ନୂଆଦିଲ୍ଲୀ,୨ା୨: ହ୍ବାଟ୍ସଆପ୍ର ୨୦୨୧ ଗୋପନୀୟତା ନୀତିକୁ ୟୁଜର ଗ୍ରହଣ କରିବାକୁ ବାଧ୍ୟ ନୁହନ୍ତି। ସେହିବର୍ଷ ମେ’ରେ ଉକ୍ତ ସୋସିଆଲ ମିଡିଆ ପ୍ଲାଟ୍ଫର୍ମ ଏନେଇ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟକୁ ପତ୍ର ଲେଖି ଜଣାଇଥିଲା। ନୂଆ ପ୍ରିଭେସି ନୀତିକୁ ୟୁଜର ଗ୍ରହଣ ନ କଲେ, ସେମାନଙ୍କୁ ମେସେଜିଂ ସେବା ବନ୍ଦ କରାଯିବ ନାହିଁ ବୋଲି ହ୍ବାଟ୍ସଆପ୍ ଲିଖିତ ପ୍ରତିଶ୍ରୁତି ଦେଇଥିଲା। ଉକ୍ତ ଅଣ୍ଡରଟେକିଂକୁ ଗଣମାଧ୍ୟମରେ ବହୁଳ ଭାବେ ପ୍ରଚାର କରିବାକୁ ସୁପ୍ରିମକୋର୍ଟ ବୁଧବାର ହ୍ବାଟ୍ସଆପ୍କୁ ନିର୍ଦ୍ଦେଶ ଦେଇଛନ୍ତି। ଏହା ଦ୍ୱାରା ଏହି ସଂସ୍ଥାର ପ୍ରିଭେସି ପଲିସିରେ ସହମତ ନ ଥିବା ବ୍ୟବହାରକାରୀ ଉପକୃତ ହୋଇପାରିବେ ବୋଲି ଜଷ୍ଟିସ କେ.ଏମ୍. ଜୋସେଫ୍ଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ସାମ୍ବିଧାନିକ ପୀଠ କହିଛନ୍ତି। ଏନେଇ ୫ଟି ଖବରକାଗଜରେ ବିଜ୍ଞାପନ ଦେବାକୁ ହ୍ବାଟ୍ସଆପ୍କୁ ନିର୍ଦ୍ଦେଶ ଦିଆଯାଇଛି।
