ନୂଆଦିଲ୍ଲୀ,୨୦ା୧୧(ପି.ଟି.): ଶାନ୍ତି, ନିରସ୍ତ୍ରୀକରଣ ଏବଂ ବିକାଶ ପାଇଁ ୨୦୨୨ର ଇନ୍ଦିରା ଗାନ୍ଧୀ ପୁରସ୍କାର ରବିବାର ମିଳିତ ଭାବେ ଇଣ୍ଡିଆନ୍ ମେଡିକାଲ ଆସୋସିଏଶନ ଏବଂ ଭାରତର ତାଲିମ୍ପ୍ରାପ୍ତ ନର୍ସ ସଂଘକୁ ପ୍ରଦାନ କରାଯାଇଛି। ସେମାନେ ଦେଶର କୋଭିଡ୍ ଯୋଦ୍ଧାର ପ୍ରତିନିଧିତ୍ୱ କରିଛନ୍ତି। ପୂର୍ବତନ ଉପରାଷ୍ଟ୍ରପତି ଏମ୍ ହମିଦ୍ ଅନ୍ସାରୀ ଇଣ୍ଡିଆନ୍ ମେଡିକାଲ ଆସୋସିଏଶନ୍ର ଅଧ୍ୟକ୍ଷ ଶରଦ କୁମାର ଅଗ୍ରଓ୍ବାଲ ଏବଂ ଟ୍ରେନ୍୍ଡ ନର୍ସେସ୍ ଆସୋସିଏଶନ ଅଫ୍ ଇଣ୍ଡିଆର ଅଧ୍ୟକ୍ଷା ରୟ କେ. ଜର୍ଜଙ୍କୁ ଏହି ପୁରସ୍କାର ପ୍ରଦାନ କରିଛନ୍ତି। ମହାମାରୀ ସମୟରେ ନିଃସ୍ବାର୍ଥପର ତଥା ଉତ୍ସର୍ଗୀକୃତ ଭାବେ ସେବା କରିଥିବା ପ୍ରତ୍ୟେକ ଡାକ୍ତର, ନର୍ସ, ପାରାମେଡିକ୍ କର୍ମଚାରୀ ଓ କର୍ମୀମାନଙ୍କ ପାଇଁ ଏହି ପୁରସ୍କାର ଉଦ୍ଦିଷ୍ଟ ବୋଲି ଇନ୍ଦିରା ଗାନ୍ଧୀ ମେମୋରିଆଲ୍ ଟ୍ରଷ୍ଟର ଅଧ୍ୟକ୍ଷା ସୋନିଆ ଗାନ୍ଧୀ ଏହି ଅବସରରେ ଉଦ୍ବୋଧନ ଦେଇ କହିଛନ୍ତି। ବିଂଶ ଶତାବ୍ଦୀର ସବୁଠୁ ଉଲ୍ଲେଖନୀୟ ନେତ୍ରୀ ଇନ୍ଦିରାଙ୍କ ନାମରେ ଏହି ପୁରସ୍କାର ସ୍ଥାପନ କରାଯାଇଥିଲା। ମାନବୀୟ ସେବା ଏବଂ ପୃଥିବୀ ପାଇଁ ଦୃଷ୍ଟାନ୍ତମୂଳକ କାର୍ଯ୍ୟ କରିଥିବା ମହିଳା, ପୁରୁଏ ଓ ଅନୁଷ୍ଠାନକୁ ସମ୍ମାନିତ କରିବା ଉକ୍ତ ପୁରସ୍କାରର ଲକ୍ଷ୍ୟ ବୋଲି ସୋନିଆ କହିଛନ୍ତି।
