ନୂଆଦିଲ୍ଲୀ, ୧୫।୩ : କେନ୍ଦ୍ରୀୟ ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ମଙ୍ଗଳବାର ଲୋକ ସଭାକୁ ସୂଚନା ଦେଇଛନ୍ତି ଯେ ମାଓବାଦୀ କାର୍ଯ୍ୟକଳାନ ଘଟଣା ୨୦୨୧ରେ ୭୭ ପ୍ରତିଶତ ହ୍ରାସ ପାଇ ୫୦୯ ରେ ପହଞ୍ଚିଛି। ୨୦୦୯ରେ ଏହା ୨,୨୫୮ ଥିଲା। ଏକ ଲିଖିତ ପ୍ରଶ୍ନର ଉତ୍ତରରେ ମନ୍ତ୍ରୀ କହିଛନ୍ତି ଯେ ଉଭୟ ସାଧାରଣ ନାଗରିକ ଏବଂ ସୁରକ୍ଷା ବାହିନୀଙ୍କ ମୃତ୍ୟୁ ସଂଖ୍ୟା ମଧ୍ୟ କମିଛି। ୨୦୧୦ ରେ ଏହା ସର୍ବାଧିକ ୧,୦୦୫ ଥିବାବେଳେ ୨୦୨୧ରେ କମି ୧୪୭ ହୋଇଛି।
ମାଓବାଦୀ ପ୍ରଭାବିତ ଜିଲାରେ ଲୋକଙ୍କ ସୁରକ୍ଷା ସମ୍ବନ୍ଧୀୟ ବ୍ୟୟ ଗତ ଚାରି ବର୍ଷ ମଧ୍ୟରେ ଦୁଇଥର ସମୀକ୍ଷା କରାଯାଇଛି। ଏହାକୁ ୨୦୧୮ ରେ ମାଓବାଦୀ ପ୍ରଭାବିତ ଜିଲାରେ ଲୋକଙ୍କ ସୁରକ୍ଷା ସମ୍ବନ୍ଧୀୟ ବ୍ୟୟ ଗତ ଚାରି ବର୍ଷ ମଧ୍ୟରେ ଦୁଇଥର ସମୀକ୍ଷା କରାଯାଇଛି। ଏହାକୁ ୨୦୧୮ ରେ ୧୨୬ ପ୍ରତିଶତରୁ ରୁ ୯୦ ପ୍ରତିଶତ ଏବଂ ଜୁଲାଇ -୨୦୨୧ ରେ ୭୦ ପ୍ରତିଶତକୁ ହ୍ରାସ କରାଯାଇଛି। ସେହିପରି ମାଓପ୍ରବଣ ଜିଲା ସଂଖ୍ୟା ୨୦୧୦ରେ ୯୬ ଥିବାବେଳେ ୨୦୨୧ରେ ଏହା ୪୬କୁ ଖସି ଆସିଛି।
ବିକାଶ ସମ୍ପର୍କରେ ମନ୍ତ୍ରୀ କହିଛନ୍ତି ଯେ ମାଓବାଦୀ ପ୍ରଭାବିତ ଅଞ୍ଚଳରେ ଫ୍ଲାଗସିପ ସ୍କିମ କାର୍ଯ୍ୟକାରୀ କରିବା ବ୍ୟତୀତ ଭାରତ ସରକାର ମାଓବାଦୀ ପ୍ରଭାବିତ ରାଜ୍ୟଗୁଡିକରେ ଅନେକ ପଦକ୍ଷେପ ନେଇଛନ୍ତି। ଏଥିରେ ସଡକ ନେଟୱାର୍କର ସମ୍ପ୍ରସାରଣ, ଟେଲିକମ ସଂଯୋଗରେ ଉନ୍ନତି, ଦକ୍ଷତା ଏବଂ ଆର୍ଥିକ ଅନ୍ତର୍ଭୂକ୍ତିକୁ ଗୁରୁତ୍ୱ ଦିଆଯାଇଛି। ରାୟ କହିଛନ୍ତି ଯେ ମାଓବାଦୀ ପ୍ରଭାବିତ ରାଜ୍ୟଗୁଡ଼ିକୁ ସ୍ବତନ୍ତ୍ର କେନ୍ଦ୍ରୀୟ ସହାୟତା ଯୋଜନା ଅଧୀନରେ ପାଣ୍ଠି ଯୋଗାଇ ଦିଆଯାଉଛି ଯାହାକି ପ୍ରଭାବିତ ଜିଲାର ଜନସାଧାରଣଙ୍କ ଭିତ୍ତିଭୂମି ତଥା ସେବାରେ ବିନିଯୋଗ ହେଉଛି।
ଗତ ତିନିବର୍ଷ ମଧ୍ୟରେ ସ୍ବତନ୍ତ୍ର କେନ୍ଦ୍ରୀୟ ସହାୟତା ଯୋଜନା ଅନୁଯାୟୀ ରାଜ୍ୟଗୁଡିକୁ ୨,୪୨୩.୨୪ କୋଟି ଟଙ୍କା ପ୍ରଦାନ କରାଯାଇଛି ଏବଂ ସମୟସୀମା ମଧ୍ୟରେ ୭,୮୧୫ଟି କାର୍ଯ୍ୟ ଶେଷ ହୋଇଛି। ସେ କହିଛନ୍ତି ଯେ ଚଳିତ ଆର୍ଥିକ ବର୍ଷରେ ୪୮୦ କୋଟି ଟଙ୍କା ରିଲିଜ ହୋଇଛି। ଥଇଥାନ ପ୍ୟାକେଜରେ ଉଚ୍ଚ ପଦସ୍ଥ ବାମପନ୍ଥୀ ଉଗ୍ରବାଦୀଙ୍କ ପାଇଁ ତୁରନ୍ତ ୫ଲକ୍ଷ ଟଙ୍କା ଏବଂ ଅନ୍ୟ ବାମପନ୍ଥୀ ଉଗ୍ରବାଦୀଙ୍କ ପାଇଁ ୨.୫ ଲକ୍ଷ ଟଙ୍କା ଅନୁଦାନ ପ୍ରଦାନ କରାଯାଉଛି।
ଏଥିସହ ଏହି ଯୋଜନା ଅଧୀନରେ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ସମର୍ପଣ ପାଇଁ ପ୍ରୋତ୍ସାହନ ମଧ୍ୟ ପ୍ରଦାନ କରାଯାଇଛି ବୋଲି ମନ୍ତ୍ରୀ କହିଛନ୍ତି। ତିନି ବର୍ଷ ପାଇଁ ମାସିକ ୬ହଜାର ଟଙ୍କା ଷ୍ଟାଇପେଣ୍ଡ ସହିତ ସେମାନଙ୍କ ପସନ୍ଦର ବାଣିଜ୍ୟ କିମ୍ବା ବୃତ୍ତିରେ ତାଲିମ ପ୍ରଦାନ କରିବାର ବ୍ୟବସ୍ଥା କରାଯାଇଛି।
