ନୂଆଦିଲ୍ଲୀ,୧୭।୯(ପି.ଟି.): ଦେଶରେ ୮ଟି ଖେଲୋ ଇଣ୍ଡିଆ ଷ୍ଟେଟ୍ ସେଣ୍ଟର ଅଫ୍ ଏକ୍ସିଲେନ୍ସି (କେଆଇଏସ୍ସିଇ)କୁ ଅପ୍ଗ୍ରେଡ୍ କରାଯିବ। ଏ ନେଇ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ଏ ବାବଦରେ ୯୫.୧୯ କୋଟି ଟଙ୍କା ବୟ ଅଟକଳ କରାଯାଇଛି। ଦେଶରେ କ୍ରୀଡ଼ା ପ୍ରତିଭା ଚିହ୍ନଟ ଓ ସେମାନଙ୍କୁ ଅଲିମ୍ପିକ ଚାମ୍ପିୟନରେ ପରିଣତ କରିବାକୁ ଏପରି ନିଷ୍ପତ୍ତି ନିଆଯାଇଛି ବୋଲି ମନ୍ତ୍ରଣାଳୟ ତରଫରୁ କୁହାଯାଇଛି।
ପ୍ରାରମ୍ଭିକ ପର୍ଯ୍ୟୟରେ ୮ଟି ରାଜ୍ୟରେ କେଆଇଏସ୍ସିଇ ପ୍ରତିଷ୍ଠା କରିବାକୁ ନିଷ୍ପତ୍ତି ନିଆଯାଇଥିଲା। ଓଡ଼ିଶାର କଳିଙ୍ଗ ଷ୍ଟାଡିୟମ, ମିଜୋରାମ, ତେଲଙ୍ଗାନା, ମଣିପୁର, ନାଗାଲାଣ୍ଡ, ଅରୁଣାଚଳ ପ୍ରଦେଶ, କର୍ନାଟକ ଓ କେରଳରେ କେଆଇଏସ୍ସିଇ ପ୍ରତିଷ୍ଠା ହେବ। ଏହି ସବୁ ରାଜ୍ୟରେ କେଆଇଏସ୍ସିଇଗୁଡିକର ଉନ୍ନତି କରାଯିବ। ଏହି କ୍ରମରେ ଭିତ୍ତିଭୂମିର ଉନ୍ନତି, ସ୍ପୋଟର୍ସ ସାଇନ୍ସ ପ୍ରତିଷ୍ଠା ଓ କ୍ୱାଲିଟି କୋଚ୍, ପିଜିଓଥେରାପିଷ୍ଟ, ଷ୍ଟ୍ରେନ୍ଥ ଆଣ୍ଡ କଣ୍ଡିସନିଂ ଏକ୍ସପର୍ଟ ନିଯୁକ୍ତି ଦିଆଯିବ। ସବୁ ଖେଳାଳିଙ୍କୁ ଉଚ୍ଚକୋଟୀର କ୍ରୀଡ଼ା ସରଞ୍ଜାମ ପ୍ରଦାନ କରାଯିବ। ଏକାଡେମୀରେ ହାଇ ପରଫର୍ମାନ୍ସ ମ୍ୟାନେଜର ରହିବେ। ଫରଫର୍ମାନ୍ସ ମ୍ୟାନେଜମେଣ୍ଟ ଓ କ୍ୱାଲିଟି ସ୍ପୋଟର୍ସ ସାଇନ୍ସ ଇନ୍ପୁଟ୍ ଦେବାରେ ହାଇ ପରଫର୍ମାନ୍ସ ମ୍ୟାନେଜରଙ୍କ ଭୂମିକା ରହିବ।
ସବୁ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳଗୁଡିକ ସହ ମିଶି ମନ୍ତ୍ରଣାଳୟ ଏବେ ଥିବା କ୍ରୀଡ଼ା ଭିତ୍ତିଭୂମିର ଉନ୍ନତି କରିବ। ମନ୍ତ୍ରଣାଳୟ କହିବା ଅନୁସାରେ ପ୍ରତ୍ୟେକ କେଆଇଏସ୍ସିଇରେ ୧୪ଟି ଅଲିମ୍ପିକ୍ କ୍ରୀଡ଼ାକୁ ଗୁରୁତ୍ୱ ଦେବା ସହ ଆଥଲେଟମାନଙ୍କୁ ଅଧିକରୁ ଅଧିକ ସାହାଯ୍ୟ କରିବ। ତେବେ ଗୋଟିଏ ରାଜ୍ୟ କିମ୍ବା କେନ୍ଦ୍ର ଶାସିତ ଅଞ୍ଚଳରେ ୩ଟି ଅଲିମ୍ପିକ କ୍ରୀଡ଼ାକୁ ସମର୍ଥନ ଦିଆଯିବ।
ଦେଶରେ କ୍ରୀଡ଼ା ସଂସ୍କୃତିର ଉନ୍ନତି ଓ ଅଲିମ୍ପିକ୍ସରେ ଭାରତର ପ୍ରଦର୍ଶନକୁ ଦୃଷ୍ଟାନ୍ତମୂଳକ କରିବା ପାଇଁ ସରକାର ଏଭଳି ସବୁ ଗଠନମୂଳକ ପଦକ୍ଷେପ ଗ୍ରହଣ କରୁଛନ୍ତି ବୋଲି କ୍ରୀଡ଼ାମନ୍ତ୍ରୀ କିରେନ ରିଜିଜୁ କହିଛନ୍ତି। କେତୋଟି ନିର୍ଦ୍ଦିଷ୍ଟ କ୍ରୀଡ଼ାରେ ଆଥଲେଟମାନଙ୍କୁ ଦକ୍ଷକରି ଗଢିତୋଳିବା ପାଇଁ ଓ ସେମାନଙ୍କୁ ଉଚ୍ଚକୋଟୀର ପ୍ରଶିକ୍ଷଣ ଓ ସୁବିଧା ସୁଯୋଗ ଦେବାକୁ ଏହି ସେଣ୍ଟରଗୁଡିକ ନିର୍ଣ୍ଣାୟକ ଭୂମିକା ଗ୍ରହଣ କରିବ। ୨୦୨୮ ଅଲିମ୍ପିକ୍ସରେ ଭାରତ ପଦକ ତାଲିକାରେ ଶ୍ରେଷ୍ଠ ୧୦ଟି ସ୍ଥାନରେ ରହିବା ଲକ୍ଷ୍ୟରେ ସରକାର ଏହିସବୁ ପଦକ୍ଷେପ ନେଉଛନ୍ତି। ଭାରତ ଅବଶ୍ୟ ଏଥିରେ ସଫଳ ହେବ ବୋଲି ରିଜିଜୁ ଆଶାପ୍ରକାଶ କରିଛନ୍ତି।
