ବ୍ରହ୍ମପୁର ଅଫିସ,୧୭।୧: ଅବକାରୀ ବିଭାଗ ସୋମବାର ଗଞ୍ଜାମ ଜିଲା ସଦର ଥାନା ଅଧୀନ ମହୁରୀକଳୁଆ ଛକ ନିକଟରୁ ୯୩୦ କେଜି ଗଞ୍ଜେଇ ଜବତ କରିଛି। ଘଟଣାରେ ସମ୍ପୃକ୍ତ ଜଣେ ଯୁବକଙ୍କୁ ବିଭାଗ ପକ୍ଷରୁ ଗିରଫ କରାଯାଇଛି। ସେ ହେଲେ ଗଜପତି ଜିଲା ମୋହନା ଥାନା ଅଧୀନ ବାଲିବାଡ ଗ୍ରାମର ପ୍ରେମାନନ୍ଦ ଗମଙ୍ଗୋ। ଜବତ ଗଞ୍ଜେଇ ଗଜପତିରୁ ବ୍ରହ୍ମପୁର ଦେଇ ଖୋର୍ଦ୍ଧା ଯାଉଥିବା ଗିରଫ ପ୍ରେମାନନ୍ଦ ଅବକାରୀ ବିଭାଗକୁ ସୂଚନା ଦେଇଛନ୍ତି।
ଏକ ପିକ୍ଅପ୍ ଭ୍ୟାନ୍ରେ ଗଞ୍ଜେଇ ଚାଲାଣ ହେଉଥିବା ନେଇ ଅବକାରୀ ବିଭାଗକୁ ଖବର ମିଳିଥିଲା। ଏନେଇ ଅବକାରୀ ଉପଆୟୁକ୍ତ ରାଜେନ୍ଦ୍ର କୁମାର ଭତ୍ରାଙ୍କ ନିର୍ଦ୍ଦେଶକ୍ରମେ ଏକ ଅବକାରୀ ଟିମ୍ ସଦର ମହୁରୀକଳୁଆ ଛକରେ ସୋମବାର ପେଟ୍ରୋଲିଂ କରୁଥିଲା। ସେତିକିବେଳେ ଅଧିକାରୀମାନେ ଏକ ପିକ୍ଅପ୍ ଭ୍ୟାନ୍କୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ବେଳେ ଗାଡିରୁ ୯୩୦ କେଜି ଗଞ୍ଜେଇ ଜବତ ହୋଇଥିଲା। ଅଧିକାରୀମାନେ ପ୍ରେମାନନ୍ଦଙ୍କୁ ଗିରଫ କରିଥିଲେ। ଜବତ ଗଞ୍ଜେଇର ଆନୁମାନିକ ମୂଲ୍ୟ ୯ ଲକ୍ଷ ୩୦ ହଜାର ଟଙ୍କା ହେବ ବୋଲି ଅବକାରୀ ବିଭାଗ ପକ୍ଷରୁ କୁହାଯାଇଛି।
