ନୂଆଦିଲ୍ଲୀ,୯।୧୨:ଦେଶର ପ୍ରମୁଖ ୨ଚିକିଆ ଯାନ ନିର୍ମାତା ହୋଣ୍ଡା ମୋଟରସାଇକେଲ ଆଣ୍ଡ୍ ସ୍କୁଟର ଇଣ୍ଡିଆ ଲିମିଟେଡ୍(ଏଚ୍ଏମ୍ଏସ୍ଆଇଏଲ୍) ପକ୍ଷରୁ ଚଳିତ ବର୍ଷ ନଭେମ୍ବର ମାସର ଗାଡ଼ି ସମ୍ପର୍କରେ ଘୋଷଣା କରାଯାଇଛି। ଏପରିକି କମ୍ପାନୀ ଚଳିତ ନଭେମ୍ବରରେ ୩,୭୩,୨୨୧ ଗାଡ଼ି ବିକ୍ରି କରିଥିବା ବେଳେ ଗତବର୍ଷ ସମାନ ସମୟ ମଧ୍ୟରେ ୨,୫୬,୧୭୪ ଗାଡ଼ି ବିକ୍ରି କରିଥିଲା। ଫଳରେ ଗତବର୍ଷ ତୁଳନାରେ ଚଳିତ ବର୍ଷ ନଭେମ୍ବରରେ ଗାଡ଼ି ବିକ୍ରି ୩୮% ବୃଦ୍ଧି ଘଟିଛି। ବିଶେଷକରି ୨୦୨୨ ନଭେମ୍ବରରେ ଦେଶ ଭିତରେ କମ୍ପାନୀ ୩,୫୩,୫୪୦ ଗାଡ଼ି ବିକ୍ରି କରିଥିବା ବେଳେ ୧୯,୬୮୧ ଗାଡ଼ି ରପ୍ତାନି କରିଛି। ଏ ସମ୍ପର୍କରେ ଏଚ୍ଏମ୍ଏସ୍ଆଇଏଲ୍ର ସଭାପତି ତଥା ଏମ୍ଡି ଓ ସିଇଓ ଆତ୍ସୁସି ଓଗାତା କହିଛନ୍ତି, ଏକ ସଫଳ ଉତ୍ସବ ଋତୁ ପରେ ମଧ୍ୟ ନିରନ୍ତର ଚାହିଦା ବଜାରରେ ଜାରି ରହିଥିବା କମ୍ପାନୀ ହୃଦୟଙ୍ଗମ କରିଛି। ଏପରିକି ସହରାଞ୍ଚଳରେ କାର୍ଯ୍ୟାଳୟ ଓ ପ୍ରତିଷ୍ଠାନ ଖୋଲିବା ଏବଂ ଅଧିକରୁ ଅଧିକ ଲୋକ ବାହାରକୁ ବାହାରିବା ପରେ ଯାତାୟାତ ଆବଶ୍ୟକତାରେ ଏବେ ବୃଦ୍ଧି ହୋଇଛି। ବିଶେଷକରି ଶିଳ୍ପ କ୍ଷେତ୍ରରେ ଦ୍ରୁତ ଅଭିବୃଦ୍ଧି ଜାରି ରହିଛି ଏବଂ ଆମ ଗ୍ରାହକମାନଙ୍କ ଆବଶ୍ୟକତା ପୂରଣ କରିବା ଲାଗି ଆମେ ସର୍ବଦା ଚାହୁଁଛୁ। ଆମ ଗ୍ରାହକମାନଙ୍କୁ ଉଲ୍ଲସିତ କରିବା ଲକ୍ଷ୍ୟ ନେଇ ସାରା ଭାରତରେ ନୂଆ ଆଉଟ୍ଲେଟ୍ର ଉଦ୍ଘାଟନ କରିବା ସହ ଆମେ ଦୂରଦୂରାନ୍ତ ଉପସ୍ଥିତିକୁ ନିରନ୍ତର ଭାବେ ସମ୍ପ୍ରସାରିତ କରୁଛୁ ବୋଲି ସେ ମତ ପ୍ରକାଶ କରିଛନ୍ତି।
