ନୂଆଦିଲ୍ଲୀ,୫ା୧୧: ଓଡ଼ିଶା ଉପକୂଳର ଅବ୍ଦୁଲ କଲାମ ଦ୍ୱୀପ (ହ୍ବିଲର ଦ୍ୱୀପ)ରୁ ଆସନ୍ତା ୧୦-୧୧ ତାରିଖରେ ଏକ କ୍ଷେପଣାସ୍ତ୍ର ପରୀକ୍ଷଣ କରାଯିବ, ଯାହାର ରେଞ୍ଜ ହେଉଛି ୨,୨୦୦ କି.ମି.। ଏହି ମିଶାଇଲ ଟେଷ୍ଟ ସମ୍ପର୍କରେ ଗୋଇନ୍ଦା ତଥ୍ୟ ସଂଗ୍ରହ ପାଇଁ ଚାଇନା ଏକ ଗୁପ୍ତଚର ଜାହାଜ ପଠାଇଛି। ଗୁପ୍ତଚର ଜାହାଜ ୟୁଆନ୍ ଓ୍ବାଙ୍ଗ୍ ୬ଷ୍ଠ ଭାରତ ମହାସାଗରରେ ଯାତ୍ରା ଆରମ୍ଭ କରି ଇଣ୍ଡୋନେସିଆର ବାଲିରେ ପହଞ୍ଚତ୍ଥିବା ନେଇ ଏକ ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି।
ଭାରତର ସୁରକ୍ଷା ଦୃଷ୍ଟିରୁ ନୂଆଦିଲ୍ଲୀର କଡ଼ା ବିରୋଧ ସତ୍ତ୍ୱେ ଚାଇନା ଏହାର ହାଇଟେକ୍ ରିସର୍ଚ୍ଚ ଶିପ୍ ୟୁଆନ୍ ଓ୍ବାଙ୍ଗ୍ ୫ମକୁ ଶ୍ରୀଲଙ୍କାକୁ ପଠାଇଥିଲା। ଏହି ଗୁପ୍ତଚର ଜାହାଜ ଗତ ଅଗଷ୍ଟ ୧୬ରେ ଶ୍ରୀଲଙ୍କାର ହାମ୍ବନ୍ଟୋଟା ବନ୍ଦରରେ ପହଞ୍ଚତ୍ଥିଲା। ଏହାର ୩ ମାସ ନ ବିତୁଣୁ ଭଦ୍ରକ ଜିଲା ହ୍ବିଲର ଦ୍ୱୀପରୁ ଭାରତ ପକ୍ଷରୁ ଏକ କ୍ଷେପଣାସ୍ତ୍ର ପରୀକ୍ଷଣ କରାଯିବାକୁ ଥିବାବେଳେ ଏହା ଉପରେ ଗୁପ୍ତଚରଗିରି କରିବା ପାଇଁ ଚାଇନା ନୌସେନା ଆଉ ଏକ ଜାହାଜ ପଠାଇଛି। ୟୁଆନ୍ ଓ୍ବାଙ୍ଗ୍ ୬ଷ୍ଠ ଭାରତ ମହାସାଗରକୁ ପ୍ରବେଶ କରିସାରିଛି। ଏହା ଏବେ ବାଲି ଉପକୂଳରେ ଯାତ୍ରା କରୁଛି ବୋଲି ଜାହାଜଗୁଡ଼ିକର ଗତିବିଧିକୁ ଅନ୍ଲାଇନ୍ରେ ଟ୍ରାକ୍ କରୁଥିବା ମାରିଟାଇମ୍ ଟ୍ରାଫିକ୍ ପକ୍ଷରୁ ସୂଚନା ମିଳିଛି। ପ୍ରକାଶ ଯେ, ଭାରତ ହ୍ବିଲର ଦ୍ୱୀପରେ ସମନ୍ବିତ କ୍ଷେପଣାସ୍ତ୍ରଗୁଡ଼ିକୁ ପରୀକ୍ଷା କରିଥାଏ। ପ୍ରତିରକ୍ଷା ସମ୍ପର୍କିତ ତଥ୍ୟ ଚାଇନା ହାତକୁ ଗଲେ ଭାରତର ଜାତୀୟ ସୁରକ୍ଷା ବିପନ୍ନ ହେବା ଆଶଙ୍କା କରାଯାଉଛି।
