ଓ୍ବାଶିଂଟନ/ଚାଇନା,୨୨।୧୨: ଭାରତୀୟ ବଂଶୋଦ୍ଭବ କୂଟନୀତିଜ୍ଞ ଉଜ୍ରା ଜେୟାଙ୍କୁ ଆମେରିକା ରାଷ୍ଟ୍ରପତି ଜୋ ବାଇଡେନ୍ ତିବ୍ବତ ପ୍ରସଙ୍ଗରେ ସ୍ପେଶାଲ କୋଅର୍ଡିନେଟର ଭାବେ ନିଯୁକ୍ତ କରିଛନ୍ତି। ଚାଇନା ଓ ତିବ୍ବତୀୟ ଧର୍ମଗୁରୁ ଦଲାଇ ଲାମାଙ୍କ ମଧ୍ୟରେ ଆଲୋଚନା ପାଇଁ ମଧ୍ୟ ତାଙ୍କୁ ଦାୟିତ୍ୱ ଦିଆଯାଇଛି। ଅନ୍ୟପକ୍ଷେ ଉଜ୍ରାଙ୍କ ନିଯୁକ୍ତିକୁ ଚାଇନା ପକ୍ଷରୁ ବିରୋଧ କରାଯାଇଛି। ଉଜ୍ରାଙ୍କୁ ତିବ୍ବତ ପ୍ରସଙ୍ଗରେ ନିଯୁକ୍ତି ଦେବା ବେଜିଂ ଆଭ୍ୟନ୍ତରୀଣ ବ୍ୟାପାରରେ ଆମେରିକାର ହସ୍ତକ୍ଷେପ ବୋଲି ଚାଇନାର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଝାଓ ଲିଜିଆନ୍ କହିଛନ୍ତି। ସ୍ବତନ୍ତ୍ର ସଂଯୋଜକ ନିଯୁକ୍ତ ହେବା ପରେ ତିବ୍ବତ ସମ୍ପର୍କିତ ଆମେରିକା ସରକାରଙ୍କ ନୀତି, କାର୍ଯ୍ୟକ୍ରମ ଓ ପ୍ରକଳ୍ପଗୁଡ଼ିକୁ ନେଇ ସମନ୍ବୟ ରକ୍ଷା କରିବା ତାଙ୍କର ପ୍ରଥମ କର୍ତ୍ତବ୍ୟ ହେବ। ତାଙ୍କ ନିଯୁକ୍ତି ତତ୍କାଳ ଲାଗୁ ହୋଇଛି ବୋଲି ମଙ୍ଗଳବାର ଆମେରିକା ପରରାଷ୍ଟ୍ର ସଚିବ ଆଣ୍ଟୋନି ବ୍ଲିଙ୍କେନ ସୂଚନା ଦେଇଛନ୍ତି। ୧୯୫୯ରେ ଚାଇନା ଦଖଲ କରିବା ପରେ ଦଲାଇ ଲାମା ଏହି ହିମାଳୟ କ୍ଷେତ୍ରରୁ ଭାରତକୁ ପଳାୟନ କରିଥିଲେ। ସେବେଠୁ ସେ ନିର୍ବାସନରେ ରହି ଭାରତରେ ଆଶ୍ରୟ ନେଇଛନ୍ତି। ୮୬ ବର୍ଷୀୟ ଦଲାଇ ଲାମାଙ୍କୁ ଚାଇନା ଜଣେ ବିଚ୍ଛିନ୍ନତାବାଦୀ ନେତା ବିବେଚନା କରିଥାଏ। ଗତମାସରେ ଚାଇନାର ଶାସକ କମ୍ୟୁନିଷ୍ଟ ପାର୍ଟି ଓ୍ବାଙ୍ଗ୍ ଜୁନ୍ଝେଙ୍ଗ୍ଙ୍କୁ ତିବ୍ବତରେ ଦଳୀୟ ମୁଖ୍ୟ ନିଯୁକ୍ତ କରିଛି। ଉଇଗର ମୁସଲମାନଙ୍କ ବିରୋଧରେ ମାନବାଧିକାର ଉଲ୍ଲଂଘନରେ ଓ୍ବାଙ୍ଗ୍ଙ୍କ ସମ୍ପୃକ୍ତିକୁ ନେଇ ଆମେରିକା, ବ୍ରିଟେନ, ୟୁରୋପୀୟ ସଂଘ (ଇୟୁ) ଏବଂ କାନାଡା ପକ୍ଷରୁ ତାଙ୍କ ନିଯୁକ୍ତି ଉପରେ କଟକଣା ଜାରି କରାଯାଇଛି।
