବିଶ୍ୱରେ ମୋଟ ପ୍ରାଥମିକ ଶକ୍ତିର ଚାହିଦା ବାର୍ଷିକ ୧%ରୁ କମ୍ ବୃଦ୍ଧି ପାଇପାରେ। ହେଲେ ଭାରତର ଏହା ୩% ଯାଏ ବୃଦ୍ଧି ପାଇବ ବୋଲି ଅନ୍ତର୍ଜାତୀୟ ଶକ୍ତି ସଂସ୍ଥା, ଓପେକ ଏବଂ ବ୍ରିଟିଶ ପେଟ୍ରୋଲିୟମ୍ର ରିପୋର୍ଟରେ ଆକଳନ କରାଯାଇଛି। ଗତ ୬ ବର୍ଷରେ ଏଲ୍ପିଜି ଦୃଶ୍ୟପଟ ପରିବର୍ତ୍ତନ ହୋଇଛି। ୨୦୧୪ରେ ଏଲ୍ପିଜି ଉପଭୋକ୍ତା ସଂଖ୍ୟା ୧୪.୫ କୋଟି ଥିବାବେଳେ ୨୦୨୧ରେ ଏହା ୨୯ କୋଟିରେ ପହଞ୍ଚତ୍ଛି। ଏଲ୍ପିଜି କଭରେଜ୍ ୫୬ ପ୍ରତିଶତରୁ ବଢ଼ି ୯୯.୫ ପ୍ରତିଶତ ହୋଇଛି। ଉଜ୍ଜ୍ୱଳା ଯୋଜନାରେ ୮ କୋଟି ବିପିଏଲ୍ ପରିବାରକୁ ଗ୍ୟାସ୍ ଦିଆଯାଇଛି। ଏହା ମହିଳାଙ୍କ ସାମାଜିକ ଓ ଅର୍ଥନୀତିକୁ ପରିବର୍ତ୍ତନ କରିବା ସହ ସଶକ୍ତୀକରଣ ମଧ୍ୟ କରିପାରିଛି। ଚଳିତ ସାଧାରଣ ବଜେଟରେ ଉଜ୍ଜ୍ୱଳା ଯୋଜନାରେ ଅଧିକ ୧ କୋଟି ହିତାଧିକାରୀଙ୍କୁ ଯୋଡ଼ିବା ଲାଗି ଘୋଷଣା କରାଯାଇଛି। ଏହା ସର୍ବଭାରତୀୟସ୍ତରରେ କଭରେଜ୍ ହାସଲ କରିବାରେ ସହାୟକ ହେବ ବୋଲି ଧର୍ମେନ୍ଦ୍ର କହିଛନ୍ତି।
