ଓ୍ବାଶିଂଟନ୍,୨୮ା୯ : ୨୦୨୩ ପ୍ରଥମାର୍ଦ୍ଧରେ ଭାରତରେ ୨୫୫ ମୁସଲମାନ ବିରୋଧୀ ଘୃଣା ମନ୍ତବ୍ୟ ଦିଆଯାଇଛି। ଭାଜପା ଶାସିତ ରାଜ୍ୟଗୁଡ଼ିକରେ ସର୍ବାଧିକ ମୁସଲମାନଙ୍କୁ ଟାର୍ଗେଟ କରାଯାଇଥିବା ବିଷୟ ହିନ୍ଦୁତ୍ୱ ଓ୍ବାଚ୍ ରିପୋର୍ଟରେ ଦର୍ଶାଯାଇଛି। ଚଳିତବର୍ଷ ୫ ରାଜ୍ୟରେ ବିଧାନସଭା ଭୋଟ ଏବଂ ୨୦୨୪ରେ ସାଧାରଣ ନିର୍ବାଚନ ଥିବାବେଳେ ଏହି ଉଦ୍ବେଗଜନକ ତଥ୍ୟ ସାମ୍ନାକୁ ଆସିଛି।
ଓ୍ବାଶିଂଟନ୍ସ୍ଥିତ ହିନ୍ଦୁତ୍ୱ ଓ୍ବାଚ୍ ହେଉଛି, ଏକ ତଥ୍ୟ ଆଧାରିତ ଗବେଷଣା ଉଦ୍ୟମ, ଯାହାଦ୍ୱାରା ହିନ୍ଦୁ ଦକ୍ଷିଣପନ୍ଥୀ ସଙ୍ଗଠନଗୁଡ଼ିକର କାର୍ଯ୍ୟକଳାପ ଉପରେ ନଜର ରଖାଯାଇଥାଏ। ଏହି ସଂସ୍ଥା ପକ୍ଷରୁ ଜାରି ରିପୋର୍ଟରେ ଉଲ୍ଲେଖ କରାଯାଇଛି ଯେ, ୨୦୨୩ର ପ୍ରଥମ ୬ ମାସ ମଧ୍ୟରେ ଦେଶରେ ଆୟୋଜିତ ସଭାଗୁଡ଼ିକରେ ୨୫୫ ଥର ମୁସଲମାନ ବିରୋଧୀ ମନ୍ତବ୍ୟ ଦିଆଯାଇଥିବା ରେକର୍ଡ କରାଯାଇଛି। ଏଥିରୁ ୨୦୫ ମାମଲା ବା ୮୦% ହେଉଛି ଭାଜପା ଶାସିତ ରାଜ୍ୟରେ ହୋଇଛି। ମୁସଲମାନ ବିରୋଧୀ ମନ୍ତବ୍ୟ ମହାରାଷ୍ଟ୍ରରେ ସର୍ବାଧିକ। ଏହି କ୍ଷେତ୍ରରେ କର୍ନାଟକ ଦ୍ୱିତୀୟ ସ୍ଥାନରେ ଥିବାବେଳେ ମଧ୍ୟପ୍ରଦେଶ, ରାଜସ୍ଥାନ ଓ ଗୁଜରାଟ ମଧ୍ୟ ପଛରେ ପଡ଼ିନାହିଁ।
ଭାରତର ୧%ରୁ କମ୍ ଜନସଂଖ୍ୟା ଥିବା ଉତ୍ତରାଖଣ୍ଡରେ ପ୍ରାୟ ୫ ପ୍ରତିଶତ ମୁସଲମାନ ବିରୋଧୀ ଘୃଣା ମନ୍ତବ୍ୟ ଦେଖିବାକୁ ମିଳିଛି। ରିପୋର୍ଟରେ ଆହୁରି କୁହାଯାଇଛି ଯେ, ରାଷ୍ଟ୍ରୀୟ ସ୍ବୟଂସେବକ ସଂଘ(ଆର୍ଏସ୍ଏସ୍), ବିଶ୍ୱହିନ୍ଦୁ ପରିଷଦ (ଭିଏଚ୍ପି), ବଜରଙ୍ଗ ଦଳ, ସକଳ ହିନ୍ଦୁ ସମାଜ ଏବଂ ଭାରତୀୟ ଜନତା ପାର୍ଟି (ଭାଜପା) ସହ ଜଡ଼ିତ ସଙ୍ଗଠନଗୁଡ଼ିକ ପକ୍ଷରୁ ଅଧିକାଂଶ ଘୃଣା ମନ୍ତବ୍ୟ ଦିଆଯାଇଥିବା ସମାବେଶ ଆୟୋଜିତ ହୋଇଛି। ଏହି ସଙ୍ଗଠନଗୁଡ଼ିକ ଅଧିକାଂଶ ସମୟରେ ଲଭ୍ ଜିହାଦ, ଲ୍ୟାଣ୍ଡ୍ ଜିହାଦ, ସଂଖ୍ୟାଲଘୁଙ୍କ ଜନସଂଖ୍ୟା ବୃଦ୍ଧିକୁ ନେଇ ବିଭ୍ରାନ୍ତିକର ତଥ୍ୟ ଭଳି ମୁସଲମାନ ବିରୋଧୀ ଷଡ଼ଯନ୍ତ୍ର ସିଦ୍ଧାନ୍ତ ଉପରେ ଅଧିକ ଅପପ୍ରଚାର ଚଳାଇଛନ୍ତି। ଏମାନଙ୍କ ପ୍ରାୟ ୩୩% ସମାବେଶରେ ମୁସଲମାନମାନଙ୍କ ବିରୋଧରେ ହିଂସାକୁ ଉସୁକାଯାଉଛି।
ପ୍ରାୟ ୧୧% କାର୍ଯ୍ୟକ୍ରମରେ ମୁସଲମାନଙ୍କୁ ବର୍ଜନ କରିବା ପାଇଁ ହିନ୍ଦୁଙ୍କୁ ଆହ୍ବାନ ଦିଆଯାଉଛି। ସେହିପରି ୪% ସମାବେଶରେ ମୁସଲମାନ ମହିଳାମାନଙ୍କ ବିରୋଧରେ ଲିଙ୍ଗଗତ ଆକ୍ଷେପ ଜରିଆରେ ଟାର୍ଗେଟ କରାଯାଉଛି। ଗତ ମାର୍ଚ୍ଚ ମାସରେ ରାମନବମୀ ପଡ଼ିଥିବାବେଳେ ସବୁଠୁ ବେଶି ଘୃଣା ମନ୍ତବ୍ୟ ରେକର୍ଡ କରାଯାଇଥିଲା। ଭାରତ ସରକାରଙ୍କ ପକ୍ଷରୁ ଆନୁଷ୍ଠାନିକ ଭାବେ ‘ହେଟ୍ ସ୍ପିଚ୍’ ପରିଭାଷିତ ହୋଇ ନ ଥିବାରୁ ହିନ୍ଦୁତ୍ୱ ଓ୍ବାଚ୍ ଜାତିସଂଘର ବର୍ଗୀକରଣ ଆଧାରରେ ଏହି ରିପୋର୍ଟ ପ୍ରସ୍ତୁତ କରିଛି। ଜାତିସଂଘ ଅନୁସାରେ ମୌଖିକ, ଲିଖିତ ବା ବ୍ୟବହାରିକ ଭାବେ ଏକ ନିର୍ଦ୍ଦିଷ୍ଟ ଗୋଷ୍ଠୀ, ଜାତି, ଧର୍ମ କିମ୍ବା ସମ୍ପ୍ରଦାୟକୁ ଟାର୍ଗେଟ କରି ବ୍ୟବହୃତ ଭାଷା ହେଉଛି ଘୃଣା ମନ୍ତବ୍ୟ। ରିପୋର୍ଟ ପ୍ରସ୍ତୁତି ବେଳେ ସାମାଜିକ ଗଣମାଧ୍ୟମର ସହାୟତା ମଧ୍ୟ ନିଆଯାଇଛି।
