ବାଲେଶ୍ୱର ଅଫିସ, ୨୦ା୮: ବାଲେଶ୍ୱର ଜିଲା ରେମୁଣା ବ୍ଲକ ଅଧୀନ କ୍ଷୀରଚୋରା ଗୋପୀନାଥ ମନ୍ଦିର ନିକଟସ୍ଥ ପାଟଣାରାଇପୁର ଗ୍ରାମର ବାପଛେଉଣ୍ଡ ୧୦ମ ଶ୍ରେଣୀ ଛାତ୍ରୀ ସୁଭଦ୍ରା ପଣ୍ଡା ନିଜର ପାଠପଢ଼ା, ଋଗ୍ଣ ମା’ଙ୍କୁ ଚିକିତ୍ସା, ଭାଙ୍ଗିଯାଇଥିବା ଘରକୁ ସଜାଡ଼ିବା ଲାଗି ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଆର୍ଥିକ ସହାୟତା ଲାଗି ନିବେଦନ କରିଛନ୍ତି।
ପାଟଣାରାଇପୁର ଗ୍ରାମର ସ୍ବର୍ଗତ ଶ୍ରୀନିବାସ ପଣ୍ଡା ଓ ସ୍ତ୍ରୀ ଅନ୍ନପୂର୍ଣ୍ଣା ନିଃସନ୍ତାନ ଥିବାରୁ ୨୧ଦିନର ଗୋଟିଏ ଝିଅକୁ ଆଣି ପାଳିଥିଲେ। ଏହାକୁ ନେଇ ପରିବାର ଲୋକ ଶ୍ରୀନିବାସଙ୍କୁ ଅଲଗା କରି ଦେଇଥିଲେ। ଏହାକୁ ଖାତିର୍ ନ କରି ଶ୍ରୀନିବାସ ନିଜ ସ୍ତ୍ରୀ ଓ ଝିଅକୁ ସାଙ୍ଗରେ ବେଶ୍ ଖୁସିରେ ଥିଲେ। ଝିଅଟି ୨ୟ ଶ୍ରେଣୀରେ ପଢୁଥିବା ବେଳେ ଶ୍ରୀନିବାସ ରୋଗରେ ପ୍ରାଣ ହରାଇଥିଲେ। ଏହାପରଠାରୁ ମା’ ଝିଅଙ୍କ ଦୁର୍ଦ୍ଦଶା ଆରମ୍ଭ ହୋଇଥିଲା। ସ୍ବାମୀଙ୍କୁ ହରାଇ ଅନ୍ନପୂର୍ଣ୍ଣା ମାନସିକ ରୋଗରେ ଆକ୍ରାନ୍ତ ହୋଇଛନ୍ତି। ସୁଭଦ୍ରାଙ୍କ କହିବାନୁସାରେ, ବାପାଙ୍କ ମୃତ୍ୟୁ ପରେ ପରିବାରର ଅନ୍ୟମାନେ ତାଙ୍କୁ ଅଜାତିର କହି ଘରକୁ ପଶିବାକୁ ନ ଦେବା ସହ କଥାବାର୍ତ୍ତା ନ କରି ଘୃଣା ଚକ୍ଷୁରେ ଦେଖିଥିଲେ। ସେ ସରକାରୀ ବିଦ୍ୟାଳୟରେ ପଢୁଥିବା ବେଳେ ଟ୍ୟୁଶନ ସାର୍ଙ୍କ ସହାୟତାରେ ଖାତା ବହି ପାଇପାରୁଛନ୍ତି। ମା’ଙ୍କ ୫ଶହ ଟଙ୍କା ବିଧବା ଭତ୍ତା ଓ ସରକାରଙ୍କଠାରୁ ମାସିକ ୩୫ କିଲୋ ଚାଉଳରେ ଘର ଚାଲିଛି। ଭାଙ୍ଗିଯାଇଥିବା ଘର ମରାମତି କରିବା କଷ୍ଟକର ହୋଇପଡ଼ିଛି। ମା’ଙ୍କ ପାଇଁ ଔଷଧ କିଣିବାକୁ ଟଙ୍କା ନ ଥିବା ବେଳେ ଚିକିତ୍ସା ମଧ୍ୟ କରିପାରୁନାହାନ୍ତି। ଏ ନେଇ ଲେଖିଥିବା ଚିଠିକୁ ପୋଷ୍ଟାଲ ମାଧ୍ୟମରେ ମୁଖ୍ୟମନ୍ତ୍ରୀଙ୍କ ଠିକଣାରେ ପଠାଇଛନ୍ତି। ଉକ୍ତ ଚିଠିକୁ ଟ୍ୟୁଶନ୍ ସାର୍ ନବ କୁମାର ଦାସ ତାଙ୍କ ଫେସ୍ବୁକ୍ରେ ପୋଷ୍ଟ କରିଥିବାରୁ ବହୁ ଲୋକ ଜାଣିପାରିଥିଲେ। ଗଣମାଧ୍ୟମ ପ୍ରତିନିଧିମାନେ ତାଙ୍କ ଘରେ ପହଞ୍ଚତ୍ ସତ୍ୟାସତ୍ୟ ବିଷୟରେ ପଚାରି ବୁଝିଛନ୍ତି। ମୁଖ୍ୟମନ୍ତ୍ରୀଙ୍କୁ ଦିଆଯାଇଥିବା ଚିଠିରେ ଟ୍ୟୁଶନ୍ ଶିକ୍ଷକଙ୍କ ନମ୍ବର ଥିବାରୁ ତାଙ୍କ ପାଖକୁ ଫୋନ୍ ଆସିଥିଲା। ଆସିଷ୍ଟାଣ୍ଟ ସେକ୍ରେଟାରି ଫୋନ୍ରେ ସମସ୍ତ ବିଷୟ ବୁଝିଛନ୍ତି। ଅନ୍ୟପଟେ ରେମୁଣା ବିଡିଓ, ତହସିଲଦାର ସୁଭଦ୍ରାଙ୍କ ଘରେ ପହଞ୍ଚତ୍ ସହାୟତାର ହାତ ବଢ଼ାଇଛନ୍ତି। ଜିଲା ଶିଶୁ ସୁରକ୍ଷା ଅଧିକାରୀ ଯୁବକ ମାଝି ଓ ଜିଲା ଶିଶୁ ମଙ୍ଗଳ କମିଟି ଅଧିକାରୀମାନେ ପହଞ୍ଚତ୍ ସହାୟତା ପାଇଁ ବ୍ୟବସ୍ଥା କରିଛନ୍ତି। କେତେଜଣ ସାମାଜିକ କର୍ମୀ ସୁଭଦ୍ରାଙ୍କ ଘରେ ପହଞ୍ଚତ୍ ସ୍କୁଲ ଯା’ଆସ ପାଇଁ ସାଇକେଲ, ରୋଷେଇ ପାଇଁ ଗ୍ୟାସ୍ ଆଦି ନିତ୍ୟବ୍ୟବହାର୍ଯ୍ୟ ଜିନିଷ ଯୋଗାଇ ଦେଇଥିବା ଟ୍ୟୁଶନ ସାର୍ ଦାସ ଜଣାଇଛନ୍ତି।
