ନୂଆଦିଲ୍ଲୀ,୩୦।୧୦ : ଭିଡିଓ କନଫରେନ୍ସ ମାଧ୍ୟମରେ ରବିବାର ଜମ୍ମୁ-କଶ୍ମୀର ରୋଜଗାର ମେଳାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମ୍ବୋଧିତ କରି କହିଛନ୍ତି ଯେ ଆଗାମୀ ଦିନରେ ଅନ୍ୟ ବିଭାଗରେ ୭୦୦ ରୁ ଅଧିକ ନିଯୁକ୍ତି ପତ୍ର ଦେବା ପାଇଁ ପ୍ରସ୍ତୁତି ଚାଲିଛି।
ଜମ୍ମୁ-କଶ୍ମୀରରେ ଭିତ୍ତିଭୂମି ବିକାଶ ହେଉଛି, ଯୋଗାଯୋଗ ବ୍ୟବସ୍ଥା ବୃଦ୍ଧି ପାଉଛି, ଏହା ଯୋଗୁ ପର୍ଯ୍ୟଟନ କ୍ଷେତ୍ର ମଜବୁତ ହେବାରେ ଲାଗିଛି। ଏଠାରେ ଥିବା ଲୋକମାନେ ସର୍ବଦା ସ୍ବଚ୍ଛତା ଉପରେ ଗୁରୁତ୍ୱାରୋପ କରିଛନ୍ତି। ଆଜି ସରକାରୀ ସେବାରେ ଯୋଗ ଦେଉଥିବା ଯୁବବର୍ଗମାନଙ୍କୁ ସ୍ବଚ୍ଛତାକୁ ପ୍ରାଥମିକତା ଦେବାକୁ ପଡିବ।
ଆମକୁ ନୂତନ ଚିନ୍ତାଧାରା ସହିତ କାମ କରିବାକୁ ପଡିବ। ଜମ୍ମୁ-କଶ୍ମୀର ହେଉଛି ପ୍ରତ୍ୟେକ ହିନ୍ଦୁସ୍ଥାନୀଙ୍କ ଗର୍ବ। ଆମକୁ ଏହାକୁ ନୂତନ ଉଚ୍ଚତାକୁ ନେବାକୁ ପଡିବ। ସେଥିପାଇଁ ମିଳିତ ଭାବେ କାର୍ଯ୍ୟ କରିବା ଜରୁରୀ। ୨୦୧୯ ପରଠାରୁ ରାଜ୍ୟରେ ୩୦ ହଜାର ସରକାରୀ ପଦବୀରେ ନିଯୁକ୍ତି ଦିଆଯାଇଛି।
ସେଥିମଧ୍ୟରୁ ଗତ ବର୍ଷ ପ୍ରାୟ ୨୦ ହଜାର ଚାକିରି ଦିଆଯାଇଛି। ପୁରୁଣା ଆହ୍ବାନଗୁଡ଼ିକୁ ଛାଡି ନୂତନ ସମ୍ଭାବନାଗୁଡ଼ିକର ଲାଭ ନେବା ପାଇଁ ବର୍ତ୍ତମାନ ସମୟ। ଆମର ଯୁବବର୍ଗ ହିଁ ଜମ୍ମୁ-କଶ୍ମୀରରେ ବିକାଶର ଏକ ନୂଆ କାହାଣୀ ଲେଖିବେ। ଆଜି ଏହି ଏଠାରେ ରୋଜଗାର ମେଳାର ଆୟୋଜନ ଅତ୍ୟନ୍ତ ସ୍ବତନ୍ତ୍ର ବୋଲି ପ୍ରଧାନମନ୍ତ୍ରୀ କହିଛନ୍ତି।
ଏକବିଂଶ ଶତାବ୍ଦୀର ଏହି ଦଶନ୍ଧି ହେଉଛି ଜମ୍ମୁ-କଶ୍ମୀର ଇତିହାସରେ ସବୁଠାରୁ ଗୁରୁତ୍ୱପୂର୍ଣ୍ଣ ଦଶନ୍ଧି । ଜମ୍ମୁ-କଶ୍ମୀରର ୨୦ ଟି ବିଭିନ୍ନ ସ୍ଥାନରେ ସରକାରୀ କାର୍ଯ୍ୟ କରିବାକୁ ୩ ହଜାର ଯୁବବର୍ଗଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଛି। ନିଯୁକ୍ତି ପତ୍ର ପାଇଥିବା ସମସ୍ତ ଯୁବବର୍ଗଙ୍କୁ ପ୍ରଧାନମନ୍ତ୍ରୀ ଅଭିନନ୍ଦନ ଜଣାଇଛନ୍ତି।
