ଅହମଦାବାଦ,୩୦।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇ ଦିନିଆ ଗୁଜରାଟ ଗସ୍ତରେ ଅଛନ୍ତି। ଶୁକ୍ରବାର ଗାନ୍ଧୀନଗରରୁ ମୁମ୍ବାଇ ମଧ୍ୟରେ ଚାଲିବାକୁ ଥିବା ବନ୍ଦେ ଭାରତ ଏକ୍ସପ୍ରେସ୍ ଟ୍ରେନ୍ର ସେ ଉଦ୍ଘାଟନ କରିଛନ୍ତି। ଟ୍ରେନ୍ରେ ବସି ମୋଦି ଗାନ୍ଧିନଗରରୁ ଅହମଦାବାଦର କାଲୁପୁର ଷ୍ଟେସନ ପର୍ଯ୍ୟନ୍ତ ଯାତ୍ରା କରିଥିଲେ। ଇତିମଧ୍ୟରେ ଗୁଜରାଟବାସୀଙ୍କ ପ୍ରତି ମୋଦିଙ୍କ ବଦାନ୍ୟତା ଦେଖିବାକୁ ମିଳିଛି। ଶୁକ୍ରବାର ଅହମଦାବାଦରେ ଜନସଭା କାର୍ଯ୍ୟକ୍ରମ ଶେଷ କରି ଗାନ୍ଧୀନଗର ଯାଉଥିବା ବେଳେ ମୋଦି ଏକ ଆମ୍ବୁଲାନ୍ସ ରାସ୍ତାରେ ଅଟକିଥିବା ଦେଖିବାକୁ ପାଇଥିଲେ। ସେତିକିବେଳେ ମୋଦି ନିଜ ଏବଂ ସୁରକ୍ଷାକର୍ମୀଙ୍କ କାର୍କେଡକୁ ଅଟକାଇ ତୁରନ୍ତ ଆମ୍ବୁଲାନ୍ସକୁ ଛାଡ଼ିବାକୁ ନିର୍ଦ୍ଦେଶ ଦେଇଥିଲେ। ଏହାପରେ କିଛି ସମୟ ପାଇଁ ପ୍ରଧାନମନ୍ତ୍ରୀଙ୍କ କାର୍କେଡ ରାସ୍ତାରେ ଅଟକିରହିଥିଲା। ଏହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବା ସହ ସେନ୍ସେସନ୍ ପାଲଟିଛି।
