ନୂଆଦିଲ୍ଲୀ,୧୫।୩: ଲଗାତର ୨୦ ଦିନ ହେଲାଣି ୟୁକ୍ରେନ ଓ ରୁଷିଆ ମଧ୍ୟରେ ଯୁଦ୍ଧ ଜାରି ରହିଛି। ଇତିମଧ୍ୟରେ ୟୁକ୍ରେନରୁ ଭାରତୀୟଙ୍କ ପ୍ରତ୍ୟାବର୍ତ୍ତନ ସମ୍ପର୍କରେ ବର୍ହିବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ରାଜ୍ୟ ସଭାରେ ଏକ ବିବୃତ୍ତି ରଖିଛନ୍ତି। କଠିନ ପରିସ୍ଥିତିରେ ମଧ୍ୟ ୨୨୫୦୦ରୁ ଊର୍ଦ୍ଧ୍ୱ ଛାତ୍ରଙ୍କୁ ୟୁକ୍ରେନରୁ ଭାରତକୁ ଫେରାଇ ଅଣାଯାଇଛି ବୋଲି ଏସ୍ ଜୟଶଙ୍କର କହିଛନ୍ତି। ଲଗାତର ଭାବେ ଅନ୍ତର୍ଜାତୀୟ ସ୍ତରରେ ଆଲୋଚନା କରୁଥିଲୁ କିନ୍ତୁ ଆମ ସମ୍ମୁଖରେ ଏକ ଆହ୍ବାନ ଥିଲା ଯେ, ନାଗରିକମାନଙ୍କୁ କିପରି ସମ୍ପୂର୍ଣ୍ଣ ସୁରକ୍ଷିତ ସେଠାରୁ ବାହାର କରାଯିବ। ଏହାକୁ ଧ୍ୟାନରେ ରଖି ଭାରତ ସରକାର ‘ଅପରେଶନ ଗଙ୍ଗା’ ଅଭିଯାନ ଆରମ୍ଭ କରିଥିଲେ। କଠିନ ପରିସ୍ଥିତିରେ ବି ଲକ୍ଷ୍ୟସ୍ଥଳରେ ପହଞ୍ଚିବା ଏହା ଏକ ପ୍ରମୁଖ ଅପରେଶନ ରହିଥିଲା ବୋଲି ଜୟଶଙ୍କର କହିଛନ୍ତି। ଫେବୃଆରୀ ୧୫, ୨୦ ଓ ୨୨ରେ ଭାରତୀୟ ଛାତ୍ର ଏବଂ ନାଗରିକମାନଙ୍କୁ ୟୁକ୍ରେନ ଛାଡ଼ିବାକୁ ଭାରତୀୟ ଦୂତାବାସ ପକ୍ଷରୁ କୁହାଯାଇଥିଲା। ଲଗାତର ଆଡଭାଇଜରୀ ଜାରି ହେବା ସତ୍ତ୍ୱେ ପାଠପଢ଼ା ବନ୍ଦ ହୋଇଯିବା ଭୟରେ ବହୁ ସଂଖ୍ୟକ ଛାତ୍ର ସେଠାରୁ ଫସି ରହିଥିଲେ। ଯେତେବେଳେ ପରିସ୍ଥିତି ଅଧିକ ଖରାପ ହେଲା, ୧୮ହଜାରରୁ ଅଧିକ ଭାରତୀୟ ଛାତ୍ର ସେଠାରେ ଫସି ରହିଥିଲେ। ଏହାକୁ ଦୃଷ୍ଟିରେ ରଖି ଭାରତ ସମେତ ୟୁକ୍ରେନ ଦୂତାବାସରେ ଏକ କଲ୍ ସେଣ୍ଟର ପ୍ରତିଷ୍ଠା କରାଯାଇଥିଲା। ଅନ୍ୟପଟେ ଯୁଦ୍ଧ ସଙ୍କଟ ଯୋଗୁ ଏୟାର ସ୍ପେସ୍ ମଧ୍ୟ ବନ୍ଦ ହୋଇଯିବାରୁ ପଡୋଶୀ ଦେଶର ସହାୟତାରେ ସେମାନଙ୍କୁ ଉଦ୍ଧାର କରିବାକୁ ଚିନ୍ତା କରାଯାଇଥିଲା। ଏହି ଅପରେଶନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲଗାତର ଭାବେ ସମୀକ୍ଷା ବୈଠକ କରିବା ସହ ଏହାର ତଦାରଖ କରୁଥିଲେ ବୋଲି ଜୟଶଙ୍କର କହିଛନ୍ତି।
