ନୂଆଦିଲ୍ଲୀ, ୨୪।୯ : କେନ୍ଦ୍ର ସରକାର ସଂସଦୀୟ ପରମ୍ପରାର ପାଳନ କରୁ ନାହାନ୍ତି ବୋଲି କଂଗ୍ରେସ ପକ୍ଷରୁ ଶନିବାର ଅଭିଯୋଗ କରାଯାଇଛି। ଏହି ମର୍ମରେ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଏକ ଚିଠି ଲେଖାଯାଇଛି। ସ୍ବରାଷ୍ଟ୍ର, ବହିର୍ବ୍ୟାପାର, ପ୍ରତିରକ୍ଷା ଏବଂ ଅର୍ଥ ବିଭାଗ ଆଦି ଚାରିଟି ପ୍ରମୁଖ କମିଟିରୁ ଅନ୍ତତଃ ପକ୍ଷେ ଗୋଟିଏର ଅଧ୍ୟକ୍ଷ ପଦ କଂଗ୍ରେସକୁ ଦିଆଯାଉ ବୋଲି କଂଗ୍ରେସ ସଂସଦୀୟ ଦଳ ନେତା ଅଧୀର ରଞ୍ଜନ ଚୌଧୁରୀ ଦାବୀ କରିଛନ୍ତି। ବାଚସ୍ପତିଙ୍କୁ ଲେଖିଥିବା ଚିଠିରେ ଅଧୀର ଉଲ୍ଲେଖ କରିଛନ୍ତି ଯେ ସରକାର ସଂସଦୀୟ କମିଟିକୁ ଏକ ନାଟକରେ ପରିଣତ କରିଛନ୍ତି।
ସରକାର ନିଜ କାର୍ଯ୍ୟକୁ ଗମ୍ଭୀରତାର ସହ ନେବାକୁ ପ୍ରସ୍ତୁତ ନୁହଁନ୍ତି । କମିଟି ପୁନର୍ଗଠନରେ ମୁଖ୍ୟ ବିରୋଧୀ ଦଳର ଭୂମିକାକୁ ଅଣଦେଖା କରାଯାଉଛି ଏବଂ ସଂସଦରେ ଏହାର ଗୁରୁତ୍ୱ ହ୍ରାସ କରିବାକୁ ଉଦ୍ୟମ ହେଉଛି ବୋଲି ଚିଠିରେ ଉଲ୍ଲେଖ କରାଯାଇଛି। ତେବେ ସଂସଦର ଗୁରୁତ୍ୱପୂର୍ଣ୍ଣ କମିଟିରେ ପ୍ରମୁଖ ବିରୋଧୀ ଦଳଙ୍କୁ ଏକ ପ୍ରମୁଖ ଭୂମିକା ଗ୍ରହଣ କରିବାର ଏକ ପରମ୍ପରା ରହିଛି। ସେ କହିଛନ୍ତି, ୧୬ ତମ ଲୋକସଭାରେ ଗୃହ, ବହିର୍ବ୍ୟାପାର, ପ୍ରତିରକ୍ଷା ଏବଂ ଅର୍ଥ ମନ୍ତ୍ରଣାଳୟର ତିନୋଟି କମିଟି ମୁଖ୍ୟ ବିରୋଧୀ ଦଳ କଂଗ୍ରେସ ପାଖରେ ଥିଲା। ସେତେବେଳେ କଂଗ୍ରେସର ୪୪ ଜଣ ଏମ୍ପି ଥିଲେ।
କିନ୍ତୁ ଏଥର ଏହି ତିନୋଟି କମିଟି ସେମାନଙ୍କଠାରୁ ଛଡ଼ାଇ ନିଆଯାଇଛି ଏବଂ ବର୍ତ୍ତମାନ ସରକାର ଆଇଟି କମିଟିକୁ ନିଜ ପାଖରେ ରଖିବାକୁ ଯାଉଛନ୍ତି। ଯଦି ସରକାର ଆଇଟି କମିଟି ନିଅନ୍ତି, ତେବେ ମୁଖ୍ୟ ବିରୋଧୀ ଦଳ ଭାବେ କଂଗ୍ରେସକୁ ବହିର୍ବ୍ୟାପାର କମିଟି ଦିଆଯିବା ଆବଶ୍ୟକ। ତେବେ ଏ କ୍ଷେତ୍ରରେ ସରକାର ଯେଉଁଭଳି ପଦକ୍ଷେପ ନେଉଛନ୍ତି ତାହା ଗଣତନ୍ତ୍ର ପ୍ରତି ଉପହାସ ବୋଲି ଅଧୀର ଅଭିଯୋଗ କରିଛନ୍ତି।
