ନନ୍ଦପୁର,୩୦।୩(ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ଓ ଲମତାପୁଟ ବ୍ଲକ ଅଞ୍ଚଳରେ କାଳବୈଶାଖୀର କରାଳ ରୂପ ଦେଖିବାକୁ ମିଳିଛି। ଘୂର୍ଣ୍ଣିଝଡ଼ ଓ ପ୍ରବଳ ବର୍ଷା ଯୋଗୁ ୨ ବ୍ଲକ ଅଞ୍ଚଳରେ ଏକାଧିକ ବୃକ୍ଷ ଉପୁଡ଼ି ରାସ୍ତା ଅବରୋଧ ଓ ଘର ଭାଙ୍ଗିବା ଘଟଣା ନଜରକୁ ଆସିଛି। ଘଣ୍ଟାକୁ ପ୍ରାୟ ୫୦ ରୁ ୬୦ କିମି ବେଗରେ ପବନ ବହିବା ସହ ପ୍ରବଳ ବର୍ଷା ହୋଇଛି। ଯାହାଫଳରେ ନନ୍ଦପୁର ବ୍ଲକର ଜୟପୁର-ବିଶାଖାପାଟଣା ସଂଯୋଗୀ ରାଜ୍ୟ ରାଜପଥର ମସୁରୀ ଗ୍ରାମ ନିକଟ ରାସ୍ତା ଉପରେ ଏକ ବିରାଟ ଚାଖୁଣ୍ଡା ଗଛ ଉପୁଡ଼ି ପଡ଼ି ରାସ୍ତା ଅବରୋଧ ହୋଇଥିଲା। ନନ୍ଦପୁର ଅଗ୍ନିଶମ ବାହିନୀ କେନ୍ଦ୍ରାଧିକାରୀ ହେମନ୍ତ କୁମାର ସାମଲଙ୍କ ନେତତ୍ୱରେ ତାଙ୍କ ଟିମ୍ ପହଞ୍ଚି ପଡିଥିବା ଗଛକାଟି ରାସ୍ତା ଅବରୋଧ ହଟିଥିଲା।
ବ୍ଲକର ବାଡେଲ, ଅତଣ୍ଡା, ବିଲାପୁଟ, ଭେଜା, ବାଲଡ଼ା ଆଦି ପଞ୍ଚାୟତ ଅନ୍ଧାରରେ ଥିବା ସୂଚନା ମିଳିଛି। ଟିପି ଏସ୍ଓଡିଏଲ ଯନ୍ତ୍ରୀ ପ୍ରଭୁ ମଲ୍ଲିକ କାଳବୈଶାଖୀକୁ ନଜରରେ ରଖି ଏକାଧିକ ଫିଡର୍ରୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଛି। ପରବର୍ତ୍ତୀ ସମୟରେ କ୍ଷୟକ୍ଷତିର ସୂଚନା ଦିଆଯିବ ବୋଲି କହିଛନ୍ତି।
ସେହିଭଳି ଲମତାପୁଟ ବ୍ଲକର ବଡ଼ସଗର ଗାଁରେ ପୁରାତନ ଗଛ ଉପୁଡି ପଡି ଘର ଉପରେ ପଡିଛି। ବର୍ଷା ଓ ପବନ ଯୋଗୁ ଲାମତାପୁଟ ଅଞ୍ଚଳରେ କିଛି ସମୟ ପାଇଁ ରାସ୍ତାରେ ଲୋକଙ୍କ ଯାତାୟାତ ସମ୍ପୂର୍ଣ୍ଣ ଠପ ହୋଇଯାଇଥିଲା। ବର୍ଷା ଛାଡିବା ପରେ ଲମତାପୁଟ ଅଗ୍ନିଶମ ବିଭାଗ କର୍ମଚାରୀ ମାନେ ବଡସଗର ଗାଁରେ ପହଞ୍ଚି ଘର ଉପରେ ପଡ଼ିଥିବା ଗଛଗୁଡିକ କାଟି ସଫା ସଫା କରିଥିବା ଦେଖିବାକୁ ମିଳିଛି । ପରିସ୍ଥିତି ପ୍ରତି ନଜର ରଖାଯାଇଥିବା ନନ୍ଦପୁର ତହସିଲଦାର ଦେବବ୍ରତ ମହାରଣା ଓ ଲମତାପୁଟ ତହସିଲଦାର ଦିବାକର ବାଗ ସୂଚନା ଦେଇଛନ୍ତି।
