କଟକ ଅଫିସ, ୩।୯: କଟକ ସ୍ବତନ୍ତ୍ର ପୋକ୍ସୋ କୋର୍ଟ ବିଚାରପତି ସୁବାସ କୁମାର ବିହାରୀଙ୍କ ଆତ୍ମହତ୍ୟା ମାମଲା ନୂଆ ମୋଡ଼ ନେଇଛି। ସୁବାସଙ୍କ ପରିବାର ମା’ ଓ ଭାଇ ତାଙ୍କ ଆତ୍ମହତ୍ୟାକୁ ସହଜରେ ଗ୍ରହଣ କରିପାରୁ ନାହାନ୍ତି। ଏହା ଆତ୍ମହତ୍ୟା ନୁହେଁ, ପୁଅକୁ ହତ୍ୟା କରାଯାଇଥିବା ମା’ ଅଭିଯୋଗ କରିଛନ୍ତି। ସୁବାସଙ୍କୁ ତାଙ୍କ ସ୍ତ୍ରୀ ଓ ଶଳା ହତ୍ୟା କରି ଆତ୍ମହତ୍ୟାର ରୂପ ଦେଇଥିବା ପରିବାର ଲୋକେ କହିଛନ୍ତି। ଯାଜପୁରରୁ କଟକରେ ପହଞ୍ଚିବା ପରେ ସେମାନେ ମର୍କତ ନଗର ଥାନାରେ ଏତଲା ମଧ୍ୟ ଦେଇଛନ୍ତି।
ସୁବାସଙ୍କ ମା’ କହିଛନ୍ତି, ତାଙ୍କ ପୁଅକୁ ମାରି ଦିଆଯାଇଛି। ବୋହୂ ଓ ଶଳା ଏହି କାଣ୍ଡ ଘଟାଇଛନ୍ତି। ପୁଅ ବାହା ହେବା ପରେ ଶ୍ୱଶୁର ଘରେ ରହୁଥିଲା। ଘରକୁ ସ୍ତ୍ରୀ ଓ ଶଳା ପୁଅକୁ ଛାଡୁନଥିଲେ । ପୁଅକୁ ତାଙ୍କ ସହ କଥା କରାଇ ଦେଉ ନ ଥିଲେ। କଥା ହେଲେ ପୁଅ ନାଁରେ କେସ କରିବେ ବୋଲି ଧମକ ଦେଉଥିଲେ। ସେହି ତାଙ୍କ ଭାଇ ମଧ୍ୟ ପାରିବାରିକ କଳହ କଥା କହି ତାଙ୍କୁ ହତ୍ୟା କରାଯାଇଥିବା କହିଛନ୍ତି।
