ନୂଆଦିଲ୍ଲୀ,୧୩।୧: ଏୟାର ଇଣ୍ଡିଆ ବିମାନରେ ଜଣେ ମହିଳାଙ୍କ ଉପରେ ପରିସ୍ରା କରିବା ମାମଲାରେ ନୂଆ ମୋଡ। ଅଭିଯୁକ୍ତ ଶଙ୍କର ମିଶ୍ର କୋର୍ଟରେ ଭିନ୍ନ କାହାଣୀ ଉପସ୍ଥାପନ କରିଛନ୍ତି। ସେ ନୁହନ୍ତି ବରଂ ମହିଳା ନିଜେ ପରିସ୍ରା କରିଥିବା ଶଙ୍କର କହିଛନ୍ତି। ଏପରିକି ମହିଳାଙ୍କ ସିଟ୍ ପର୍ଯ୍ୟନ୍ତ ଯିବା ତାଙ୍କ ପକ୍ଷେ ସମ୍ଭବ ନ ଥିଲା ବୋଲି ସେ କହିଛନ୍ତି।
କୋର୍ଟରେ ଶଙ୍କରଙ୍କ ଓକିଲ କହିଛନ୍ତି,ଅଭିଯୋଗକାରୀ ମହିଳାଙ୍କ ସିଟ୍କୁ ଅବରୋଧ କରାଯାଇଥିଲା। ଏଣୁ ଶଙ୍କର ସେଠାକୁ ଯିବା ସମ୍ଭବ ନୁହେଁ। ମହିଳାମାନଙ୍କର ଏହି ସମସ୍ୟା ରହିଛି। ସେ ନିଜେ ପରିସ୍ରା କରିଛନ୍ତି। କାରଣ ସେ ଜଣେ କଥକ ନୃତ୍ୟଶିଳ୍ପୀ। ୮୦% କଥକ ନୃତ୍ୟଶିଳ୍ପୀଙ୍କର ଏହି ସମସ୍ୟା ରହିଛି।
ଅଭିଯୁକ୍ତଙ୍କ ଏଭଳି ଦାବି ପରେ ସେଶନ କୋର୍ଟର ବିଚାରପତି କହିଥିଲେ ଯେ, ବିମାନର ଗୋଟିଏ ପାର୍ଶ୍ୱରୁ ଅନ୍ୟ ପାର୍ଶ୍ୱକୁ ଯିବା ଅସମ୍ଭବ ନୁହେଁ। ଦୁଃଖିତ। ହେଲେ ମୁଁ ମଧ୍ୟ ଯାତ୍ରା କରିଛି। ଯେକେହି କୌଣସି ଧାଡ଼ିରୁ ଆସି କୌଣସି ସିଟ୍କୁ ଯାଇପାରିବ।
ଶଙ୍କରଙ୍କୁ ପଚରାଉଚରା କରିବା ଲାଗି କୋର୍ଟରେ ଦିଲ୍ଲୀ ପୋଲିସ ଆବେଦନ କରିଥିଲା। ଏହାକୁ ନେଇ ଜାରି ନୋଟିସର ଜବାବରେ ଶଙ୍କରଙ୍କ ପକ୍ଷରୁ ଏଭଳି ଯୁକ୍ତି କରାଯାଇଛି। ତେବେ ବୁଧବାର ତାଙ୍କ ଜାମିନ ଆବେଦନକୁ ପ୍ରତ୍ୟାଖ୍ୟାନ କରିଦିଆଯାଇଥିଲା।
କହିରଖୁଛୁ ଯେ, ଏୟାର ଇଣ୍ଡିଆ ନ୍ୟୁୟର୍କ-ଦିଲ୍ଲୀ ବିମାନରେ ଶଙ୍କର ନିଶାରେ ଥାଇ ଜଣେ ବୃଦ୍ଧାଙ୍କ ଉପରେ ପରିସ୍ରା କରିଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ବିମାନ କମ୍ପାନୀ ଅନେକ ଅସୁବିଧାର ସମ୍ମୁଖୀନ ହୋଇଛି। ସେହିଭଳି ଶଙ୍କର ମଧ୍ୟ ଘଟଣା ପରଠାରୁ ଫେରାର ହୋଇଯାଇଥିଲେ। ଅନେକ ଚେଷ୍ଟା ପରେ ପୋଲିସ ତାଙ୍କୁ ଗିରଫ କରିଛି।
