ପୁରୀ ଅଫିସ,୨୬।୫: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିବାଦ ଦିନକୁ ଦିନ ବଢୁଥିବା ବେଳେ ଏହି ପ୍ରସଙ୍ଗରେ ବୁଧବାର ଜଗଦଗୁରୁ ଶଙ୍କରାଚାର୍ଯ୍ୟ ମତ ରଖିଛନ୍ତି। ବିକାଶ ନାମରେ ତୀର୍ଥଭୂମିର ଆଦର୍ଶ, ଅସ୍ତିତ୍ୱ ବିଲୁପ୍ତ କରାଯାଉଛି। ଏଥିପ୍ରତି ଧ୍ୟାନ ଦେଇ ତୀର୍ଥସ୍ଥଳକୁ ଭୋଗସ୍ଥଳୀର ରୂପ ଦିଆ ନ ଯାଉ ବୋଲି ଶଙ୍କରାଚାର୍ଯ୍ୟ କହିଛନ୍ତି। ସୂଚନାଯୋଗ୍ୟ, ମଙ୍ଗଳବାର ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିବାଦକୁ ନେଇ ଜଗଦ୍ଗୁରୁ ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ବତୀଙ୍କ ଉପସ୍ଥିତିରେ ପୁରୀ ଗୋବର୍ଦ୍ଧନ ମଠ ପରିସରରେ ଏକ ମିଳିତ ବୈଠକ ଅନୁଷ୍ଠିତ ହୋଇଥିଲା। ବିଭିନ୍ନ ଦଳର ନେତା, ସଂଗଠକ, ବୃଦ୍ଧିଜୀବୀ, ଐତିହ୍ୟ ବିଶାରଦ ଉପସ୍ଥିତ ରହି ପ୍ରକଳ୍ପ ପାଇଁ ମତ ରଖୁଥିବା ବେଳେ ସପକ୍ଷବାଦୀ ଏବଂ ବିପକ୍ଷବାଦୀ ନେଇ ଆଲୋଚନା ହୋଇଥିଲା। ଦୀର୍ଘସମୟ ଧରି ଆଲୋଚନା ହେବା ପରେ ବୈଠକର ପରଦିନ ଶଙ୍କରାଚାର୍ଯ୍ୟ ତାଙ୍କ ମତ ରଖିଛନ୍ତି। ସେ କହିଛନ୍ତି, ଧାର୍ମିକ ସହର ପୁରୀ ସମେତ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିକାଶର ମୁଁ ପକ୍ଷଧର କିନ୍ତୁ ତୀର୍ଥର ଅସ୍ତିତ୍ୱ ଆଦର୍ଶ ବିକାଶ ନାମରେ ବିଲୁପ୍ତ ହେଉ ତାହାର ସପକ୍ଷରେ ନାହିଁ। ମାର୍ଗକୁ ପ୍ରଶସ୍ତ କରିବା ପାଇଁ ମଠ ମନ୍ଦିର ଭାଙ୍ଗି ଯେଉଁ ବିନାଶ ଚାଲିଛି ତାହାର ପକ୍ଷଧର ମୁଁ ନୁହେଁ। ଦେବଦେବୀଙ୍କ ସ୍ଥାନକୁ ବିଲୁପ୍ତ କରାଯାଉଛି। ବିକାଶ ନାମରେ ମଠ ଭାଙ୍ଗିବା ଅନୁଚିତ। ରାସ୍ତା ପ୍ରଶସ୍ତ ଆଳରେ ଏକ ପ୍ରକାର ପ୍ରର୍ଦଶନସ୍ଥଳୀ କରିବା ଉଚିତ ନୁହେଁ। ବିକାଶ ନାମରେ ଯେଉଁ କାର୍ଯ୍ୟ ଚାଲିଛି ଏଥିରେ ଦେବଦେବୀ କ୍ରୋଧିତ ହେବେ, ଫଳରେ ରାଜ୍ୟରେ ସଙ୍କଟ ଦେଖାଦେବ। ଗଣତନ୍ତ୍ରକୁ ଆଧ୍ୟାତ୍ମିକ କ୍ଷେତ୍ରରେ ସହଭାଗିତା ଓ ସହଯୋଗିତାର ଅଧିକାର ରହିଛି। ନିଜ ଆଡୁ ନିର୍ଣ୍ଣୟ ନେବାର ଅଧିକାର ନାହିଁ। ତେଣୁ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀ ଧ୍ୟାନ ଦେବା ଉଚିତ। ଦେବଦେବୀଙ୍କ ଆସ୍ଥାନ ଭଙ୍ଗାଯାଇଥିବାରୁ ସରକାର ଦୁଃଖ ପ୍ରକାଶ କରନ୍ତୁ ବୋଲି ଶଙ୍କରାଚାର୍ଯ୍ୟ ମତ ରଖିଛନ୍ତି।
