ଲାଞ୍ଜିଗଡ଼,୨୫ା୪(ରମେଶ ଚନ୍ଦ୍ର ନାୟକ) : ଲାଞ୍ଜିଗଡ ବ୍ଲକ ବିଜେପୁର ଥାନା ଅଞ୍ଚଳର ନାବାଳିକା ଅପହରଣ ମାମଲାରେ ପୋଲିସ ଅଭିଯୁକ୍ତଙ୍କୁ ଗିରଫ କରି ଶନିବାର କୋର୍ଟ ଚାଲାଣ କରିଛି। ସେ ହେଲେ ବିଜେପୁର ଥାନା ଗୋପିଗୁଡା ଗ୍ରାମର କୁମର ନାଏକ (୨୫)। ସୂଚନାନୁସାରେ ନାବାଳିକା ଜଣକ ନବମ ଶ୍ରେଣୀରେ ପଢୁଥିଲା ବେଳେ ଦୁହିଁଙ୍କ ମଧ୍ୟରେ ପ୍ରେମ ସମ୍ପର୍କ ଗଢିଉଠିଥିଲା। ଗତ ୨୧ ଅକ୍ଟୋବର ୨୦୨୪ରେ ଦୁଇଜଣ ମିଶି ଭୁବନେଶ୍ୱର ବୁଲିବାକୁ ଯାଇଥିବା ବେଳେ ପରିବାର ଲୋକେ ସେମାନଙ୍କୁ ଫେରାଇ ଆଣି ବୁଝାଶୁଝା କରିଥିଲେ। ପରେ କୁମର ୨୩ ଅକ୍ଟୋବର ୨୦୨୪ରେ ବାଙ୍ଗାଲୋର ଯାଇ ସିକ୍ୟୁରିଟି ଗାର୍ଡ ଭାବେ କାମ କରୁଥିଲେ। ଉଭୟଙ୍କ ମଧ୍ୟରେ ଫୋନରେ ଯୋଗାଯୋଗ ରହୁଥିଲା। ଏପରିସ୍ଥଳେ ୧ ଜାନୁଆରୀ ୨୦୨୫ ରାତିରେ ଝିଅ ନୂଆବର୍ଷ ପାଳନ କରୁଥିଲା ବେଳେ କୁମର ଗାଁକୁ ଆସି ତାଙ୍କ ପାଖକୁ ଯାଇଥିଲେ। କଥାବାର୍ତ୍ତା ପରେ ଉଭୟ ସେହି ଦିନ ରାତିରେ ବାଙ୍ଗାଲୋର ପଳାଇଥିଲେ। ଝିଅର ବାପା ଏହା ଜାଣିବା ପରେ ୯ ଜାନୁୟାରୀ ୨୦୨୫ରେ ବିଜେପୁର ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ଅଭିଯୋଗ ଆଧାରରେ ଏକ ଅପହରଣ ମାମଲା (ନଂ.୨/୨୫) ରୁଜୁ କରି ତଦନ୍ତ ଚଳାଇଥିଲା। ଶୁକ୍ରବାର ଉଭୟେ ଗୋପିଗୁଡା ଆସିଥିବା ଖବର ପାଇ ଥାନାଧିକାରୀ ନୀଳାମ୍ବର ଜାନିଙ୍କ ନେତୃତ୍ୱରେ ପୋଲିସ ବଳ ସେମାନଙ୍କୁ ଧରି ଥାନାକୁ ଆଣିଥିଲେ। ତଦନ୍ତ ପରେ ପୋଲିସ ଜାଣିବାକୁ ପାଇଲା ଯେ, ବିବାହ ପ୍ରତିଶ୍ରୁତି ଦେଇ କୁମର ଶାରୀରିକ ସମ୍ପର୍କ ରଖିଥିବା ବେଳେ ନାବାଳିକା ଜଣକ ବର୍ତ୍ତମାନ ଗର୍ଭବତୀ ଅଛନ୍ତି। ଶୁକ୍ରବାର ଲାଞ୍ଜିଗଡ଼ଠାରେ ଅଭିଯୁକ୍ତ କୁମରଙ୍କ ଡାକ୍ତରୀ ପରୀକ୍ଷା କରାଯାଇ ବିଜେପୁର ଥାନାକୁ ନେଇଥିବା ବେଳେ ନାବାଳିକା ପୀଡିତାଙ୍କୁ ଭବାନୀପାଟଣାଠାରେ ଡାକ୍ତରୀ ପରୀକ୍ଷା କରାଯାଇ ପୋକ୍ସୋ କୋର୍ଟରେ ହାଜର କରାଯାଇ ସୁଧାର ଗୃହରେ ଛଡ଼ାଯାଇଥିଲା। ଶନିବାର ଅଭିଯୁକ୍ତ କୁମରଙ୍କୁ କୋର୍ଟ ଚାଲାଣ କରାଯାଇଥିବା ଥାନାଧିକାରୀ ଜାନି ପ୍ରକାଶ କରିଛନ୍ତି ।
