ନୟାଗଡ,୨୦।୬(ଲୋକନାଥ ମିଶ୍ର)ଆକାଶରେ ଘଡ଼ଘଡ଼ି ମାରୁଛି ଓ ବିଜୁଳି ଦେଖା ଦେଉଛି । ହେଲେ ବର୍ଷା ହେଉନି । ମୌସୁମୀ ଆଗମନରେ ବିଳମ୍ବ କାରଣରୁ ରଜ ଯିବା ପରେ ବି ବର୍ଷା ହେଉ ନ ଥିବାରୁ ଧାନ ଚାଷ ପ୍ରାରମ୍ଭରୁ ଚାଷୀର ଚିନ୍ତା ବଢ଼ିଲାଣି । ୧୧ ପ୍ରତିଶତ ଜମିରେ ଧାନ ବୁଣା ସରିଛି ା ଶୁଖିଲି ତଳି ପକା ଯାଇଥିଲେ ମଧ୍ୟ ବର୍ଷା ହେଉ ନ ଥିବାରୁ ଗଛ ଉଠୁନି । ସେହିପରି ବର୍ଷା ଅଭାବରୁ ୮୯ ପ୍ରତିଶତ ଜମି ଚାଷ ନ ହୋଇ ପଡ଼ିଆ ପଡି ରହିଛି । ଏନେଇ ବାଲୁଗଁାର ଚାଷୀ କାବୁଲି ପ୍ରଧାନ କୁହନ୍ତି, କାଳ ବୈଶାଖି ଯୋଗୁ ଜିଲାର ବିଭିନ୍ନ ସ୍ଥାନରେ ବର୍ଷା ହୋଇଥିଲା । ଚାଷ ପାଇଁ ବର୍ଷା ଠିକ୍ ନ ଥିଲେ ହେଁ ବହୁ କଷ୍ଟରେ ଚାଷ କରି ଧାନ ବୁଣିଛୁ । ପୁଣି କିଛି ଜମିରେ ଶୁଖିଲା ଧାନ ତଳି ପକାଇଛୁ । ହେଲେ ରଜ ଗଲା ପରେ ବି ବର୍ଷା ହେଉ ନାହିଁ । ଆମେ ଚାତକ ପକ୍ଷୀ ପରି ବର୍ଷାକୁ ଅନାଇ ରହିଛୁ । ନୂଆଗଁା ବ୍ଲକ୍ ରାଇପୁର ଗଁାର ରବୀନ୍ଦ୍ର ବରାଡ କୁହନ୍ତି, ଚଳିତ ବର୍ଷ ଭଲ ବର୍ଷା ହେବ ନାହିଁ । ମୌସୁମୀ ପ୍ରଥମରୁ ହଇରାଣ କଲାନି । ବର୍ଷା ନ ହେବାରୁ ଚାଷୀର ନିଦ ହଜି ଗଲାଣି । ଆମ ଅଞ୍ଚଳର ଚାଷୀ ଧାନ ବୁଣି ବର୍ଷାକୁ ଅପେକ୍ଷା କରି ରହିଛୁ ବୋଲି କହିଛନ୍ତି । ଭାପୁର ବ୍ଲକ୍ ଚକ୍ରଧରପ୍ରସାଦ ଗଁାର ଅଭିମନ୍ୟୁ ଗୁମାନ ସିଂ କୁହନ୍ତି, ବର୍ଷାକୁ ଅପେକ୍ଷା କରି ଚାଷକୁ ବିଳମ୍ବ କଲେ କ୍ଷତିରେ ପଡିବୁ । ଏଣୁ ବର୍ଷାକୁ ଆଶା ରଖି ଶୁଖିଲି ଧାନ ତଳି ବୁଣିଛୁ । ପୁଣି ବିଲରେ ଧାନ ବୁଣିଛୁ । ରଜ ସମୟରେ ବର୍ଷା ହେବ ବୋଲି ଆମର ବିଶ୍ୱାସ ଥିଲା । ଏବେ ପାଣିପାଗ ବିଭାଗ କହୁଛି ସ୍ବଳ୍ପ ଦିନ ଭିତରେ ବର୍ଷା ହେବ । ଆମେ ବର୍ଷାକୁ ଅପେକ୍ଷା କରି ରହିଛୁ । ଓଡ଼ଗଁା ବ୍ଲକ ଗୋଡିପଡା ଗଁାର ଚାଷୀ ଗଣେଶ୍ୱର ମିଶ୍ର କୁହନ୍ତି, ବର୍ଷା ନ ଥିବାରୁ ଜମି ଚାଷ କରିନୁ । ବର୍ଷା ହେଲେ ପଡିଆ ଜମି ଚାଷ କରିବୁ । ପରେ ଧାନ ବୁଣିବୁ ା ନ ହେଲେ ଧାନ ତଳି ପକାଇବୁ। ରଣପୁର ବ୍ଲକ ଲତାର ଗଁାର ଗୋବିନ୍ଦ କହଲସିଂ କୁହନ୍ତି, ଆମ ଅଞ୍ଚଳରେ ସବୁ ଜମି ପଡ଼ିଆ ପଡିଛି । ବର୍ଷା ହେଲା ପରେ ବିଲ କାଦୁଅ କରାଯିବ । ପରେ ତଳି ପଡିବ । ଆମେ ବର୍ଷାକୁ ଅପେକ୍ଷା କରିଛୁ। ପାଣିପୋଇଲା ଛକର ଚାଷୀ ମାଧବ ବେହେରା କୁହନ୍ତି, ସରକାରୀ ଧାନ ବିହନ ଆମେ କିଣୁନୁ । ନିଜେ ସଂରକ୍ଷଣ କରି ରଖିଥିବା ବିହନ ବୁଣୁଛୁ । ଚଳିତ ବର୍ଷ ଧାନ ବୁଣି ସାରିଛୁ । ବର୍ଷା ଭଲ ନ ହେଲେ ଧାନ କ୍ଷତି ହୋଇ ଯିବାର ଭୟ ରହିଛି । ଧାନ ନଷ୍ଟ ହୋଇଗଲେ ପୁଣି ତଳି ପାଇଁ ହଇରାଣ ହେବାକୁ ପଡିବ ବୋଲି ସେ କହିଛନ୍ତି । ଜିଲା ମୁଖ୍ୟ କୃଷି ଅଧିକାରୀ ସଞ୍ଜୟ କୁମାର ଦଳେଇ କୁହନ୍ତି, ବର୍ଷା ନ ଥିବାରୁ ଚାଷ ପଛେଇଛି । ଚାଷୀ ବର୍ଷାକୁ ଅପେକ୍ଷା କରି ରହିଛି ଧାନ ବୁଣିବାକୁ । ଧାନ ବିହନ କିଣିବାରେ ଚାଷୀର କୌଣସି ଅସୁବିଧା ନାହିଁ ବୋଲି ସେ କହିଛନ୍ତି ।
