ନୂଆଦିଲ୍ଲୀ,୧୨।୧୦ : ସେପ୍ଟେମ୍ବର ୩୦ରେ ପାଣିପାଗ ବିଭାଗ ଦ୍ୱାରା ମୌସୁମୀ ଫେରିଯାଇଥିବା ଘୋଷଣା କରାଯାଇଥିଲା। କିନ୍ତୁ ଏହା ପରେ ଉତ୍ତର ଭାରତର ଅନେକ ରାଜ୍ୟରେ ଅକ୍ଟୋବର ୧୦ ମଧ୍ୟରେ ପ୍ରବଳ ବର୍ଷା ହୋଇଥିଲା। ଯଦିଓ ପାଣିପାଗ ବିଭାଗ ଏହାକୁ ମୌସୁମୀ ପରବର୍ତ୍ତୀ ବର୍ଷା ବୋଲି କହୁଛି, କିନ୍ତୁ ତାହା ସେପରି ମନେ ହେଉନାହିଁ।
ବିଶେଷଜ୍ଞମାନେ ମତପୋଷଣ କରିଛନ୍ତି ଯେ, ମୌସୁମୀ ଫେରି ଯାଇଥିବା ଘୋଷଣା କରିବା ପାଇଁ ପାଣିପାଗ ବିଭାଗର ଟିକେ ତତ୍ପର ଥିଲା। ବାସ୍ତବରେ, ଅକ୍ଟୋବରର ୧୦ ତାରିଖ ମଧ୍ୟରେ ଉତ୍ତର-ପଶ୍ଚିମ ଭାରତରେ ହାରାହାରି ୪୦୫ ପ୍ରତିଶତ ଅଧିକ ବର୍ଷା ହୋଇଛି। ଦିଲ୍ଲୀରେ ୬୨୫ ପ୍ରତିଶତ ଅଧିକ ବର୍ଷା ହୋଇଛି। ସେହିପରି ହରିୟାଣା ୫୭୭ ପ୍ରତିଶତ ଏବଂ ଉତ୍ତରାଖଣ୍ଡରେ ହାରାହାରି ତୁଳନାରେ ୫୩୮ ପ୍ରତିଶତ ଅଧିକ ବର୍ଷା ହୋଇଛି।
ଉତ୍ତରପ୍ରଦେଶର ପୂର୍ବ ଏବଂ ପଶ୍ଚିମ ଭାଗ ସମେତ ସମସ୍ତ ଜିଲାରେ ୬୯୮ ପ୍ରତିଶତ ଅଧିକ ବର୍ଷା ହୋଇଛି। ପାଣିପାଗ ବିଭାଗ ଦ୍ୱାରା ଘୋଷଣା କରାଯାଇଥିଲା ଯେ ୩୦ ସେପ୍ଟେମ୍ବରରୁ ପଞ୍ଜାବ, ଚଣ୍ଡିଗଡ଼, ଦିଲ୍ଲୀ, ଜମ୍ମୁ-କଶ୍ମୀର, ହିମାଚଳ ପ୍ରଦେଶ, ଉତ୍ତରପ୍ରଦେଶ, ହରିୟାଣା ଏବଂ ରାଜସ୍ଥାନରୁ ମୌସୁମୀ ବିଦାୟ ନେଇଛି। ତେବେ ଏହାପରେ ସେହି ଅଞ୍ଚଳରେ ପ୍ରବଳ ବର୍ଷା ପରେ ଏବେ ପାଣିପାଗ ବିଭାଗର ଆକଳନ ଉପରେ ପ୍ରଶ୍ନ ଉଠିଛି। ଅପରପକ୍ଷରେ ମଙ୍ଗଳବାର ପାଣିପାଗ ବିଭାଗ କହିଛି ଯେ ମୌସୁମୀ ବର୍ତ୍ତମାନ ଫେରିବା ଆରମ୍ଭ କରିଛି। ଉତ୍ତରକାଶୀ, ନଜୀବବାଦ, ଆଗ୍ରା, ଗ୍ବାଲିଅର୍, ରତଲାମ ଏବଂ ଭାରୁଚରୁ ମୌସୁମୀ ବିଦାୟ ନେବାରେ ଲାଗିଛି।
ପାଣିପାଗ ବିଭାଗର ନୂତନ ପୂର୍ବାନୁମାନରେ କୁହାଯାଇଛି ଯେ ଆସନ୍ତା ୪ ରୁ ୫ ଦିନ ମଧ୍ୟରେ ଉତ୍ତର-ପଶ୍ଚିମ ଏବଂ ମଧ୍ୟ ଭାରତର ବିଭିନ୍ନ ରାଜ୍ୟରୁ ମୌସୁମୀ ପ୍ରସ୍ଥାନ କରିବ। ପାଣିପାଗ ବିଭାଗର ମହାନିର୍ଦ୍ଦେଶକ ଏମ. ମହାପାତ୍ର କହିଛନ୍ତି, ଅକ୍ଟୋବରର ପ୍ରଥମ ୧୦ ଦିନରେ ଅଧିକ ବୃଷ୍ଟିପାତର ହାର ବହୁତ ଅଧିକ। ଏହାର କାରଣ ହେଉଛି ଏହି ଋତୁରେ ବର୍ଷା ସାଧାରଣତଃ ବହୁତ କମ ହୋଇଛି। ବଙ୍ଗୋପସାଗରରେ ଲଘୁଚାପ ପରିସ୍ଥିତି ଯୋଗୁଁ ଉତ୍ତରପ୍ରଦେଶ ଏବଂ ମଧ୍ୟପ୍ରଦେଶ ଭଳି ରାଜ୍ୟରେ ପ୍ରବଳ ବର୍ଷା ହୋଇଛି। ପଶ୍ଚିମ ସହିତ ଦକ୍ଷିଣ ପୂର୍ବ ପବନର ଧକ୍କା ହେତୁ ସମଗ୍ର ଉତ୍ତର ଭାରତରେ ପ୍ରବଳ ବର୍ଷା ହୋଇଛି।
ପାଣିପାଗ ବିଭାଗ ପକ୍ଷରୁ ମୌସୁମୀ ବିଦାୟ ନେବା ଘୋଷଣା ପରେ ମଧ୍ୟ ପ୍ରବଳ ବର୍ଷା ପ୍ରସଙ୍ଗରେ ମହାପାତ୍ର ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି ଏହା ସତ୍ୟ ଯେ ଆମେ ଦିଲ୍ଲୀରୁ ମୌସୁମୀ ପ୍ରତ୍ୟାହାର ବିଷୟରେ ଆଲୋଚନା କରିଥିଲୁ। କିନ୍ତୁ ତା’ପରେ ମୌସୁମୀ ବିଦାୟ ନେଇଥିଲା ଏବଂ ଏହା ଚାଲିଯିବା ବେଳକୁ ବହୁତ ବର୍ଷା ହୋଇଥିଲା। ତେଣୁ ଏହା ଏକ ପ୍ରକାର ବର୍ଡର ମାମଲା। ତେବେ ସେ କହିଛନ୍ତି ଯେ ଆମେ କେବଳ ବର୍ଷା ବିଷୟରେ ସଠିକ ପୂର୍ବାନୁମାନ କରିଛୁ ଏବଂ ୭ ଦିନର ପୂର୍ବାନୁମାନ ମଧ୍ୟ କରିସାରିଛୁ। ସେ କହିଛନ୍ତି ଯେ ଏହା ପୂର୍ବରୁ ୧୯୮୮ରେ ଏଭଳି ଘଟିଥିଲା। ସେତେବେଳେ ମୌସୁମୀ ଯିବାବେଳେ ପ୍ରବଳ ବର୍ଷା ହୋଇଥିଲା। ତା’ପରେ ସେପ୍ଟେମ୍ବରର ଶେଷ ସପ୍ତାହରେ ପ୍ରବଳ ବର୍ଷା ହୋଇଥିଲା ଏବଂ ଅନେକ ନଦୀ ଜଳମଗ୍ନ ହୋଇଥିଲା। ଏହା ବ୍ୟତୀତ ଅକ୍ଟୋବର ମାସରେ ମଧ୍ୟ ଉତ୍ତରାଖଣ୍ଡରେ ବହୁତ ବର୍ଷା ହୋଇଥିଲା।
