ଚଣ୍ଡିଗଡ଼,୧୪ା୮: ହରିୟାଣାର ନୁହ ଜିଲାରେ ଗତ ମାସ ୩୧ରେ ଘଟିଥିବା ହିଂସାତ୍ମକ ସଂଘର୍ଷ ଘଟଣା ଉପରେ ଆଲୋଚନା ପାଇଁ ରବିବାର ପାଲଓ୍ବାଲଠାରେ ସର୍ବ ହିନ୍ଦୁ ସମାଜ ପକ୍ଷରୁ ଏକ ମହାପଞ୍ଚାୟତର ଆୟୋଜନ କରାଯାଇଥିଲା। ବିଶ୍ୱ ହିନ୍ଦୁ ପରିଷଦର ଏହି ଧର୍ମୀୟ ଶୋଭାଯାତ୍ରା ୨୮ରୁ ପୁନର୍ବାର ଆରମ୍ଭ କରିବା ଲାଗି ମହାପଞ୍ଚାୟତ ନିଷ୍ପତ୍ତି ନେଇଛି। ଏଥିସହିତ ହିଂସା ଘଟଣାର ଏନ୍ଏସ୍ଏ ତଦନ୍ତ କରାଯିବାକୁ ଦାବି ହୋଇଛି। ନୁହକୁ ଗୋବଧ ମୁକ୍ତ କରିବା ସହ ଜିଲାବାସୀଙ୍କ ସୁରକ୍ଷା ପାଇଁ ନୁହରେ ଅର୍ଦ୍ଧସାମରିକ ବାହିନୀର ମୁଖ୍ୟାଳୟ ଖୋଲିବାକୁ ସେମାନେ ସରକାରଙ୍କୁ ଆହ୍ବାନ ଦେଇଛନ୍ତି।
ସୂଚନାଯୋଗ୍ୟ, ଘୃଣିତ ଭାଷଣ ଦିଆଯିବ ନାହିଁ ସର୍ତ୍ତରେ ମହାପଞ୍ଚାୟତ ପାଇଁ ଅନୁମତି ଦିଆଯାଇଥିଲା ବୋଲି ପାଲଓ୍ବାଲ୍ ଏସ୍ପି ଲୋକେନ୍ଦ୍ର ସିଂ କହିଛନ୍ତି। ପ୍ରଶାସନର ସର୍ତ୍ତକୁ ଅବଜ୍ଞା କରି ବକ୍ତାମାନେ ମହାପଞ୍ଚାୟତରେ ଖୋଲା ଧମକ ଦେଇଛନ୍ତି। ଆୟୋଜକମାନେ ବକ୍ତାମାନଙ୍କୁ ସତର୍କ କରାଇଥିଲେ ମଧ୍ୟ ଅଧିକାଂଶ ଏହାକୁ ମାନି ନ ଥିଲେ। ଯଦି ଆମକୁ ଗୋଟିଏ ଆଙ୍ଗୁଠି ଦେଖାଇବ, ଆମେ ପୂରା ହାତ କାଟିଦେବୁ ବୋଲି ଜଣେ ବକ୍ତା କହୁଥିବା ଶୁଣାଯାଇଥିଲା। ମହାପଞ୍ଚାୟତରେ ହରିୟାଣା ଗୋରକ୍ଷକ ଦଳର ଆଚାର୍ଯ୍ୟ ଆଜାଦ ଶାସ୍ତ୍ରୀ ଯୁବବର୍ଗଙ୍କୁ ଅସ୍ତ୍ର ଧରିବା ପାଇଁ ପରାମର୍ଶ ଦେଇଛନ୍ତି। ମଓ୍ବୋତ୍ରେ ତୁରନ୍ତ ୧୦୦ ରାଇଫଲ ଲାଇସେନ୍ସ ନିଶ୍ଚିତ କରିବାକୁ ହେବ। ଏହା ଏକ ‘କର ବା ମର’ ସ୍ଥିତି ବୋଲି ଶାସ୍ତ୍ରୀ କହିଛନ୍ତି। ଏତଲାକୁ ଭୟ ନ କରିବା ଲାଗି ସେ ଯୁବକମାନଙ୍କୁ ପରାମର୍ଶ ଦେଇଛନ୍ତି। ସୂଚନାଯୋଗ୍ୟ, ଜୁଲାଇ ୩୧ରେ ବିଶ୍ୱ ହିନ୍ଦୁ ପରଷଦର ବ୍ରଜମଣ୍ଡଳ ଜଳାଭିଷେକ ଯାତ୍ରା ବେଳେ ଅନ୍ୟ ଏକ ଗୋଷ୍ଠୀ ଏହାକୁ ବିରୋଧ କରିବା ସହ ଟେକାମାଡ଼ କରିବାରୁ ସଂଘର୍ଷର ସୂତ୍ରପାତ ହୋଇଥିଲା। ଏଥିରେ ୨ ହୋମଗାର୍ଡଙ୍କ ସମେତ ୬ ଜଣଙ୍କ ମୃତ୍ୟୁ ଘଟିଥିବାବେଳେ ଅନେକ ଆହତ ହୋଇଥିଲେ। ବହୁ ଗାଡ଼ି, ଦୋକାନ ଓ ଘର ଭଙ୍ଗାରୁଜା ଓ ପୋଡ଼ାଜଳା କରାଯାଇଥିଲା।
