ପରଜଙ୍ଗ, ୧୩।୭(ଡି.ଏନ.ଏ.) – ବିଶ୍ରାମାଗାର ନିର୍ମାଣରେ ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ (ଏନ୍ଏଚ୍ଏଆଇ)ଙ୍କ ଦୂରଦୃଷ୍ଟିର ଅଭାବ ପ୍ରତିବାଦରେ ମଙ୍ଗଳବାର ରାସ୍ତାକୁ ଓହ୍ଲାଇଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ ପଥରଖମ୍ବ ଗ୍ରାମବାସୀ। ସେମାନେ ପୂର୍ବାହ୍ନ ୯ଟାରୁ ଦୁଇଘଣ୍ଟା ଧରି ପଥରଖମ୍ବ ଛକ ନିକଟରେ ୫୩ନଂ. ଜାତୀୟ ରାଜପଥ ଅବରୋଧ କରିଥିଲେ।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ପଥରଖମ୍ବ ଗ୍ରାମର ଜନସଂଖ୍ୟା ପ୍ରାୟ ୪୦୦୦। ଗ୍ରାମର ଜନସାଧାରଣ, ଛାତ୍ରୀଛାତ୍ର, ରୋଗୀ ମୁଖ୍ୟତଃ ବସ୍ ଉପରେ ନିର୍ଭରଶୀଳ। ତେବେ ଏନ୍ଏଚ୍ଏଆଇ ପକ୍ଷରୁ ଗ୍ରାମ ନିକଟରେ ଥିବା ପୁରାତନ ବସ୍ ରହଣି ସ୍ଥଳ ପରିବର୍ତ୍ତେ ସେଠାରୁ ୫୦୦ ମିଟର ଦୂରରେ ବିଶ୍ରାମାଗାର ନିର୍ମାଣ କରାଯାଇଛି। ସେହିପରି ଉକ୍ତ ସ୍ଥାନକୁ ଯିବା ପାଇଁ ସର୍ଭିସ ରୋଡ୍ ମଧ୍ୟ ନାହିଁ। ଫଳରେ ଜାତୀୟ ରାଜପଥରେ ଗାଡ଼ିକୁ ଅପେକ୍ଷା କରିବା ବେଳେ ଦୁର୍ଘଟଣା ଘଟିବା ଆଶଙ୍କା ରହିଛି। ଏ ସଂକ୍ରାନ୍ତରେ ଏନ୍ଏଚ୍ଏଆଇ କର୍ତ୍ତୃପକ୍ଷ ଏବଂ ସ୍ଥାନୀୟ ପ୍ରଶାସନ ପାଖରେ ଅଭିଯୋଗ କରାଯାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଉନାହିଁ। ତେଣୁ ସେମାନେ ଆନ୍ଦୋଳନକୁ ଓହ୍ଲାଇଥିବା କହିଛନ୍ତି।
ରାସ୍ତାରୋକୋ ଯୋଗୁ ତାଳଚେରରୁ ଡୁବୁରୀ ଏବଂ ଡୁବୁରୀରୁ ତାଳଚେରକୁ ଚଳାଚଳ କରୁଥିବା ଶତାଧିକ ଯାନବାହନ ୨ ଘଣ୍ଟା ଧରି ଅଟକି ରହିଥିଲା। ସୂଚନା ପାଇ କାମାକ୍ଷାନଗର ଆଇଆଇସି ଶରତ ମହାଳିକ, ପରଜଙ୍ଗ ତହସିଲଦାର ଖଗେଶ୍ୱର ପାତ୍ର ପହଞ୍ଚି ଲୋକଙ୍କୁ ବୁଝାଶୁଝା କରିଥିଲେ। ଦାବି ପୂରଣ ଲାଗି ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ମିଳିବା ପରେ ରାସ୍ତାରୋକୋ ହଟିଥିଲା।
