ନୂଆଦିଲ୍ଲୀ,୧୧।୩: ୫ଟି ରାଜ୍ୟରେ ବିଧାନସଭା ନିର୍ବାଚନରେ ଖରାପ ପ୍ରଦର୍ଶନ ପରେ ଏବେ କଂଗ୍ରେସରେ ବଡ଼ ସଙ୍କଟ ଦେଖାଦେଇଛି। ବର୍ତ୍ତମାନ ସଂସଦର ଉପର ଗୃହ (ରାଜ୍ୟ ସଭା)ର ସଂଖ୍ୟା ଉପରେ ବିଶେଷ ପ୍ରଭାବ ପଡ଼ିବା ସହ କଂଗ୍ରେସ ବିରୋଧୀ ଦଳର ନେତା ମାନ୍ୟତା ହରାଇପାରେ। ଚଳିତ ବର୍ଷ ମାର୍ଚ୍ଚ ୩୧ରେ ରାଜ୍ୟ ସଭାର ଦ୍ୱିବର୍ଷୀୟ ନିର୍ବାଚନ ଅନୁଷ୍ଠିତ ହେବା ଏହାପରେ କଂଗ୍ରେସର ସଂଖ୍ୟା ଐତିହାସିକ ଭାବେ କମ୍ ରହିବ ବୋଲି କୁହାଯାଉଛି। ତେବେ ବିରୋଧୀଦଳର ନେତାଙ୍କ ସ୍ଥିତି ବଜାୟ ରଖିବା ପାଇଁ କଂଗ୍ରେସକୁ ସର୍ବନିମ୍ନ ଆବଶ୍ୟକତା ରହିଛି। ଯଦି ଚଳିତ ବର୍ଷ ଗୁଜୁରାଟ ନିର୍ବାଚନରେ ଏବଂ ଆସନ୍ତା ବର୍ଷ କର୍ନାଟକ ବିଧାନସଭା ନିର୍ବାଚନରେ କଂଗ୍ରେସ ଭଲ ପ୍ରଦର୍ଶନ କରିବାରେ ବିଫଳ ହୁଏ ତେବେ ଗୃହରେ ବିରୋଧୀ ଦଳର ନେତାଙ୍କ ଦବ୍ଦବା ହରାଇବ। ବର୍ତ୍ତମାନ ଉପର ଗୃହରେ କଂଗ୍ରେସର ୩୪ ଜଣ ସଦସ୍ୟ ଅଛନ୍ତି ଏବଂ ଚଳିତ ବର୍ଷ ରେକର୍ଡ କମ୍ ହେବାରୁ ଅତି କମ୍ରେ ଦଳକୁ ୭ଟି ସିଟ୍ ହରାଇବାକୁ ପଡ଼ିବ। ନିୟମ ଅନୁଯାୟୀ, ଗୋଟିଏ ଦଳ ନିକଟରେ ଗୃହର ମୋଟ ସଦସ୍ୟତା ଅତିକମ୍ରେ ୧୦ ପ୍ରତିଶତ ରହିବା ଆବଶ୍ୟକ। ସେତେବେଳେ ଯାଇ ସେମାନେ ନିଜ ନେତାଙ୍କ ପାଇଁ ବିରୋଧୀ ଦଳର ନେତା ମାନ୍ୟତା ପାଇପାରିବେ। ରାଜ୍ୟ ସଭାରେ ବିରୋଧୀଦଳର ନେତାଙ୍କ ସ୍ଥିତି ବଜାୟ ରଖିବା ପାଇଁ ଗୋଟିଏ ଦଳର ଅତି କମ୍ରେ ୨୫ ଜଣ ସଦସ୍ୟ ରହିବା ଉଚିତ ବୋଲି ରାଜ୍ୟ ସଭା ଅଧିକାରୀ କହିଛନ୍ତି। ବର୍ତ୍ତମାନ ମଲ୍ଲିକାର୍ଜୁନ ଖର୍ଗେ କଂଗ୍ରେସର ନେତା ତଥା ଗୃହରେ ବିରୋଧୀ ଦଳର ନେତା ରହିଛନ୍ତି।
